US ટેક જાયન્ટ Googleએ બુધવારે ભારતમાં સ્ટાર્ટઅપ ઇકોસિસ્ટમને મજબૂત કરવા માટે એક મહત્વપૂર્ણ જાહેરાત કરી છે. કંપનીએ 'Google for Startups India' હેઠળ બે અઠવાડિયાના એક ખાસ પ્રોગ્રામની શરૂઆત કરી છે. આ કાર્યક્રમનો ઉદ્દેશ્ય ભારતમાં અર્લી-સ્ટેજ ફાઉન્ડર્સ, સ્ટાર્ટઅપ ટીમો અને મહત્વાકાંક્ષી ઉદ્યોગસાહસિકોને Googleના AI ટૂલ્સનો ઉપયોગ કરીને લોન્ચ-રેડી AI પ્રોટોટાઇપ વિકસાવવા માટે સજ્જ કરવાનો છે.
AI-પાવર્ડ પ્રોટોટાઇપ બનાવવાનું શીખવાશે
આ પ્રોગ્રામ 27 નવેમ્બરથી 7 ડિસેમ્બર, 2025 દરમિયાન ચાલશે. રિલીઝ મુજબ, આ ઇવેન્ટમાં ભાગ લેનારાઓને તેમના આઇડિયાને Googleની અદ્યતન AI ટેક્નોલોજીનો ઉપયોગ કરીને કાર્યક્ષમ, AI-પાવર્ડ પ્રોટોટાઇપમાં ઝડપથી રૂપાંતરિત કરવા માટે આવશ્યક સાધનો અને જ્ઞાન આપવામાં આવશે.
પ્રોગ્રામમાં મુખ્યત્વે AI-ફર્સ્ટ પ્રોટોટાઇપિંગ, AI-પાવર્ડ રિસર્ચ અને AI ક્રિએટિવ સ્ટુડિયો જેવી પ્રેક્ટિકલ સ્કીલ્સ પર ધ્યાન કેન્દ્રિત કરવામાં આવ્યું છે. સહભાગીઓ Googleના AI ટૂલ્સ, જેમ કે જેમિની, નેનો બનાના, ઇમેજન (Imagen), વિઓ (Veo), NotebookLM અને AI સ્ટુડિયોનો ઉપયોગ કરીને AI-ફર્સ્ટ સોલ્યુશન્સ કેવી રીતે ડિઝાઇન અને ડિપ્લોય કરવા તે શીખશે.
વિશ્વના બીજા સૌથી મોટા GenAI હબને મદદ
Google for Startups - Indiaના વડા રાગિની દાસે જણાવ્યું હતું કે, આ પ્રોગ્રામનો હેતુ AIની શક્તિને દરેક ફાઉન્ડર માટે સુલભ બનાવવાનો અને પરંપરાગત કોડિંગ અવરોધોને દૂર કરવાનો છે. આ પ્રોગ્રામ દ્વારા ઉદ્યોગસાહસિકોને કન્સેપ્ટથી ક્રિએશન સુધી ઝડપથી પહોંચવામાં મદદ મળશે.
ઉલ્લેખનીય છે કે, ભારતમાં જનરેટિવ AI (GenAI) ઇકોસિસ્ટમ છેલ્લા એક વર્ષમાં 3.7 ગણી વધી છે, જેના કારણે ભારત વિશ્વમાં બીજા નંબરનું સૌથી મોટું GenAI સ્ટાર્ટઅપ હબ બન્યું છે.
આ પહેલને MeitY Startup Hub, Startup India, IndiaAI Mission, અને Nasscom જેવી અગ્રણી સંસ્થાઓનું સમર્થન પ્રાપ્ત છે. સફળ સહભાગીઓને Google-માન્યતા પ્રાપ્ત Certificate of Participation મળશે અને જાન્યુઆરી 2026માં આયોજિત 'બિલ્ડ ધ ફ્યુચર' શોકેસમાં ભાગ લેવા માટે લાયક ઠરશે, જેમાં Google નિષ્ણાતો તરફથી માર્ગદર્શન પણ મળશે.

'Google for Startups India' હેઠળ પ્રોગ્રામ

AI-ફર્સ્ટ સોલ્યુશન્સ માટેનો બે સપ્તાહનો સઘન કાર્યક્રમ, Google AI ટૂલ્સથી AI પ્રોટોટાઇપ..

November 5, 2025 | 20:03 IST