તમિલનાડુમાં 'થલાપતિ' વિજયની એન્ટ્રીથી ખળભળાટ

Thalapathy Vijay: તમિલનાડુ વિધાનસભા ચૂંટણીના પરિણામોના શરૂઆતી વલણોએ સમગ્ર દેશનું ધ્યાન ખેંચ્યું છે. દક્ષિણ ભારતીય સિનેમાના સુપરસ્ટાર વિજય થલાપતિની નવનિર્મિત પાર્ટી 'તમિઝાગા વેત્રી કઝગમ' (TVK) એ રાજકારણમાં ધમાકેદાર પ્રવેશ કરતા સત્તાધારી પક્ષોના સમીકરણો બગાડી નાખ્યા છે. મત ગણતરીના તાજેતરના આંકડા મુજબ, માત્ર બે વર્ષ જૂની વિજયની પાર્ટી રાજ્યની કુલ 234 બેઠકોમાંથી 104 થી 109 બેઠકો પર આગળ ચાલી રહી છે.

શરૂઆતના વલણોમાં TVKની બાદશાહત
તમિલનાડુમાં સવારે મત ગણતરી શરૂ થતાની સાથે જ 'થલાપતિ' વિજયના સમર્થકોમાં ભારે ઉત્સાહ જોવા મળ્યો હતો. પ્રારંભિક વલણોમાં TVK પાર્ટી 109 બેઠકો પર લીડ મેળવીને સૌથી મોટા પક્ષ તરીકે ઉભરી આવી છે. આ વલણોએ સત્તાધારી DMK ને મોટો ઝટકો આપ્યો છે, જે હાલમાં માત્ર 55 બેઠકો પર આગળ છે. રાજકીય વિશ્લેષકો માને છે કે વિજયની લોકપ્રિયતા અને તેમની નવીનતમ રણનીતિએ DMK ના મતના પાયામાં ગાબડું પાડ્યું છે.

 

#WATCH | Tamil Nadu Assembly Elections | Visuals from outside the residence of TVK chief Vijay in Chennai.

Counting of votes for all 234 Assembly constituencies of the state will begin at 8 AM today. pic.twitter.com/9uAs0hCKdf

— ANI (@ANI) May 4, 2026

 

વિજયના નિવાસસ્થાને ઉજવણીનો માહોલ
આ શાનદાર પ્રદર્શનના સમાચાર ફેલાતા જ વિજય થલાપતિના નિવાસસ્થાનની બહાર ગતિવિધિઓ તેજ બની ગઈ છે. વાયરલ થયેલા વીડિયોમાં જોઈ શકાય છે કે અભિનેતાના ઘરની બહાર નેતાઓ અને ચાહકોના વાહનોની લાંબી કતારો લાગી છે. લોકો ફૂલોના ગુલદસ્તા લઈને વિજયને અભિનંદન આપવા માટે તેમના ઘરે પહોંચી રહ્યા છે. જોકે, અત્યાર સુધી વિજય દ્વારા પરિણામો અંગે કોઈ સત્તાવાર નિવેદન આપવામાં આવ્યું નથી.

 

In Thalapathy's House 🤩🤩🤩pic.twitter.com/PEmsUF0QGQ

— KERALA VIJAY FANS CLUB (@KVFC_Official) May 4, 2026

 

પરિવારનું સમર્થન અને આશીર્વાદ
વિજયના પિતા અને જાણીતા દિગ્દર્શક એસ.એ. ચંદ્રશેખર વહેલી સવારે મુરુગન મંદિરમાં પુત્રની જીત માટે પ્રાર્થના કરતા જોવા મળ્યા હતા. તેઓ વિજયની રાજકીય સફરમાં સતત માર્ગદર્શક તરીકે સાથે રહ્યા છે. ઘરના આંગણે શરૂ થયેલી આતશબાજી અને ઉજવણીના દ્રશ્યો સોશિયલ મીડિયા પર વાયરલ થઈ રહ્યા છે.

ફિલ્મ 'જન નાયકન' પણ ચર્ચામાં
રાજકારણની સાથે વિજયની ફિલ્મી કારકિર્દી પણ હાલ ચર્ચાનો વિષય બની છે. તેમની નવી ફિલ્મ 'જન નાયકન' સેન્સર બોર્ડના વિવાદને કારણે અટવાયેલી હતી. અહેવાલો અનુસાર, ચૂંટણીના આ પરિણામોની જાહેરાત બાદ, નિર્માતાઓ 8 મેના રોજ આ ફિલ્મને રિલીઝ કરવાનું વિચારી રહ્યા છે. તમિલનાડુના આ વલણો સ્પષ્ટ કરે છે કે વિજય થલાપતિ માત્ર સિનેમાના પડદા પર જ નહીં, પરંતુ વાસ્તવિક જીવનના રાજકારણમાં પણ એક પ્રભાવશાળી નેતા તરીકે પ્રસ્થાપિત થઈ રહ્યા છે. હવે જોવાનું એ રહેશે કે અંતિમ પરિણામોમાં TVK બહુમતીના આંકડા સુધી પહોંચી શકે છે કે નહીં.