બાળકોનું WhatsApp હવે વાલીઓના કંટ્રોલમાં રહેશે

સોશિયલ મીડિયાના વધતા પ્રભાવ વચ્ચે બાળકોને સુરક્ષિત રાખવા માટે મેટા (Meta) માલિકીના વોટ્સએપે એક મહત્વનું પગલું ભર્યું છે. વોટ્સએપે 13 વર્ષથી ઓછી ઉંમરના બાળકો માટે ખાસ 'પેરેન્ટ-મેનેજ્ડ એકાઉન્ટ્સ' રજૂ કર્યા છે.

આ ફીચરની મદદથી હવે વાલીઓ અથવા ગાર્ડિયન નક્કી કરી શકશે કે તેમનું બાળક વોટ્સએપ પર કોની સાથે સંપર્ક કરી શકે છે અને કયા ગ્રુપમાં જોડાઈ શકે છે.

વાલીઓ શું કંટ્રોલ કરી શકશે?

આ નવા ફીચર હેઠળ વાલીઓ બાળકના એકાઉન્ટમાં કોન્ટેક્ટ લિસ્ટ, ગ્રુપ પાર્ટિસિપેશન અને પ્રાઇવસી સેટિંગ્સ પર નજર રાખી શકશે. સૌથી મહત્વની વાત એ છે કે, બાળકો પોતે આ સેટિંગ્સ બદલી શકશે નહીં.

સેટિંગ્સમાં ફેરફાર કરવા માટે 6-આંકડાના સ્પેશિયલ 'પેરેન્ટ પિન'ની જરૂર પડશે, જે માત્ર વાલીઓ પાસે જ રહેશે. અજાણ્યા લોકોના મેસેજ રિક્વેસ્ટ પણ વાલીઓની મંજૂરી બાદ જ જોઈ શકાશે.

સેટઅપ કરવા માટેની શરતો

વોટ્સએપ આ ફીચરને તબક્કાવાર રીતે વિશ્વભરમાં રોલઆઉટ કરી રહ્યું છે. આ એકાઉન્ટ સેટ કરવા માટે બાળકની ઉંમર 13 વર્ષથી ઓછી અને વાલીની ઉંમર ઓછામાં ઓછી 18 વર્ષ હોવી અનિવાર્ય છે. આ પ્રક્રિયા માટે વાલી અને બાળક બંનેના ફોનમાં વોટ્સએપનું લેટેસ્ટ વર્ઝન હોવું જરૂરી છે.

કઈ રીતે સેટઅપ કરવું?

1. બાળકના ફોનમાં વોટ્સએપ ડાઉનલોડ કરી 'Create a Parent-Managed Account' વિકલ્પ પસંદ કરો.

2. બાળકની જન્મ તારીખ નાખી તેને વાલીના એકાઉન્ટ સાથે લિંક કરો.

3. વાલીના ફોનથી QR કોડ સ્કેન કરી પુખ્ત હોવાની વેરિફિકેશન પ્રક્રિયા પૂર્ણ કરો.

4. 6-આંકડાનો પેરેન્ટ પિન સેટ કરો.

ભારતમાં જ્યારે કર્ણાટક અને આંધ્રપ્રદેશ જેવી સરકારો બાળકો માટે સોશિયલ મીડિયા પર પ્રતિબંધ મૂકવાની વિચારણા કરી રહી છે, ત્યારે વોટ્સએપનું આ 'સુપરવિઝન' ફીચર બાળકોને પ્રતિબંધને બદલે સુરક્ષિત માહોલમાં ટેકનોલોજીનો ઉપયોગ કરતા શીખવશે.