Tamil Nadu Vande Mataram Controversy: તમિલનાડુમાં અભિનેતા વિજયના નેતૃત્વમાં નવી સરકારની રચનાને હજુ ૨૪ કલાક પણ પૂર્ણ થયા નથી, ત્યાં જ સત્તાધારી ગઠબંધનમાં ભંગાણના સંકેતો દેખાઈ રહ્યા છે. મુખ્યમંત્રી તરીકે વિજયના શપથ ગ્રહણ સાથે જ તેમના મુખ્ય સાથી પક્ષ વિદુથલાઈ ચિરુતાઈગલ કચ્ચી (VCK) ના વડા થોલ થિરુમાવલવને સરકારની કાર્યશૈલી અને વિચારધારા સામે ગંભીર સવાલો ઉઠાવ્યા છે. આ રાજકીય વિવાદે રાજ્યમાં 'પરિવર્તન'ના નારા સાથે આવેલી નવી સરકાર માટે શરૂઆતમાં જ મુશ્કેલીઓ ઉભી કરી છે.
'વંદે માતરમ' વિવાદ: તમિલ અસ્મિતાના મુદ્દે સરકાર ઘેરાઈ વિવાદનું મુખ્ય કારણ શપથ ગ્રહણ સમારોહ દરમિયાન ગીતોના ક્રમની પસંદગી બની છે. થોલ થિરુમાવલવને જાહેરમાં ટીકા કરતા કહ્યું કે, તમિલનાડુની પરંપરા મુજબ કોઈપણ સરકારી કાર્યક્રમની શરૂઆત રાજ્ય ગીત "તમિલ થાઈ વાલથુ" થી કરવામાં આવે છે. જોકે, વિજયના શપથ ગ્રહણ સમારોહમાં "વંદે માતરમ" ને પ્રાધાન્ય આપવામાં આવ્યું હતું, ત્યારબાદ રાષ્ટ્રગીત અને છેલ્લે તમિલ રાજ્ય ગીત વગાડવામાં આવ્યું હતું.
VCK વડાના તીખો પ્રશ્ન VCK વડાએ તીખો પ્રશ્ન કરતા પૂછ્યું હતું કે, "શું આ ફેરફાર રાજ્યપાલની ઈચ્છા મુજબ કરવામાં આવ્યો હતો કે પછી તેમને ખુશ કરવા માટે?" તેમણે ચેતવણી આપી હતી કે 'વંદે માતરમ' જેવા ગીતો, જેના પર ઘણીવાર ધાર્મિક રંગ હોવાના આક્ષેપો થાય છે, તેને પ્રાધાન્ય આપવું એ ચિંતાજનક છે. આ પગલાથી વિજયને ટેકો આપનારા ધર્મનિરપેક્ષ પક્ષો અને સમર્થકોમાં ભારે અસ્વસ્થતા ફેલાઈ છે. તેમણે મુખ્યમંત્રી પાસે સ્પષ્ટતા માંગી છે કે શું ભવિષ્યમાં પણ તમિલ રાજ્ય ગીતની ગરિમા સાથે બાંધછોડ કરવામાં આવશે?
આર્થિક શ્વેતપત્ર પર વિવાદ: ₹10 લાખ કરોડના દેવા પર વળતો પ્રહાર શપથ લીધા બાદ મુખ્યમંત્રી વિજયે અગાઉની સરકાર પર નિશાન સાધતા નિવેદન આપ્યું હતું કે તમિલનાડુ પર ₹10 લાખ કરોડનું દેવું છે અને સરકારી તિજોરી ખાલી છે. આ નિવેદનની પણ તિરુમાવલવને આકરી નિંદા કરી છે. તેમણે કહ્યું કે માત્ર આંકડા બતાવીને જનતામાં ભય ફેલાવવાનો પ્રયાસ કરવામાં આવી રહ્યો છે. અર્થશાસ્ત્રના દૃષ્ટિકોણથી સમજાવતા VCK પ્રમુખે કહ્યું કે, "દેવાનું મૂલ્યાંકન હંમેશા રાજ્યના કુલ સ્થાનિક ઉત્પાદન (GSDP) ના પ્રમાણમાં થવું જોઈએ. તમિલનાડુનું વર્તમાન દેવું હજુ પણ ૧૫મા નાણા પંચ દ્વારા નિર્ધારિત મર્યાદામાં જ છે." તેમણે આક્ષેપ કર્યો કે વિજયનું આ નિવેદન માત્ર એક રાજકીય કવાયત છે અને ગભરાટ ફેલાવવાનો પ્રયાસ છે.
જાહેરાતોની પ્રશંસા પણ વિચારધારા પર શંકા જોકે, તમામ વિરોધ વચ્ચે તિરુમાવલવને મુખ્યમંત્રી વિજયની ત્રણ મહત્વની જાહેરાતોનું સ્વાગત કર્યું હતું. જેમાં વ્યસન મુક્તિના કડક પગલાં, મહિલા સુરક્ષા માટેની કટિબદ્ધતા અને 200 યુનિટ સુધી મફત વીજળી આપવાની યોજનાનો સમાવેશ થાય છે. આ લોકકલ્યાણકારી નિર્ણયોની પ્રશંસા કરતા તેમણે ઉમેર્યું કે, સરકારની નીતિઓ સારી હોઈ શકે છે પરંતુ તેની વિચારધારા પણ સ્પષ્ટ હોવી જોઈએ.
તમિલનાડુના રાજકારણમાં આંતરિક વિખવાદ થિરુમાવલવને અંતમાં જણાવ્યું હતું કે 'પરિવર્તન' ના નારા સાથે સત્તામાં આવેલા વિજયે હવે સાબિત કરવું પડશે કે તેમની સરકાર સંપૂર્ણપણે ધર્મનિરપેક્ષ રહેશે. સાથી પક્ષો અને જનતાના મનમાં ઉભી થયેલી શંકાઓ દૂર કરવી એ હવે મુખ્યમંત્રીની જવાબદારી છે. તમિલનાડુના રાજકારણમાં આંતરિક વિખવાદના આ પ્રથમ અહેવાલે આવનારા સમયમાં ગઠબંધનની મજબૂતી પર પ્રશ્નાર્થ ચિન્હો મૂક્યા છે. શપથ ગ્રહણના પ્રથમ દિવસે જ સર્જાયેલી આ કડવાશ નવી સરકાર માટે પડકારજનક સાબિત થઈ શકે છે.

'વંદે માતરમ' અને દેવાના મુદ્દે સાથી પક્ષ VCK આક્રમક

May 11, 2026 | 11:52 IST