બનાસકાંઠાના પાલનપુરમાં પોલીસે પકડેલું એક કિલો સોનું ક્યાં ગાયબ થયું?

બનાસકાંઠાના પાલનપુરમાં તાજેતરમાં રાત્રિના સમયે એક કિલો સોનું પકડાયું હોવાનો અને તે સોનું ક્યાં ગાયબ થયાનો કોંગ્રેસના ધારાસભ્ય જીજ્ઞેશ મેવાણીએ સનસનીખેજ આક્ષેપ કર્યો છે. વડગામના ધારાસભ્ય જીજ્ઞેશ મેવાણીએ સોશિયલ મીડિયા પ્લેટફોર્મ ‘X’ ઉપર પોસ્ટ કરીને બનાસકાંઠા પોલીસના અધિકારીઓ સામે ગંભીર આક્ષેપો કર્યા છે. તેમણે મુખ્યમંત્રી ભૂપેન્દ્ર પટેલને ટેગ કરીને સમગ્ર મામલે સીઆઈડી ક્રાઈમ પાસે તપાસ કરાવવાની માગ કરી છે.

ધારાસભ્ય જીજ્ઞેશ મેવાણીએ છેલ્લાં બે દિવસથી બનાસકાંઠા પોલીસ સામે રીતસરનો મોરચો માડ્યો છે. સોશિયલ મીડિયા પ્લેટફોર્મ ‘X’ ઉપર મંગળવારે રાત્રે 9.30 કલાકથી લઈને બુધવારે બપોરે 11.30 કલાક સુધીમાં આઠ પોસ્ટ કરી બનાસકાંઠા પોલીસ સામે ગંભીર આક્ષેપો કર્યા છે. આ પોસ્ટ સાથે તેમણે વડાપ્રધાન નરેન્દ્ર મોદી, કેન્દ્રીય ગૃહમંત્રી અમિત શાહ, મુખ્યમંત્રી ભૂપેન્દ્ર પટેલ, ગૃહ રાજ્યમંત્રી હર્ષ સંઘવી અને ગુજરાત ડીજીપી વિકાસ સહાયને પણ ટેગ કર્યા છે.

સોશિયલ મીડિયા પ્લેટફોર્મ ‘X’ ઉપર તેમણે આક્ષેપ કરતાં લખ્યું છે કે, બનાસકાંઠા જિલ્લામાં કેટલા દિવસો સુધી કાયદો અને બંધારણની ધજ્જીયા ઉડતી રહેશે?, બનાસકાંઠા પોલીસની પૈસાની ભૂખના કારણે કેટલી બહેનો વિધવા બનશે?, ડીવાયએસપી ગામિતને સીધા નિશાને લઈ મેવાણીએ લખ્યું છે કે, તેમના આશીર્વાદથી કલેક્ટર અને એસપીના બંગલાથી થોડા કિલોમીટરના અંતરે દારૂનું વેચાણ થઈ રહ્યુ હોવાથી પાલનપુરની મહિલાઓ અસલામતી અનુભવી રહી છે. આ કાળો કારોબાર બંધ કરાવવા તેમણે મુખ્યમંત્રીને ચેલેન્જ કરી છે. રાત સુધી બંધ નહી કરાવે તો એસપીના બંગલા બહાર બેસી જવાની તેમણે ચીમકી ઉચ્ચારી છે.  

અન્ય એક પોસ્ટમાં બનાસકાંઠા પોલીસ અધિકારીઓ સામે ગંભીર આક્ષેપો કર્યા છે. તેમાં લખ્યુ છે કે, પાલનપુર શહેરમાં કોઈ પોલીસ કર્મચારીએ રાત્રિના સમયે એક કિલો સોનું પકડ્યું હતું. આ મામલે કોઈ ફરિયાદ કેમ દાખલ થઈ નથી. પકડાયેલું સોનું ક્યાં ગયું?, હવામાં ઉડી ગયું?, આ મામલામાં એક પીઆઈ અને ડીવાયએસપીની ભૂમિકા શું રહી? તેવા સવાલ કરી સીઆઈડી ક્રાઈમના અધિકારી પાસે તપાસ કરાવાય તો એક પીઆઈ અને ડીવાયએસપીની વિકેટ પડી શકવાનો દાવો કર્યો છે.

ગુજરાતીમાં પોસ્ટ કરતાં લખ્યું છે કે, “પાલનપુર શહેરમાં જે સોનું પકડાયું અને "ગાયબ" થઈ ગયું એ પ્રકરણના આરોપી પોલીસકર્મીના વહિવટદારે ડીસામાં પણ દારૂનો મુદ્દામાલ ગાયબ કરી દીધો હતો - એક હજાર ટકા!” આ ઉપરાંત પાલનપુર શહેરમાં જાણીતા ધાર્મિક સ્થળોની આજુબાજુના 3 કિલોમીટર વિસ્તારમાં શરમજનક રીતે દારૂનું વેચાણ થઈ રહ્યાનો આક્ષેપ કરી તે મુદ્દે પોલીસ અધિકારી સામે કાર્યવાહી કરવા મુખ્યમંત્રી સમક્ષ માગ કરી છે.

પાલનપુર શહેરમાં એમડી ડ્રગ્સનો પણ કાળો કારોબાર ચાલતો હોવાનો આક્ષેપ કરી મુખ્યમંત્રીને તે દિશામાં કાર્યવાહી કરવા રજૂઆત કરી છે. આ માટે પોલીસ અધિકારીઓ સામે તપાસ કરી કાર્યવાહી કરવા જણાવ્યું છે. 23 લાખ રૂપિયા લઈને પાલનપુરમાં દારૂના ઠેકાને કોણે મંજૂરી આપી?, એક અસામાજીક તત્વનું નામ લખીને બનાસકાંઠા પોલીસ અને તેના વચ્ચે શું સંબંધ છે? જેવા સવાલો ઉઠાવ્યા છે. પાલનપુર પૂર્વ પોલીસ સ્ટેશનના હદ વિસ્તારમાં હપ્તા ખોરીના કારણે દારૂના અડ્ડા ચાલતા હોવાનો આક્ષેપ કરી નામજોગ પોસ્ટમાં લખ્યું છે. જેમાં તેમણે મુખ્યમંત્રી, ગૃહ રાજ્યમંત્રી અને ડીજીપીને પણ ટેગ કર્યા છે. બુધવારે છેલ્લી 11.30 કલાકે કરેલી પોસ્ટમાં તેમણે લખ્યું કે, “અત્યારે હાલ આ લખી રહ્યો છું ત્યારે પણ પાલનપુર શહેરના ઢૂંઢીયાવાડી વિસ્તારમાં પોલીસ ચોકી પાછળ દારૂ વેચાઈ રહ્યો છે.”  

ધારાસભ્ય મેવાણીએ છેલ્લાં 24 કલાક દરમિયાન સોશિયલ મીડિયા પ્લેટફોર્મ ‘X’ ઉપર ગંભીર આક્ષેપો કરતી આઠ પોસ્ટ કરીને મુખ્ચમંત્રી ભૂપેન્દ્ર પટેલ, ગૃહ રાજ્યમંત્રી હર્ષ સંઘવી, ગુજરાત ડીજીપી વિકાસ સહાયને ટેગ કર્યા હોવા છતાં હજુ સુધી કોઈ જવાબ આપવામાં આવ્યો નથી.