વોટ્સએપ પેરન્ટલ કંટ્રોલથી બાળકોના એકાઉન્ટ પર નજર

વોટ્સએપ દ્વારા યુઝર્સની સુરક્ષા અને ખાસ કરીને બાળકોના હિતમાં એક ક્રાંતિકારી ફીચર પર કામ કરવામાં આવી રહ્યું છે. ગૂગલ પ્લે બીટા પ્રોગ્રામના લેટેસ્ટ અપડેટમાં 'પેરન્ટલ કન્ટ્રોલ' ફીચરના સંકેતો મળ્યા છે. આ સુવિધા દ્વારા વાલીઓ તેમના બાળકોના સેકન્ડરી એકાઉન્ટને લિમિટેડ એક્સેસ સાથે કન્ટ્રોલ કરી શકશે, જેથી બાળકો માટે ડિજિટલ પ્લેટફોર્મ વધુ સુરક્ષિત બનશે.

ઉંમરના નિયમો અને વાલીઓની મંજૂરી : 

સામાન્ય રીતે વોટ્સએપનો ઉપયોગ કરવા માટે ન્યૂનતમ ઉંમર 13 વર્ષ નક્કી કરવામાં આવી છે. જોકે, આ ઉંમરથી નાના બાળકો ટર્મ્સ ઓફ સર્વિસનો સ્વીકાર કરી શકતા નથી. નવા ફીચર મુજબ, હવે પેરન્ટ્સ પોતે ગાર્ડિયન બનીને બાળકોને વોટ્સએપ વાપરવાની મંજૂરી આપી શકશે અને કયા ફીચર્સ ઉપલબ્ધ રાખવા તે પણ નક્કી કરી શકશે.

સેકન્ડરી એકાઉન્ટ લિંક કરવાની પ્રક્રિયા : 

આ સુવિધાનો લાભ લેવા માટે બાળકના સેકન્ડરી એકાઉન્ટને પેરન્ટના પ્રાઇમરી એકાઉન્ટ સાથે લિંક કરવું પડશે. એકવાર એકાઉન્ટ લિંક થઈ ગયા પછી, વાલીઓ નક્કી કરી શકશે કે બાળકને કોણ મેસેજ કે કોલ કરી શકે છે. આનાથી ઓનલાઇન ફ્રોડ, સ્કેમ અને હેરેસમેન્ટ જેવી સમસ્યાઓ સામે રક્ષણ મળશે. નોંધનીય છે કે, લિંક હોવા છતાં બંનેના મેસેજ અને કોલ્સ સંપૂર્ણપણે પ્રાઇવેટ રહેશે.

એક્ટિવિટી રિપોર્ટ અને પ્રાઈવસી : 

પેરન્ટ્સને બાળકની ચેટ એક્ટિવિટી વિશેના રિપોર્ટ્સ પણ મળશે. આ રિપોર્ટમાં બાળક કોની સાથે વાત કરી રહ્યું છે તેની જાણકારી મળશે, પરંતુ 'એન્ડ-ટૂ-એન્ડ ઇન્ક્રિપ્શન'ના કારણે પેરન્ટ્સ પણ બાળકના મેસેજ વાંચી શકશે નહીં. આમ, પ્રાઈવસી અને સુરક્ષા વચ્ચે યોગ્ય સંતુલન જાળવવામાં આવ્યું છે.