રાજકોટમાં કેન્દ્રીય આરોગ્ય મંત્રી અને મુખ્યમંત્રીએ તિરંગાયાત્રાનો પ્રારંભ કરાવ્યો

સ્વતંત્રતા પર્વની ઉજવણીના ભાગરૂપે રાજકોટમાં તિરંગા યાત્રા યોજવામાં આવતાં શહેરીજનો દેશભક્તિના રંગમાં રંગાઈ ગયા હતા. મુખ્યમંત્રી ભૂપેન્દ્ર પટેલ, કેન્દ્રીય આરોગ્ય મંત્રી જે.પી. નડ્ડા અને કેન્દ્રીય જળશક્તિ મંત્રી સી.આર. પાટીલ તિરંગા યાત્રામાં જોડાયા હતા.

રેસકોર્સ પાસે સરદાર વલ્લભભાઈ પટેલની પ્રતિમાને મહાનુભાવોએ પુષ્પાંજલિ અર્પી હતી. ત્યારબાદ જનસભાને સંબોધી હતી. બહુમાળી ભવન ચોક પાસે સરદાર વલ્લભભાઈ પટેલની પ્રતિમાથી શરૂ થયેલી તિરંગા યાત્રા જ્યુબિલી ગાર્ડન ચોક ખાતે મહાત્મા ગાંધીની પ્રતિમા ખાતે સંપન્ન થઈ હતી.

તિરંગા યાત્રા પ્રસંગે કેન્દ્રીય આરોગ્ય મંત્રી જે..પી. નડ્ડાએ જણાવ્યું કે વિપક્ષ માટે બોલવું જરૂરી નથી. પણ કોંગ્રેસના લોકોને યાદ કરાવવું છે કે આઝાદીની લડાઈમાં સરદાર પટેલનું યોગદાન દેશ ભૂલે એમ નથી.  તમારામાં માત્ર એક જ પરિવાર છે. ચંદ્રશેખર આઝાદ, સુભાષચંદ્ર બોઝ સહિતના લોકોનાં યોગદાન તમે ભૂલી જાઓ છો. તમને માત્ર એક પરિવાર જ યાદ રહે છે.

સ્ટેચ્યૂ ઓફ યુનિટીમાં કોંગ્રેસનો કોઈ નેતા આજદિન સુધી આવ્યો નથી. આવા નાના વિચારવાળા લોકો ભારત જોડો યાત્રાની વાતો કરે છે. ભારત જોડવું હોય તો સરદાર પટેલને યાદ કરો. નકલી રાષ્ટ્ર ભક્તિ દેખાડવાવાળા લોકો રાજનીતિ માટે સમાજના ભાગલા પડાવનારા લોકો છે. દેશના ભાગ પાડવા ઈચ્છે છે. પણ લોકો સમજદાર છે.

મુખ્યમંત્રી ભૂપેન્દ્ર પટેલે જણાવ્યું કે તિરંગા પ્રત્યે આદર જાગે તે માટે હર ઘર તિરંગા અભિયાન હાથ ધરાયુ છે. તિરંગા યાત્રાનો રાજકોટથી પ્રારંભ થયો છે. અગાઉ આઝાદી કા અમૃત મહોત્સવ જેવા કાર્યક્રમો પણ યોજાઈ ચૂક્યા છે. જેનાથી લોકોમાં દેશભક્તિ જાગી છે. ગાંધીબાપુ અને લોખંડી પુરુષ સરદાર પટેલને વંદન. હાલ ગુજરાતના બે સપૂત નરેન્દ્ર મોદી અને અમિત શાહ દેશને આગળ ધપાવી રહ્યા છે.

તિરંગા યાત્રામાં રાજકોટની શાળાઓ અને કોલેજના વિદ્યાર્થીઓ તેમજ મોટી સંખ્યામાં નગરજનો જોડાયાં હતાં. બહુમાળી ભવન ખાતે ભાતીગળ સાંસ્કૃતિક કાર્યક્રમોએ આકર્ષણ જમાવ્યું હતું.

કણબી રાસ, માંડવી, મણીયારો રાસ, બેડા નૃત્ય,  પાંચાળનો ડોકા રાસ, નળકાંઠાના પઢારોનો મંજીરા રાસ, ડાંગી નૃત્ય, ઢાલ-તલવાર નૃત્ય, મિશ્રા રાસ, રાઠવા નૃત્ય છોટાઉદેપુર, માલધારીઓનો ગોફ રાસ,  ગરબા, ચોરવાડનું ટિપ્પણી નૃત્યએ રંગત જમાવી હતી.

તિરંગા યાત્રાનું ઠેર ઠેર સંગીતની સુરાવલીઓ, પરંપરાગત નૃત્યો તેમજ સાંસ્કૃતિક કાર્યક્રમથી સ્વાગત કરવામાં આવ્યું હતું. તિરંગા યાત્રા પસાર થઈ ત્યારે લોકોએ પુષ્પ વૃષ્ટિ કરીને રાષ્ટ્રધ્વજ પ્રત્યેનો આદર વ્યક્ત કર્યો હતો.