મમતા બેનર્જીએ ભારતના 140 કરોડ લોકોના દિલ પર ઘા માર્યા છે: શાહ નવાઝ હુસેન

ઓપરેશન સિંદૂરને સફળ બનાવવા અને પાકિસ્તાનને વૈશ્વિક સ્તરે ઉજાગર કરવાના હેતુથી, ભારત સરકાર તેના સાંસદોનું એક પ્રતિનિધિમંડળ વિદેશમાં મોકલી રહી છે અને તેમાં તમામ પક્ષોના સાંસદોનો સમાવેશ થાય છે. અનેક જૂથોમાં વહેંચાયેલું આ પ્રતિનિધિમંડળમાં ભૂતપૂર્વ ક્રિકેટર અને TMS સાંસદ યુસુફ પઠાણના નામનો પણ સમાવેશ હતો. પરંતુ, પઠાણે વિદેશ જવાનો ઇનકાર કરી દીધો છે, એમ કહીને કે તે ઉપલબ્ધ નથી. ટીએમસી સાંસદે પોતાનું નામ પાછું ખેંચી લીધા બાદ ભાજપના રાષ્ટ્રીય પ્રવક્તા શાહનવાઝ હુસૈને પશ્ચિમ બંગાળના મુખ્યમંત્રી મમતા બેનર્જી પર જોરદાર નિશાન સાધ્યું. તેમણે કહ્યું કે, TMC સાંસદનું નામ પાછું ખેંચીને મમતા બેનર્જીએ 140 કરોડ ભારતીયોની ભાવનાઓને ઠેસ પહોંચાડી છે.

સોમવારે સમાચાર એજન્સી IANS સાથે વાત કરતા ભાજપના રાષ્ટ્રીય પ્રવક્તાએ જણાવ્યું કે, "મમતા બેનર્જીને શું થયું છે? તેઓ કોને ખુશ કરવાનો પ્રયાસ કરી રહ્યા છે? આ દેશના તમામ 140 કરોડ લોકો રાષ્ટ્ર અને આપણા સશસ્ત્ર દળોની બહાદુરી સાથે ઉભા છે. ઓપરેશન સિંદૂર દરમિયાન આપણા દળોની બહાદુરીની વિશ્વભરમાં પ્રશંસા થઈ રહી છે. ઓપરેશન સિંદૂર પછી રચાયેલા પ્રતિનિધિમંડળનો હેતુ ભારતની બહાદુરીને ઉજાગર કરવાનો અને પાકિસ્તાનને વૈશ્વિક મંચ પર ઉજાગર કરવાનો છે. તેમ છતાં, TMCને વાંધો છે કે, તેઓ તેમના સાંસદને પ્રતિનિધિમંડળનો ભાગ બનવા માંગતા નથી. દરેક દેશભક્ત મમતા બેનર્જીના નિર્ણયને દુર્ભાગ્યપૂર્ણ અને નિરાશાજનક માનશે."

પાકિસ્તાન વિશે પૂછવામાં આવેલા એક પ્રશ્નના જવાબમાં તેમણે કહ્યું કે, પાકિસ્તાને એકદમ શરમજનક કૃત્યો કર્યા છે. તેમણે ખાસ કરીને બધા ધાર્મિક સ્થળોને નિશાન બનાવવાનો પ્રયાસ કર્યો છે. જોકે, આપણી વાયુ સંરક્ષણ પ્રણાલીએ તેમના પ્રયાસોને નિષ્ફળ બનાવ્યા છે. પાકિસ્તાન એક દુષ્ટ રાષ્ટ્ર છે, તેના કાર્યોને ધર્મ સાથે કોઈ લેવા-દેવા નથી. એવું લાગે છે કે, પાકિસ્તાનની એકમાત્ર વિચારધારા આતંકવાદ છે. તેઓ ઇસ્લામનો વેશ ધારણ કરે છે અને આતંકનો માર્ગ અપનાવે છે. પાકિસ્તાન સમર્થિત આતંકવાદીઓએ પહેલગામમાં લોકોને તેમનો ધર્મ પૂછીને મારી નાખ્યા હતા. આપણી સેનાએ આનો યોગ્ય જવાબ આપ્યો હતો.

બાંગ્લાદેશ અને મ્યાનમારથી ગેરકાયદેસર ઇમિગ્રન્ટ્સની ઓળખ અને દસ્તાવેજ ચકાસણી માટે 30 દિવસની સમયમર્યાદા નક્કી કરવા અંગે શાહનવાઝ હુસૈને જણાવ્યું કે, ગૃહ મંત્રાલયે ખૂબ જ સારો નિર્ણય લીધો છે. ભારત કોઈ ધર્મશાળા નથી જ્યાં કોઈ પણ આવી શકે. જો કોઈ માન્ય દસ્તાવેજો સાથે આવે તો તેનું સ્વાગત છે. પરંતુ જે લોકો દસ્તાવેજો કે વિઝા વિના ભારતમાં પ્રવેશ કરશે તેમને ડિટેન્શન સેન્ટરમાં રાખવામાં આવશે.