Visavadar : આક્ષેપોનો અખાડો શરુ, આપના કિરીટ પટેલ પર ગંભીર આરોપ

વિસાવદર વિધાનસભાની પેટાચૂંટણી રાજકીય ગરમાગરમીનું કેન્દ્ર બની છે, જેમાં ભાજપના ઉમેદવાર કિરીટ પટેલ પર આમ આદમી પાર્ટી (આપ) દ્વારા ભ્રષ્ટાચાર, એફિડેવિટમાં ખોટી માહિતી અને નાણાકીય અનિયમિતતાના ગંભીર આક્ષેપો લગાવવામાં આવ્યા છે. આપના ગુજરાત પ્રદેશ અધ્યક્ષ ઇસુદાન ગઢવીએ પ્રેસ કોન્ફરન્સ યોજીને કિરીટ પટેલ સામે મગફળી કાંડ, એફિડેવિટમાં વિગતો છુપાવવા અને પત્નીને લોન આપવા સુધીના આરોપોનો ધડાકો કર્યો છે.   ઇસુદાન ગઢવીના આક્ષેપો   ઇસુદાન ગઢવીએ કિરીટ પટેલને "મગરમચ્છના આંસુ સારતા નેતા" ગણાવ્યા અને તેમના દાવાઓ પર પ્રશ્નો ઉઠાવ્યા. ગઢવીએ કહ્યું, "વિસાવદરના રસ્તાઓને પેરીસ જેવા બનાવવાની વાત કરનાર કિરીટ પટેલે અત્યાર સુધી રસ્તાઓનું સમારકામ કેમ ન કરાવ્યું?" તેમણે પટેલની આવકમાં થયેલા અસાધારણ વધારા પર પણ સવાલ ઉઠાવ્યા. ગઢવીના જણાવ્યા મુજબ, વર્ષ 2022-23માં પટેલની આવક 34.74 લાખ રૂપિયા હતી, જે 2023-24માં એકાએક વધીને 1.42 કરોડ રૂપિયા થઈ ગઈ. તેમણે આની પાછળ મગફળી કાંડ અથવા બ્લેક મનીની શક્યતા હોવાનો આરોપ લગાવ્યો અને ટોણો મારતા કહ્યું, "ભાજપ ખેડૂતોની આવક ડબલ કરવાની વાત કરે છે, પરંતુ અહીં તો નેતાઓની આવક ચાર ગણી થઈ રહી છે."   એફિડેવિટમાં ખોટી માહિતીનો આરોપ   ગઢવીએ દાવો કર્યો કે કિરીટ પટેલે ચૂંટણી એફિડેવિટમાં મહત્વની વિગતો છુપાવી છે. એફિડેવિટમાં પટેલે પોતાની પાસે કાર ન હોવાનું જણાવ્યું, જ્યારે વાસ્તવમાં તેમના નામે (GJ-18-BG-1602) નંબરની કાર રજિસ્ટર્ડ છે. આ ઉપરાંત, પટેલે પોતાની પત્નીને 33 લાખ રૂપિયાની લોન આપી હોવાનું જણાવ્યું, પરંતુ તેની કોઈ સ્પષ્ટતા એફિડેવિટમાં નથી. ગઢવીએ આક્ષેપ કર્યો કે, "શું પટેલ પોતાનું કાળું ધન પત્નીના નામે લોનના રૂપમાં ટ્રાન્સફર કરી રહ્યા છે?"   ચૂંટણી અધિકારીઓ પર સવાલ   ગઢવીએ ચૂંટણી અધિકારીઓની નિષ્ક્રિયતા પર પણ પ્રશ્નો ઉઠાવ્યા. તેમણે જણાવ્યું કે, "જો આવી ખોટી માહિતી કોઈ અન્ય પાર્ટીના ઉમેદવારે આપી હોત તો તેની ઉમેદવારી રદ થઈ ગઈ હોત. એફિડેવિટમાં ખોટી માહિતી આપવી એ ચૂંટણી કાયદાનું ઉલ્લંઘન છે, તો પછી ચૂંટણી અધિકારીઓ કેમ ચૂપ છે?" આપ આગામી દિવસોમાં ચૂંટણી પંચને લેખિત ફરિયાદ કરશે અને ACB તથા ED દ્વારા તપાસની માગણી કરશે.   ગઢવીએ કિરીટ પટેલના "હું ઝેર પી જઈશ, પણ ખેડૂતનો એક રૂપિયો નહીં લઉં" નિવેદન પર પણ આકરા પ્રહારો કર્યા. તેમણે કહ્યું, "ખેડૂતોને ખાતર નથી મળતું, મગફળીનો યોગ્ય ભાવ નથી, અને ખેડૂતો નફો નથી કમાતા. જ્યારે કિરીટ પટેલ કરોડો રૂપિયા કમાઈ રહ્યા છે." તેમણે વધુમાં આરોપ લગાવ્યો કે, મુખ્યમંત્રીની વિસાવદરમાં યોજાયેલી ભાજપની સભામાં સરકારી વાહનોનો દુરુપયોગ થયો હોવાની શંકા છે, જેની તપાસ આપની લીગલ ટીમ કરી રહી છે.   ગોપાલ ઇટાલિયાનો પ્રહાર   આપના નેતા ગોપાલ ઇટાલિયાએ પણ ખેડૂતોના મુદ્દે સરકાર અને કિરીટ પટેલ પર નિશાન સાધ્યું. તેમણે જણાવ્યું કે, "વાવણીના સમયે ખેડૂતોને ખાતર નથી મળતું, પરંતુ દારૂની હોમ ડિલિવરી થઈ જાય છે. સરકારની નીતિઓ ખેડૂતવિરોધી છે."    આ આક્ષેપોના જવાબમાં કિરીટ પટેલે પોતાના સહકારી ક્ષેત્રના ભૂતપૂર્વ કાર્યકાળનો ઉલ્લેખ કરતા જણાવ્યું કે, "મેં હંમેશાં સચ્ચાઈથી કામ કર્યું છે. સહકારી મંડળીમાં ખોટાં ધિરાણો ઉપાડી છેતરપિંડી કરનારાઓને જેલ ભેગા કરાવ્યા છે. મારી કમિટીએ ક્યારેય ખોટું કામ નથી કર્યું."   આમ આદમી પાર્ટીએ આ મામલે ચૂંટણી પંચ, ACB અને EDને ફરિયાદ કરવાની જાહેરાત કરી છે. બીજી તરફ, ભાજપ અને કિરીટ પટેલ આ આક્ષેપોને રાજકીય ષડયંત્ર ગણાવી રહ્યા છે. વિસાવદરની આ પેટાચૂંટણી હવે માત્ર રાજકીય લડાઈ જ નહીં, પરંતુ આક્ષેપો અને જવાબોનો અખાડો બની ગઈ છે. આગામી દિવસોમાં આ મુદ્દાઓ કઈ દિશામાં જશે, તે જોવું રસપ્રદ રહેશે.