વાવ વિધાનસભા બેઠકની પેટાચૂંટણી બની ભાજપ-કોંગ્રેસ માટે પ્રતિષ્ઠાનો જંગ

વાવ વિધાનસભા બેઠકની પેટાચૂંટણી ભાજપ અને કોંગ્રેસ માટે પ્રતિષ્ઠાનો જંગ બની છે. લોકસભાના સાંસદ ગેનીબેન ઠાકોર અને વિધાનસભાના અધ્યક્ષ શંકર ચૌધરીની પેટાચૂંટણીમાં પરીક્ષા થશે. વાવ બેઠક પર ભાજપ, કોંગ્રેસ સહિત 21 ઉમેદવારોએ ફોર્મ ભર્યા છે. જેમાં ભાજપના માવજી પટેલ અને જામા ચૌધરીએ અપક્ષ ઉમેદવારી કરતાં ચૂંટણી રસપ્રદ બની છે. જો કે, ફોર્મ ખેંચવાની છેલ્લી તારીખ 30 ઓક્ટોબરે હરીફ ઉમેદવારોનું ચિત્ર સ્પષ્ટ થશે.

વાવ વિધાનસભા બેઠકની પેટાચૂંટણીમાં છેલ્લા દિવસે ભાજપ, કોંગ્રેસ સહિત 17 ઉમેદવારોએ ફોર્મ ભર્યા હતા. કોંગ્રેસે પૂર્વ ધારાસભ્ય ગુલાબસિંહ રાજપૂત અને ભાજપે વર્ષ 2022 ની વિધાનસભા ચૂંટણી હારી જનાર સ્વરૂપજી ઠાકોરને મેદાનમાં ઉતાર્યા છે. ભાજપ અગ્રણી માવજી પટેલે ભાજપ તેમજ અપક્ષ તરીકે જ્યારે સૂઈગામના ભાજપ અગ્રણી જામા ચૌધરીએ અપક્ષ ઉમેદવારી નોંધાવી છે. વાવ બેઠક પર 21 ઉમેદવારોએ ચૂંટણીના જંગમાં ઝુકાવ્યુ છે. વાવ બેઠક પર ત્રિપાંખિયો જંગ ખેલાય તો ભાજપને નુકસાન થાય તેમ હોવાથી ભાજપે કેટલાક અગ્રણીઓને સમજાવવાના પ્રયાસ શરૂ કર્યા છે.

કોણ છે સ્વરૂપજી ઠાકોર ?

વર્ષ 2022ની વિધાનસભાની સામાન્ય ચૂંટણીમાં સ્વરૂપજી ઠાકોર વાવ બેઠક પરથી ગેનીબેન ઠાકોર સામે ભાજપના ઉમેદવાર તરીકે ચૂંટણી લડ્યા હતા. તેઓ ગેનીબેન સામે 15,601 મતથી હારી ગયા હતા. સ્વરૂપજી ઠાકોર વાવ તાલુકાના બિયોક ગામના રહેવાસી છે અને તેઓ ઠાકોર સેનાના પ્રદેશ ઉપાધ્યક્ષ રહી ચૂક્યા છે. વર્ષ 2019ની લોકસભા ચૂંટણીમાં બનાસકાંઠા બેઠક પરથી સ્વરૂપજી ઠાકોર અપક્ષ ઉમેદવાર તરીકે ચૂંટણી લડ્યા હતા. લોકસભા ચૂંટણીમાં તેઓને 48 હજાર કરતાં વધુ મત મળ્યા હતા.

કોણ છે ગુલાબસિંહ રાજપૂત ?

ગુજરાત યુનિવર્સિટીમાં વર્ષ 2005 થી 2008 સુધી સેનેટ વેલફેર મેમ્બર, 2006 થી 2007 સુધી એનએસયુઆઈમાં પ્રદેશ મહામંત્રી, 2007 થી 2009 સુધી એનએસયુઆઈના પ્રદેશ ઉપપ્રમુખ અને 2009 થી 2011 સુધી ગુજરાત યુવક કોંગ્રેસના ડેલિગેટ, 2011 થી 2013 સુધી એનએસયુઆઈના પ્રદેશ અધ્યક્ષ, 2013 થી 2016 સુધી એનએસયુઆઈના રાષ્ટ્રીય મહામંત્રી, 2016 થી 2021 સુધી ગુજરાત યુવક કોંગ્રેસના અધ્યક્ષ અને વર્ષ 2019થી 2022 સુધી થરાદના ધારાસભ્ય રહી ચૂક્યા છે. વર્ષ 2022માં વિધાનસભાની સામાન્ય ચૂંટણીમાં થરાદ બેઠક પર શંકર ચૌધરી સામે હાર થઇ હતી. ગુલાબસિંહ સાંસદ ગેનીબેન ઠાકોરના ખાસ ટેકેદાર હોવાથી ગેનીબેનને હવે ગુલાબની બેનનું ઉપનામ આપવામાં આવ્યુ છે.

 

કોણ છે માવજી પટેલ?

માવજી પટેલ વર્ષ 1990થી 2017 સુધી વાવ અને થરાદ બેઠક પર ભાજપ, કોંગ્રેસ, જનતા દળ અને અપક્ષ તરીકે ચૂંટણી લડી ચૂક્યા છે. 1990માં વાવ બેઠક પર જનતા દળના ઉમેદવાર તરીકે ચૂંટણી લડ્યા હતા અને કોંગ્રેસના પરબત પટેલને હરાવી ધારાસભ્ય બન્યા હતા. 1998માં ભાજપની ટિકિટ પર ચૂંટણી લડ્યા હતા. જેમાં કોંગ્રેસના હેમાજી રાજપૂત સામે હાર્યા હતા. 2007માં ભાજપના પરબત પટેલ સામે અપક્ષ તરીકે ચૂંટણી લડ્યા હતા અને હાર્યા હતા. 2012માં થરાદ બેઠક પર ભાજપના પરબત પટેલ સામે કોંગ્રેસના ઉમેદવાર તરીકે ચૂંટણી લડ્યા હતા અને હાર્યા હતા.

વાવ વિધાનસભાનું જ્ઞાતિ સમીકરણ

વાવ બેઠકમાં ભાભર, વાવ અને સૂઈગામ તાલુકાના ગામોનો સમાવેશ થાય છે. જેમાં ઠાકોર સમાજના સૌથી વધુ 80 હજારથી વધુ મતદારો છે. ચૌધરી સમાજના 49 હજાર, અનુસૂચિત જાતિના 42 હજાર, રબારી સમાજના 25 હજાર, બ્રાહ્મણ સમાજના 18 હજાર, રાજપૂત સમાજના 18 હજાર, પ્રજાપતિ સમાજના 12 હજાર, મુસ્લિમ સમાજના 8 હજાર અને અન્ય 13 હજાર મતદારો છે.

લોકસભાની ચૂંટણીમાં વાવ વિધાનસભામાં ભાજપને લીડ મળી હતી

લોકસભાની ચૂંટણીમાં કોંગ્રેસના ગેનીબેન ઠાકોરે ભાજપના રેખાબેન ચૌધરીને હરાવ્યા હતા. ગેનીબેન ઠાકોર વાવના ધારાસભ્ય હોવા છતાં ભાજપના રેખાબેન ચૌધરીને વાવ વિધાનસભામાં 1,661 મતની સરસાઈ મળી હતી. વાવ બેઠક પર ગેનીબેનને 1,01,311 અને રેખાબેન ચૌધરીને 1,02,972 મત મળ્યા હતા. છેલ્લી 3 ચૂંટણીની વાત કરીએ તો વર્ષ 2022માં ગેનીબેન ઠાકોર ભાજપના સ્વરૂપજી ઠાકોર સામે 15,601 મતથી વિજેતા બન્યા હતા. વર્ષ 2017ની ચૂંટણીમાં ગેનીબેન ઠાકોર ભાજપના શંકર ચૌધરી સામે 6,655 મતથી વિજયી થયા હતા. જ્યારે વર્ષ 2012ની ચૂંટણીમાં કોંગ્રેસના ગેનીબેન ઠાકોર સામે ભાજપના શંકર ચૌધરી 11,911 મતથી વિજેતા બન્યા હતા. વાવ બેઠકના 37 વર્ષના ઈતિહાસમાં  ત્રણ વખત કોંગ્રેસ, એક વખત જનતા દળ અને બે વખત ભાજપે જીત મેળવી છે.