ટેકનોલોજીની દુનિયામાં અત્યારે OpenAI ના CEO સેમ ઑલ્ટમેનનું એક નિવેદન ચર્ચાનું કેન્દ્ર બન્યું છે. તેમણે સ્પષ્ટ કર્યું છે કે જો સરકાર તેમને કોઈ અસંવિધાનિક કામ કરવા દબાણ કરશે, તો તે આદેશ માનવાને બદલે તેઓ જેલ જવાનું વધુ પસંદ કરશે. આ નિવેદન પાછળનું મુખ્ય કારણ અમેરિકાના સંરક્ષણ વિભાગ 'પેન્ટાગન' સાથે થયેલી OpenAI ની એક વિવાદાસ્પદ ડીલ છે, જેને કારણે સામાન્ય જનતામાં ભારે રોષ જોવા મળી રહ્યો છે.
વિવાદની શરૂઆત અને Anthropic ની ભૂમિકા :&nbsp;
આ સમગ્ર વિવાદ ત્યારે શરૂ થયો જ્યારે AI ક્ષેત્રની અન્ય દિગ્ગજ કંપની Anthropic એ પેન્ટાગન સાથે કામ કરવાનો ઇનકાર કરી દીધો. Anthropic નું માનવું હતું કે AI નો ઉપયોગ કોઈની જાસૂસી કરવા અથવા આપમેળે નિર્ણય લઈને હુમલો કરતા ઘાતક હથિયારો બનાવવામાં ન થવો જોઈએ. આ મક્કમ વલણને કારણે ટ્રમ્પ સરકારે Anthropic ને બ્લોક કરી દીધું હતું. આ તકનો લાભ લઈને OpenAI એ પેન્ટાગન સાથે કરાર કર્યો, જેનાથી લોકોમાં એવો ભય પેદા થયો કે હવે ChatGPT નો ઉપયોગ જાસૂસી માટે થશે.
ChatGPT ને અનઇન્સ્ટોલ કરવાનો વધતો દર :&nbsp;
લોકોનો રોષ આંકડાઓમાં સ્પષ્ટ દેખાય છે. સેન્સર ટાવરના અહેવાલ મુજબ, ChatGPT ને અનઇન્સ્ટોલ કરવાના દરમાં એક જ દિવસમાં 295% નો તોતિંગ વધારો થયો છે. બીજી તરફ, Anthropic ના એપ 'Claude' ના ડાઉનલોડ્સમાં 51% નો ઉછાળો આવ્યો અને તે અમેરિકન એપ સ્ટોરમાં નંબર 1 પર પહોંચી ગઈ છે. લોકો પ્રાઈવસી અને સુરક્ષાના મુદ્દે Anthropic ના નિર્ણયને સમર્થન આપી રહ્યા છે.
કરારમાં મહત્ત્વના ફેરફાર અને સુરક્ષાની ખાતરી :&nbsp;
વધતા દબાણને વશ થઈને સેમ ઑલ્ટમેને પેન્ટાગન સાથેની ડીલની શરતોમાં ફેરફાર કરવાની જાહેરાત કરી છે. નવા કરાર મુજબ:
કંપનીના ટૂલ્સનો ઉપયોગ અમેરિકન નાગરિકોની ઘરેલુ દેખરેખ (Surveillance) માટે કરવામાં આવશે નહીં.
લોકોનો પર્સનલ લોકેશન ડેટા કે બ્રાઉઝિંગ હિસ્ટ્રી ખરીદવામાં આવશે નહીં.
NSA જેવી ગુપ્તચર એજન્સીઓ હાલ પૂરતી OpenAI ની સેવાઓનો ઉપયોગ કરી શકશે નહીં.
સેમ ઑલ્ટમેનની સ્પષ્ટતા :&nbsp;
સોશિયલ મીડિયા પ્લેટફોર્મ X પર આયોજિત એક સત્રમાં ઑલ્ટમેને જણાવ્યું કે તેઓ સેનાને સલાહ આપવાને બદલે માત્ર સુરક્ષિત સિસ્ટમ બનાવવા ઈચ્છે છે. તેમણે ખાતરી આપી છે કે ChatGPT નો ઉપયોગ માનવતા વિરુદ્ધ કે ઘાતક હથિયારો માટે નહીં થાય. જોકે, પેન્ટાગન જેવી સંસ્થાઓ સાથેના જોડાણને કારણે નિષ્ણાતો હજુ પણ આ મામલે સાવચેત રહેવાની સલાહ આપી રહ્યા છે. હવે જોવાનું એ રહેશે કે આ ફેરફારો બાદ યુઝર્સનો ChatGPT પર વિશ્વાસ પાછો ફરે છે કે નહીં.

પેન્ટાગન સાથેની ડીલ બાદ ChatGPT વિરુદ્ધ અમેરિકામાં ઉગ્ર રોષ

March 3, 2026 | 18:45 IST