તેજસ્વી યાદવની રાજભવન કૂચ વચ્ચે પટનામાં હાઈવોલ્ટેજ ડ્રામા! 300 મીટર બાદ એવું શું થયું?

Bihar Lok Bhawan March: બિહારમાં મતદાર યાદીઓના વિશેષ સઘન સુધારા એટલે કે SIR (Special Intensive Revision) ને લઈને વિપક્ષનો વિરોધ હવે રસ્તા પર વધુ ઉગ્ર બન્યો છે. ગુરુવારે RJD નેતા અને બિહાર વિધાનસભામાં વિપક્ષના નેતા તેજસ્વી યાદવની આગેવાનીમાં મહાગઠબંધને રાજભવન તરફ કૂચ કરી હતી. વિપક્ષે SIR પ્રક્રિયા અને ચૂંટણી પંચની ભૂમિકા પર સવાલ ઉઠાવતા મુખ્ય ચૂંટણી કમિશનર જ્ઞાનેશ કુમારને હટાવવાની માંગ કરી હતી. વિધાનસભા ચોકથી રાજભવન તરફ શરૂ થયેલી કૂચને રોકવા માટે પોલીસે અનેક સ્તરની બેરિકેડિંગ કરી હતી. વિરોધ દરમિયાન તેજસ્વી યાદવ સહિત કેટલાક નેતાઓ બેરિકેડ પાર કરવાનો પ્રયાસ કરતા જોવા મળ્યા હતા. આ દરમિયાન પોલીસ અને કાર્યકરો વચ્ચે નાની ઝપાઝપીની સ્થિતિ પણ સર્જાઈ હતી. જોકે, પોલીસે તેજસ્વી યાદવ અથવા અન્ય કેટલાક નેતાઓની ઔપચારિક અટકાયત કરવાનો ઇનકાર કર્યો હતો. કૂચ આશરે 300 મીટર આગળ પહોંચ્યા બાદ રોકાઈ ગઈ હતી. બાદમાં તેજસ્વી યાદવ અને કેટલાક અન્ય નેતાઓનું પ્રતિનિધિમંડળ રાજ્યપાલને મળ્યું અને SIR તથા મતદાર યાદી અંગે પોતાના મુદ્દાઓ રજૂ કર્યા. આ સાથે રાજભવન તરફની કૂચનો કાર્યક્રમ સમાપ્ત થયો હતો.

પાંચ સ્તરની બેરિકેડિંગ, RAF અને વોટર કેનન તૈનાત
વિરોધ પ્રદર્શનને ધ્યાનમાં રાખીને પટનામાં સુરક્ષા વ્યવસ્થા કડક કરવામાં આવી હતી. સંવેદનશીલ વિસ્તારોમાં પોલીસ અને RAFના જવાનો તૈનાત કરવામાં આવ્યા હતા. પાંચ સ્તરની બેરિકેડિંગ સાથે વોટર કેનન પણ તૈયાર રાખવામાં આવ્યા હતા. વહીવટીતંત્ર માટે સુરક્ષા ઉપરાંત ટ્રાફિક વ્યવસ્થા જાળવવાનો પણ પડકાર રહ્યો હતો. વિરોધ દરમિયાન RJD નેતાઓએ કેન્દ્ર સરકાર અને ચૂંટણી પંચ વિરુદ્ધ સૂત્રોચ્ચાર કર્યા હતા. તેજસ્વી યાદવે મુખ્ય ચૂંટણી કમિશનર જ્ઞાનેશ કુમારના રાજીનામાની માંગ કરી હતી. તેમણે આરોપ લગાવ્યો કે ચૂંટણી પંચે ભાજપના દબાણમાં આવીને SIRના બહાને ‘મત ચોરી’નો આશરો લીધો છે. 

‘લોકશાહીની હત્યા થઈ રહી છે’
RJD MLC સુનિલ સિંહે કહ્યું કે, “લોકશાહીની હત્યા થઈ રહી છે. અમે આનો વિરોધ કરી રહ્યા છીએ.” બીજી તરફ ભાઈ વીરેન્દ્રે કહ્યું કે કોઈ પણ પોલીસ દળ તેમને રોકી શકશે નહીં.

534 બ્લોકથી રાજભવન સુધી વિરોધ
મહાગઠબંધને SIR મુદ્દે તબક્કાવાર વિરોધ કાર્યક્રમ જાહેર કર્યો હતો. 7 ઓક્ટોબરે બિહારના તમામ 534 બ્લોક મુખ્યાલયોમાં વિરોધ કૂચ અને પુતળા દહન કરવામાં આવ્યું હતું. ત્યારબાદ જિલ્લા મુખ્યાલયોમાં પણ પ્રદર્શન યોજાયા અને હવે પટનામાં રાજભવન કૂચ કરવામાં આવી. પટનાની સાથે નાલંદા અને ભાગલપુરમાં પણ વિરોધનો માહોલ જોવા મળ્યો. નાલંદામાં કોંગ્રેસ કાર્યકરોએ જ્ઞાનેશ કુમારનું પુતળું બાળીને તેમને હટાવવાની માંગ કરી હતી, જ્યારે ભાગલપુરમાં પણ વિપક્ષી કાર્યકરો રસ્તા પર ઉતરી સૂત્રોચ્ચાર કર્યા હતા. બિહારમાં SIR વિવાદ, ચૂંટણી પંચ અને મતદાર યાદીનો મુદ્દો હવે રાજકીય વિરોધનું મોટું કેન્દ્ર બન્યો છે. રાજભવન મુલાકાત બાદ હવે મહાગઠબંધનની આગામી રણનીતિ અને ચૂંટણી પંચ તરફથી આ મુદ્દે આગળની કાર્યવાહી પર નજર રહેશે.