વડોદરા શહેર ભાજપમાં સર્જીકલ સ્ટ્રાઈકઃ શિસ્તભંગ બદલ કોર્પોરેટર આશિષ જોષી સસ્પેન્ડ

ભારત-પાકિસ્તાન યુદ્ધની તણાવભરી પરિસ્થિતિ વચ્ચે વડોદરા શહેર ભાજપ પ્રમુખે સંગઠનને ઠીક કરવા સર્જીકલ સ્ટ્રાઈક કરીને સૌ કોઈને ચોંકાવી દીધા છે. શિસ્તભંગ બદલ શહેર ભાજપ પ્રમુખે વર્તમાન કોર્પોરેટર આશિષ જોષી અને પૂર્વ કોર્પોરેટર અરવિંદ પ્રજાપતિને પક્ષમાંથી સસ્પેન્ડ કરવાનો આદેશ કર્યો છે. આશિષ જોષીએ મ્યુનિસિપલ કમિશનર સાથે ઉદ્ધતાઈભર્યુ વર્તન કર્યુ હતુ તેમજ હરણી બોટ કાંડની પીડિત મહિલાઓને મુખ્યમંત્રીના કાર્યક્રમમાં મોકલવામાં તેમની ભૂમિકા હોવાથી કાર્યવાહી કરવામાં આવી છે. જ્યારે પૂર્વ કોર્પોરેટર અરવિંદ પ્રજાપતિએ વડાપ્રધાનની અણછાજતી પોસ્ટ કરતાં મામલો ચર્ચાસ્પદ બન્યો હતો. 

વડોદરામાં ઘણાં સમયથી ભાજપ સામે બાંયો ચઢાવનાર વોર્ડ નંબર-15 ના કોર્પોરેટર આશિષ જોષીને ભાજપમાંથી શહેર ભાજપ પ્રમુખ ડો. જયપ્રકાશ સોનીએ સસ્પેન્ડ કર્યા છે. આશિષ જોષીએ તત્કાલીન મ્યુનિસિપલ કમિશનર દિલીપ રાણા સાથે સામાન્ય સભામાં કાંસની સફાઇ બાબતે ઉદ્ધતાઈભર્યું વર્તન કર્યું હતું. આ ઉપરાંત અનેક વખત પક્ષ વિરૂદ્ધ નિવેદનો કરી સોશિયલ મીડિયામાં પોસ્ટ કરી હતી. શહેર ભાજપ પ્રમુખ દ્વારા આશિષ જોષીને નોટિસ પણ આપવામાં આવી હતી. પરંતુ, સંતોષકારક જવાબ નહી મળતાં કાર્યવાહી કરવામાં આવી છે.

તાજેતરમાં વડોદરા મહાનગરપાલિકા દ્વારા મુખ્યમંત્રીના હસ્તે વિકાસ કામોના લોકાર્પણ અને ખાતમુહૂર્ત કાર્યક્રમ યોજાયો હતો. આ કાર્યક્રમમાં હરણી બોટ કાંડની પીડિત બે મહિલાઓએ VMCના સત્તાધીશોની સાથે મુખ્યમંત્રીની પણ ફજેતી કરાવી હતી. બંને મહિલાઓને મોકલવામાં આશિષ જોષીનુ નામ આવ્યું હોવાની શહેરમાં ચર્ચા જાગી હતી. તેથી પ્રદેશ ભાજપની સૂચનાથી આશિષ જોષીને સસ્પેન્ડ કરવામાં આવ્યા છે.

આશિષ જોશીની સાથે વોર્ડ નંબર-2ના કોર્પોરેટર અરવિંદ પ્રજાપતિને પણ શિસ્તભંગ બદલ પક્ષમાંથી સસ્પેન્ડ કરવામાં આવ્યા છે. અરવિંદ પ્રજાપતિએ બે દિવસ અગાઉ વડાપ્રધાનનો સ્મોકિંગ કરતો ફોટો સોશિયલ મીડિયા પર પોસ્ટ કર્યો હતો. આ ફોટો પોસ્ટ કરવાના કારણે શહેરમાં મોટો વિવાદ થયો હતો. અરવિંદ પ્રજાપતિની વિવાદિત પોસ્ટના કારણે શહેર ભાજપ પ્રમુખે સક્રિય અને પ્રાથમિક સભ્યપદ રદ્દ કરી પક્ષમાંથી સસ્પેન્ડ કર્યા છે. ઉલ્લેખનીય છે કે, અગાઉ પૂર્વ મેયર નિલેશસિંહ રાઠોડ વિરૂદ્ધ પત્રિકા કાંડના મુખ્ય સૂત્રધાર પૂર્વ શાસક પક્ષના નેતા અલ્પેશ લિંબચિયાને પણ પાર્ટીમાંથી પાણીચું પકડાવી દેવામાં આવ્યું હતું.

આશિષ જોષીને નોટિસ આપી શિસ્તમાં રહેવા કહેવાયુ હતું

વડોદરા ભાજપના વોર્ડ નંબર-15 ના કોર્પોરેટર આશિષ જોશીને શહેર ભાજપ પ્રમુખ દ્વારા નોટિસ આપવામાં આવી હતી. આ નોટિસમાં સૂચના આપવામાં આવી હતી કે, વખતો વખત આપને પાર્ટી દ્વારા લેખિત અને મૌખિકમાં શિસ્તમાં રહેવા માટે જણાવાયું છે. આપના વર્તન અને વ્યવહારથી પાર્ટીની છબી બગડી રહી છે. આ બાબતે આપને કારણદર્શક નોટીસ આપવા છતાં વ્યવહારમાં સુધારો થયો નથી. કેટલીક જગ્યાએ પાર્ટીની છબી ખરડવામાં સહભાગી થયા હોય તેમ ખાતરી થયેલી છે. જે બાબતે પ્રદેશ અધ્યક્ષની સૂચનાથી આપને ભારતીય જનતા પાર્ટીના સક્રિય અને પ્રાથમિક સભ્યપદેથી બરખાસ્ત કરવામાં આવે છે.

હરણી બોટ કાંડના પીડિત પરિવારો સાથેની નિકટતા નડી

સૂત્રોના જણાવ્યા અનુસાર વોર્ડ નંબર-15 ના કોર્પોરેટર આશિષ જોશીને હરણી બોટકાંડ પીડિત પરિવારો સાથેની નીકટતા નડી છે. પૂર્વ કોર્પોરેટર અરવિંદ પ્રજાપતિએ પાર્ટીની શિસ્તને શોભે નહીં તેવી સોશિયલ મીડિયા પોસ્ટ કરી હતી. જેથી બંને કિસ્સામાં આકરી કાર્યવાહી કરવામાં આવી છે.

આશિષ જોષીએ મ્યુનિસિપલ કમિશનર સાથે તૂં તારી કરી હતી

VMCની સામાન્ય સભામાં રૂપારેલ કાંસનું પાણી ગંદકીને કારણે રોકાઇ જવા મુદ્દે ભાજપના કોર્પોરેટર આશિષ જોષીએ રજૂઆત કરી તત્કાલિક મ્યુનિસિપલ કમિશનર દીલીપ રાણાને ચીમકી આપી હતી કે, 'મુખ્યમંત્રીને તમારે ફરિયાદ કરવી હોય તો કરજો.' તે સમયે કમિશનરે શહેરનો પ્રશ્ન છે. મુખ્યમંત્રીને વચ્ચે લાવવાની જરૂર નથી તેમ કહેતા બંને વચ્ચે તૂં...તૂં...મેં...મેં... થતાં મામલો ચર્ચાસ્પદ બન્યો હતો.