BJP ના ફાયર બ્રાન્ડ નેતાના રાજીનામાથી ખળભળાટ, કહ્યું મારું પગલું...

તેલંગાણાના ફાયરબ્રાન્ડ નેતા અને ગોશામહલના ધારાસભ્ય ટી રાજા સિંહે ભારતીય જનતા પાર્ટીમાંથી રાજીનામું આપી દીધું છે. તેમનો તેલંગાણા પાર્ટી નેતૃત્વ સાથે કેટલાક દિવસોથી વિવાદ ચાલી રહ્યો હતો. ભાજપ હાઇકમાન્ડે રાજ્ય ભાજપ પ્રમુખ પદ માટે એન રામચંદ્ર રાવના નામ પર સંમતિ આપી છે, જેનાથી તેઓ નારાજ છે. કહેવામાં આવી રહ્યું છે કે આનાથી નારાજ થઈને તેમણે પ્રદેશ પ્રમુખ બંદી સંજય કુમારને પોતાનું રાજીનામું મોકલી દીધું છે.

રાજા સિંહે આ રાજીનામાને લાખો કાર્યકરોનો અવાજ ગણાવ્યો અને કહ્યું કે આ નિર્ણય તેમના માટે પીડાદાયક છે, પરંતુ જરૂરી હતો. રાજા સિંહે ભાજપના તેલંગાણા રાજ્ય પ્રમુખ જી કિશન રેડ્ડીને લખેલા પત્રમાં કહ્યું કે એન રામચંદ્ર રાવની નિમણૂકથી પાર્ટી કાર્યકરો અને નેતાઓમાં ભારે નિરાશા ફેલાઈ છે. તેમણે આરોપ લગાવ્યો કે કેટલાક લોકોએ કેન્દ્રીય નેતૃત્વને ગેરમાર્ગે દોર્યું છે અને આ નિર્ણય લીધો છે, જે પક્ષના હિતને બદલે વ્યક્તિગત હિતથી પ્રેરિત છે.

ગોશામહલના ધારાસભ્ય રાજા સિંહે કહ્યું કે ભાજપ તેલંગાણામાં સરકાર બનાવવાની કગાર પર છે, પરંતુ ખોટી નેતાગીરીની પસંદગીને કારણે આ તક છીનવાઈ રહી હોય તેવું લાગે છે. રાજા સિંહે પોતાના જાહેર નિવેદનમાં સ્પષ્ટ કર્યું હતું કે ભાજપ છોડવા છતાં, તેઓ હિન્દુત્વની વિચારધારા અને ગોશામહલના લોકોની સેવા કરવા માટે પ્રતિબદ્ધ રહેશે.

તેમણે કહ્યું, "મારું પગલું વિચારધારા વિરુદ્ધ નથી, પરંતુ નેતૃત્વના નિર્ણયોની વિરુદ્ધ છે. હું હિન્દુ સમુદાયની સાથે મજબૂતીથી ઉભો રહીશ." તેમણે પાર્ટીના વરિષ્ઠ નેતૃત્વ, વડા પ્રધાન નરેન્દ્ર મોદી, જેપી નડ્ડા, અમિત શાહ અને બીએલ સંતોષને પણ આ મુદ્દા પર પુનર્વિચાર કરવા અપીલ કરી.

આ પણ વાંચો---

BJP ગુજરાત પ્રમુખના નામની આજે ગમે ત્યારે થઇ શકે જાહેરાત