ગુજરાત યુથ કોંગ્રેસ પ્રમુખની ચૂંટણીમાં કોણ જીત્યું

ગુજરાત યુવક કોંગ્રેસ પ્રમુખપદની ત્રણ મહિના પહેલાં યોજાયેલી ચૂંટણીનું પરિણામ જાહેર થયુ છે. જેમાં યુવક કોંગ્રેસ પ્રમુખપદ માટે દાવેદારી કરનાર પ્રવિણસિંહ વણોલને હરીફ ઉમેદવાર સંજય નિનામા કરતાં 51 હજાર મત વધુ મળ્યા છે. જો કે, દિલ્હીમાં મોવડીમંડળના ઈન્ટરવ્યુ બાદ ગુજરાત યુવક કોંગ્રેસ પ્રમુખના નામની જાહેરાત કરવામાં આવશે. તમને જણાવી દઈએ કે, 24 જૂન 2025થી 2 ઓગષ્ટ 2025 દરમિયાન ગુજરાત યુવક કોંગ્રેસ પ્રમુખની ઓનલાઈન ચૂંટણી યોજાઈ હતી. 

આજે (2 ડિસેમ્બર) ના રોજ સાંજે 5 વાગે યુવક કોંગ્રેસની ‘WITH IYC’ એપ ઉપર પરિણામ જાહેર કરવામાં આવ્યા હતા. જેમાં યુવક કોંગ્રેસ પ્રમુખપદ માટે સૌથી વધુ 79,486 મત પ્રવિણસિંહ વણોલને મળ્યા છે. જ્યારે હરીફ ઉમેદવાર સંજય નિનામાને 28,184 અને ઉવેશ મનસુરીને માત્ર 450 મત મળ્યા છે. એપ્રિલ-2025 થી નવેમ્બર-2025 સુધી યુવક કોંગ્રેસના સંગઠનના વિવિધ હોદ્દાઓ માટે ચૂંટણી પ્રક્રિયા યોજાઈ હતી.

કેવી રીતે ચાલી સમગ્ર ચૂંટણી પ્રક્રિયા?

ગુજરાત યુવક કોંગ્રેસ પ્રમુખપદ માટે ચાલી રહેલી ચૂંટણી પ્રક્રિયા એપ્રિલ-2025થી શરૂ થઈ હતી. એપ્રિલ-2025માં યુવક કોંગ્રેસ પ્રમુખપદ માટે દાવેદારોએ નોમિનેશન કર્યુ હતુ. જે તે સમયે યુવક કોંગ્રેસ પ્રમુખપદ માટે 10 જેટલા કાર્યકરોએ દાવેદારી કરી હતી.

યુવક કોંગ્રેસના પ્રમુખ બનવા માટે દાવેદારી કર્યા બાદ યુવક કોંગ્રેસની ‘WITH IYC’ એપથી ઓનલાઈન મતદાન પ્રક્રિયા કરવામાં આવી હતી. 24 જૂન 2025 થી 2 ઓગષ્ટ 2025 સુધી સમગ્ર પ્રક્રિયા ચાલી હતી. જેમાં 18 થી 25 વર્ષની વયના કોંગ્રેસના કાર્યકરોએ કોંગ્રેસની ‘WITH IYC’ એપ ઉપર વીડિયો બનાવી મતદાન કર્યુ હતુ. જેમાં ગુજરાત કોંગ્રેસના 1,10,096 યુવા કાર્યકરોએ મતદાન કર્યુ હતું. જ્યારે નોંધાયેલા 995 મતદારોએ મતદાન કર્યુ નહોતું.

મતદાન પ્રક્રિયા પૂર્ણ થયા બાદ ગુજરાત યુવક કોંગ્રેસના પ્રમુખપદની સાથે ઉપપ્રમુખપદ, મહામંત્રી, જિલ્લા પ્રમુખ, વિધાનસભા પ્રમુખ અને બ્લોક પ્રમુખની ચૂંટણી કરવામાં આવી હતી. ત્યારબાદ 14 થી 19 નવેમ્બર દરમિયાન દરેક ઉમેદવારોને સુધારા કરવા માટે તક આપવામાં આવી હતી.

યુવક કોંગ્રેસના પ્રમુખની પસંદગી કેવી રીતે કરાશે?

બીજી ડિસેમ્બરે ગુજરાત યુવક કોંગ્રેસના સંગઠનના વિવિધ હોદ્દાઓ માટે યોજાયેલી ચૂંટણીના પરિણામ જાહેર કરી દેવામાં આવ્યા છે. જેમાં મળેલાં મત પ્રમાણે ઉપપ્રમુખ, મહામંત્રી, મંત્રી સહિતના હોદ્દાઓ આપવામાં આવશે. જ્યારે યુવક કોંગ્રેસના પ્રમુખપદ માટે સૌથી વધુ મત મેળવનાર બે ઉમેદવારોને કોંગ્રેસનું મોવડી મંડળ દિલ્હી બોલાવશે. જ્યાં ગુજરાત પ્રભારી, ઈન્ડિયન યુથ કોંગ્રેસ પ્રમુખ અને રાષ્ટ્રીય નેતા બંને ઉમેદવારોના ઈન્ટરવ્યુ કરી તમામ માહિતી મેળવ્યા બાદ ગુજરાત યુવક પ્રમુખનું નામ જાહેર કરશે.

કોણ છે પ્રવિણસિંહ વણોલ?

પ્રવિણસિંહ વણોલ સુરેન્દ્રનગર જિલ્લાના પાટડી તાલુકાના ગવાણા ગામના વતની છે. તેમણે પોતાનું પ્રાથમિક શિક્ષણ વતનમાં, માધ્યમિક અને ઉચ્ચતર માધ્યમિક શિક્ષણ કડીની સર્વ વિદ્યાલયમાં મેળવ્યું હતું. જ્યારે અમદાવાદની સી.યુ.શાહ સાયન્સ કોલેજમાં સ્નાતક, અનુસ્નાતકની પદવી મેળવી છે. જ્યારે ગુજરાત યુનિવર્સિટીમાંથી પીએચડીની પદવી પણ મેળવી છે. તેઓ વિદ્યાર્થી કાળથી કોંગ્રેસની વિદ્યાર્થી પાંખ NSUI સાથે જોડાયા હતા. અભ્યાસ દરમિયાન તેઓ ગુજરાત યુનિવર્સિટીના સેનેટ મેમ્બર પણ બન્યા હતા. હાલમાં તેઓ યુવક કોંગ્રેસના મંત્રીપદે કાર્યરત છે. સામાન્ય ખેડૂત પરિવારમાં જન્મીને પ્રવિણસિંહ વણોલ લાંબો સંઘર્ષ કરીને યુવક કોંગ્રેસના પ્રમુખપદ સુધી પહોંચ્યા છે.