વોટ્સએપ પર આવશે 'ગેસ્ટ ચેટ્સ'; જાણો નવું ફીચર

દુનિયાનું સૌથી લોકપ્રિય મેસેજિંગ પ્લેટફોર્મ વોટ્સએપ એક નવા અને અત્યંત ઉપયોગી ફીચર પર કામ કરી રહ્યું છે. 'ગેસ્ટ ચેટ્સ' (Guest Chats) નામના આ ફીચર દ્વારા હવે વોટ્સએપ યુઝર્સ એવા લોકો સાથે પણ વાત કરી શકશે જેમના ફોનમાં વોટ્સએપ નથી અથવા જેમણે એકાઉન્ટ બનાવ્યું નથી.

આ ફીચર ખાસ કરીને એવા લોકો માટે ઉપયોગી સાબિત થશે જેઓ કોઈ કામચલાઉ હેતુ માટે કોઈની સાથે વાત કરવા માંગે છે પણ એકાઉન્ટ ખોલવા માંગતા નથી.

કેવી રીતે કામ કરશે 'Guest Chats'?

રિપોર્ટ અનુસાર, વોટ્સએપ યુઝર્સ 'ઇન્વાઇટ અ ફ્રેન્ડ' સેક્શનમાંથી એક સિક્યોર વેબ લિંક જનરેટ કરી શકશે. આ લિંક સામેની વ્યક્તિને SMS, ઇમેઇલ કે અન્ય પ્લેટફોર્મ દ્વારા મોકલી શકાશે. સામેની વ્યક્તિ લિંક પર ક્લિક કરીને સીધા જ વેબ બ્રાઉઝર કે મોબાઈલ વેબ દ્વારા ચેટમાં જોડાઈ શકશે. આ માટે તેને વોટ્સએપ એપ્લિકેશન ડાઉનલોડ કરવાની કે સાઇન-અપ કરવાની જરૂર રહેશે નહીં.

મર્યાદિત ફીચર્સ અને સુરક્ષા

ગેસ્ટ ચેટ્સ એ એક કામચલાઉ સોલ્યુશન હોવાથી તેમાં વોટ્સએપના તમામ ફીચર્સનો લાભ નહીં મળે.

શું નહીં કરી શકાય:

ગેસ્ટ ચેટ્સમાં ફોટો, વીડિયો, ડોક્યુમેન્ટ કે વોઈસ મેસેજ મોકલી શકાશે નહીં. આ ઉપરાંત વોઈસ અને વીડિયો કોલિંગ તેમજ ગ્રુપ ચેટની સુવિધા પણ ઉપલબ્ધ રહેશે નહીં.

 વોટ્સએપે ગેસ્ટ ચેટ્સમાં પણ એન્ડ-ટુ-એન્ડ એન્ક્રિપ્શન જાળવી રાખ્યું છે. દરેક ગેસ્ટ સેશન માટે એક યુનિક આઇડેન્ટિફાયર જનરેટ થશે જે ચેટને સુરક્ષિત રાખશે.

એક્સપાયરી પિરિયડ

આ ચેટની ખાસિયત એ છે કે જો 10 દિવસ સુધી ગેસ્ટ ચેટમાં કોઈ હિલચાલ ન થાય (ઇન-એક્ટિવિટી), તો તે ચેટ આપોઆપ એક્સપાયર થઈ જશે. ફરી વાત કરવા માટે યુઝરે નવી ઇન્વાઇટ લિંક જનરેટ કરવી પડશે.

હાલમાં આ ફીચર એન્ડ્રોઇડ અને iOSના પસંદગીના બીટા યુઝર્સ માટે ઉપલબ્ધ છે અને ટૂંક સમયમાં જ તમામ યુઝર્સ માટે જાહેર કરવામાં આવી શકે છે.