ભાજપમાં ભાંજગડઃ ભાજપના સાંસદે ભાજપના ધારાસભ્યને શા માટે લેટર લખ્યો?

‘પાર્ટી વિથ ડિફરન્સ’ ગણાતી ભાજપ પાર્ટીમાં ઘણા સમયથી નેતાઓ વચ્ચે ખેંચતાણ ચાલી રહી છે. સૌરાષ્ટ્રમાં અમરેલી અને રાજકોટમાં લેટર બોંબ ફૂટ્યા બાદ અમદાવાદ પૂર્વના સાંસદનો લેટર વાયરલ થયો છે. ભાજપના સાંસદ હસમુખ પટેલે વટવાના ધારાસભ્ય બાબુસિંહ જાદવને પત્ર લખીને ધામતવાણ ગામના લોકોની ફરિયાદ સંદર્ભે કાર્યવાહી કરવા સૂચના આપી છે. જાહેરમાં ન બોલવાની શિસ્ત જાળવવા માટે હવે નેતાઓ પત્ર લખીને એકબીજા નેતાઓની પોલ ખોલી રહ્યા છે. દસક્રોઈ તાલુકાના ધામતવાણ ગામના મહિલા સરપંચ અને તેમના પતિ વિરૂદ્ધ ગ્રામજનોએ કરોડોના ભ્રષ્ટાચાર અંગે અમદાવાદ પૂર્વના લોકસભા સાંસદ હસમુખ પટેલને લેખિત રજૂઆત કરી હતી. આ મુદ્દે સાંસદે ધારાસભ્યને પત્ર લખીને કાર્યવાહી કરવાનું કહેતાં ભાજપના નેતાઓમાં સંકલનનો અભાવ હોવાનું જોવા મળી રહ્યું છે.

અમદાવાદ જિલ્લાના દસક્રોઈ તાલુકા વિસ્તારના ધામતવાણ ગામના સરપંચ રેખાબેન પારેખ અને તેમના પતિ સંજયભાઈ પારેખ વિરૂદ્ધ કરોડોના ભ્રષ્ટાચારની ગ્રામજનોએ લેખિત રજૂઆત કરી છે.  અમદાવાદ પૂર્વના લોકસભા સાંસદ હસમુખ પટેલને કરેલી લેખિત રજૂઆતમાં મહિલા સરપંચ અને તેમના પતિ દ્વારા ઈન્ડસ્ટ્રીયલ શેડ બાંધવા માટે રજાચિઠ્ઠી આપવા બાબતે તેમજ અન્ય કામોમાં પણ ભ્રષ્ટાચાર આચરવામાં આવતો હોવાના ગંભીર આક્ષેપો કર્યા છે. ગ્રામજનોએ કરેલી લેખિત રજૂઆત બાદ સાંસદ હસમુખ પટેલે વટવાના ધારાસભ્ય બાબુસિંહ જાદવને ગામ લોકોની ફરિયાદનું નિરાકરણ લાવવા અને મહિલા સરપંચ તેમજ તેમના પતિ સામે પગલાં લેવા સૂચના આપી છે.  

ગ્રામજનોએ આરોપ લગાવ્યો છે કે, ગ્રામ પંચાયતમાં સરપંચ તરીકે મહિલા હોવા છતાં વહીવટ તેમના પતિ કરે છે. ઇન્ડસ્ટ્રીયલ શેડ બાંધવા રજાચિઠ્ઠી આપવાથી લઈ કોઈપણ કામમાં પૈસાનો વહીવટ કરતા હોય છે. આ અંગે વટવા વિધાનસભાના ભાજપના ધારાસભ્ય બાબુસિંહ જાદવને કરી કરી હતી. પરંતુ, તેમના દ્વારા કોઈ કાર્યવાહી નહી કરાતાં ગ્રામજનોએ સાંસદને લેખિત રજૂઆત કરીએ છીએ. 

મહિલા સરપંચ અને તેમના પતિ સામે ગંભીર આરોપ

ગ્રામજનોએ આક્ષેપ કર્યો છે કે, ધામતવાણ ગામના સરપંચ રેખાબેનના પતિ સંજયભાઈ પારેખ પંચાયતનો વહીવટ ચલાવે છે. ગ્રામ પંચાયતનું રેકર્ડ પણ પોતાના ઘરે રાખીને સમગ્ર વહીવટ ચલાવે છે. ઈન્ડસ્ટ્રીયલ શેડ માટે રજા ચિઠ્ઠીના રૂપિયા લે છે. સંજયભાઈના પત્ની સરપંચ હોવા છતાં સંજયભાઈ પોતાને સરપંચ માને છે. ધામતવાણ ગ્રામ-પંચાયતની વહીવટી કામગીરી સંજયભાઈ પોતે જ કરે છે. સરકારી રેકર્ડ સાથે ચેડાં કરી વ્યક્તિગત આર્થિક લાભ થાય તે માટે બેફામ રીતે સરકારના ડર વગર ધામતવાણ ગ્રામ-પંચાયતના માલિક હોય તે રીતે કામગીરી કરી રહ્યા છે. તેઓ કોઈપણ નોકરી કે વ્યવસાય નહી કરતાં હોવા છતાં ભ્રષ્ટાચાર દ્વારા અનેક મિલકતો ખરીદી છે.

છેલ્લાં 25 વર્ષમાં 19 વર્ષ સુધી સંજય પારેખના પરિવાર પાસે સરપંચપદ

વર્ષ 2001 થી 2006 સુધી સંજય ચંદુલાલ પારેખ, વર્ષ 2007 થી 2011 સુધી સંજય પારેખના માતા શાંતાબેન ચંદુલાલ પારેખ, વર્ષ 2017 થી 2021 સંજય ચંદુલાલ પારેખ અને વર્ષ 2021 થી આજદિન સુધી સંજય પારેખના પત્ની રેખાબેન સંજયભાઈ પારેખ સરપંચપદે રહ્યા છે. છેલ્લાં 25 વર્ષમાં 19 વર્ષ સુધી સંજય પારેખના પરિવાર પાસે સરપંચપદ રહ્યું છે.

શેઠની શિખામણ ઝાંપા સુધી...

ત્રણ વર્ષ અગાઉ માર્ચ-2025માં અમદાવાદમાં યોજાયેલા પંચાયત મહાસંમેલનમાં વડાપ્રધાન નરેન્દ્ર મોદીએ ભાજપ શાસિત જિલ્લા પંચાયતો, તાલુકા પંચાયતો  અને ગ્રામ પંચાયતોમાં મહિલા સભ્યો તેમજ મહિલા સરપંચોના પતિદેવો વહીવટ કરતાં હોવાની વ્યાપક ફરિયાદો મળી હોવાથી યોગ્ય અમલ કરવાની ટકોર કરી હતી. જો કે, શેઠની શિખામણ ઝાંપા સુધી કહેવત મુજબ વડાપ્રધાને ટકોર કર્યા બાદ ગુજરાતમાં આજે પણ જૈસે થે જેવી પરિસ્થિતિ છે. આજે પણ સ્થાનિક સ્વરાજની સંસ્થાઓમાં 50 ટકા મહિલાઓ હોવા છતાં પતિદેવો વહીવટ કરતાં હોવાની ફરિયાદો સામાન્ય બની ગઈ છે. પંચાયત વિભાગ માત્ર પરિપત્ર કરીને સંતોષ માનતો હોય તેમ લાગી રહ્યુ છે. પરિપત્રનો અમલ કરાવવાનો હોય છે તે ડીડીઓ, ટીડીઓ અને તલાટીની હાજરીમાં પરિપત્રનું ઉલ્લંઘન થતું હોવા છતાં કાર્યવાહી કરાતી નથી તે વાસ્તવિક્તા છે.