ટેક જાયન્ટ એપલે ભારતીય બજારમાં પોતાનો સૌથી સસ્તો અને લેટેસ્ટ સ્માર્ટફોન iPhone 17e સત્તાવાર રીતે લોન્ચ કરી દીધો છે. આ નવો સ્માર્ટફોન iPhone 17 સિરીઝનો સૌથી એફોર્ડેબલ વેરિઅન્ટ છે. કંપનીએ આ વખતે એન્ટ્રી લેવલ મોડેલમાં પણ પાવરફુલ પ્રોસેસર અને મજબૂત પ્રોટેક્શન આપીને ગ્રાહકોને આકર્ષવાનો પ્રયાસ કર્યો છે. જોકે, કેટલાક ક્લાસિક ફીચર્સ હજુ પણ જૂની ડિઝાઇનની યાદ અપાવે છે.
કિંમત અને ઉપલબ્ધતા :&nbsp;
ભારતમાં iPhone 17e ના બેઝ વેરિઅન્ટ (256GB સ્ટોરેજ) ની કિંમત 64,900 રૂપિયા નક્કી કરવામાં આવી છે. જ્યારે તેના હાયર એન્ડ વેરિઅન્ટ એટલે કે 512GB મોડેલ માટે ગ્રાહકોએ 84,900 રૂપિયા ચૂકવવા પડશે. આ સ્માર્ટફોન આકર્ષક ત્રણ કલર્સ - બ્લેક, સોફ્ટ પિંક અને વ્હાઇટમાં ઉપલબ્ધ થશે. અત્યારે તેના પ્રી-ઓર્ડર શરૂ થઈ ચૂક્યા છે, જ્યારે 11 માર્ચ થી એપલ સ્ટોર અને ઓનલાઇન પ્લેટફોર્મ પરથી તેનું સીધું વેચાણ શરૂ થશે.
ડિસ્પ્લે અને ડિઝાઇન :&nbsp;
iPhone 17e માં 6.1-ઇંચની સુપર રેટિના XDR OLED ડિસ્પ્લે આપવામાં આવી છે. જોકે, ડિસ્પ્લેમાં હજુ પણ 60Hz નો રિફ્રેશ રેટ અને જૂની નોચ ડિઝાઇન જોવા મળે છે. સુરક્ષા માટે કંપનીએ આમાં Ceramic Shield 2 પ્રોટેક્શન વાપર્યું છે, જે જૂના મોડેલ્સ કરતા ત્રણ ગણું વધુ મજબૂત છે અને સ્ક્રેચ સામે રક્ષણ આપે છે. આ ડિસ્પ્લે 800 નિટ્સની બ્રાઇટનેસ સાથે આવે છે.
પાવરફુલ A19 ચિપ અને પરફોર્મન્સ :&nbsp;
સૌથી મોટો ફેરફાર ફોનના હાર્ડવેરમાં કરવામાં આવ્યો છે. iPhone 17e માં એપલની લેટેસ્ટ A19 ચિપ લગાવવામાં આવી છે. આ પ્રોસેસરમાં 6-કોર CPU અને 4-કોર GPU છે, જે ફોનને અત્યંત ઝડપી બનાવે છે. સાથે જ 8GB રેમ હોવાથી મલ્ટીટાસ્કિંગ અને આર્ટિફિશિયલ ઇન્ટેલિજન્સ (AI) ફીચર્સ સરળતાથી ચાલે છે. આ ફોન લેટેસ્ટ iOS 26 ઓપરેટિંગ સિસ્ટમ પર કામ કરે છે.
કેમેરા અને બેટરી ચાર્જિંગ :&nbsp;
કેમેરાની વાત કરીએ તો, ફોનના પાછળના ભાગમાં 48MP નો સિંગલ કેમેરો આપવામાં આવ્યો છે, જે ઓપ્ટિકલ ઈમેજ સ્ટેબિલાઈઝેશન (OIS) ને સપોર્ટ કરે છે. સેલ્ફી માટે આગળના ભાગમાં 12MP ટ્રુડેપ્થ કેમેરા મળે છે. વીડિયોગ્રાફી માટે આમાં એક્શન મોડ જેવા એડવાન્સ ફીચર્સ નથી, પણ સામાન્ય ફોટોગ્રાફી માટે તે શ્રેષ્ઠ છે. આ વખતે સૌથી મોટો ઉમેરો મેગસેફ (MagSafe) સપોર્ટનો છે, જેનાથી વાયરલેસ ચાર્જિંગ સરળ બનશે. તે 20W વાયર્ડ અને 7.5W વાયરલેસ ચાર્જિંગને સપોર્ટ કરે છે.

એપલે ભારતમાં લોન્ચ કર્યો અત્યાર સુધીનો સૌથી સસ્તો iPhone 17e

March 3, 2026 | 12:57 IST