છોટાઉદેપુર નપા પ્રમુખનો અનુસૂચિત જનજાતિ દાખલો રદ

છોટાઉદેપુર નગરપાલિકામાં રાજકીય હલચલ મચાવનાર એક મહત્વપૂર્ણ મામલામાં ભાજપના મહિલા નેતા અને વર્તમાન નગરપાલિકા પ્રમુખ મંજુલાબેન છત્રસિંહ રાઠવાના અનુસૂચિત જનજાતિ (ST)ના જાતિ પ્રમાણપત્રોને સત્તાવાર રીતે રદ કરવામાં આવ્યા છે. વડોદરાની વિભાગીય વિશ્લેષણ સમિતિએ સઘન તપાસ બાદ વર્ષ 1999 અને 2000માં જારી થયેલા બંને પ્રમાણપત્રોને અમાન્ય જાહેર કર્યા છે.

તપાસ દરમિયાન સમિતિએ મંજુલાબેન દ્વારા રજૂ કરાયેલા દસ્તાવેજો, શાળાકીય રેકોર્ડ અને અન્ય પુરાવાઓનું વિશ્લેષણ કર્યું હતું. તપાસમાં બહાર આવ્યું કે તેઓ મૂળ હિંદુ કોળી અથવા ઢેબરીયા કોળી સમાજ સાથે સંકળાયેલા છે. જેનો સમાવેશ અનુસૂચિત જનજાતિની સત્તાવાર યાદીમાં થતો નથી. આથી ST અનામતનો લાભ મેળવવા તેઓ કાયદેસર રીતે પાત્ર નથી તેવું સમિતિએ ઠરાવ્યું છે.

મંજુલાબેને આ ST દાખલાના આધારે વર્ષ 2025ની છોટાઉદેપુર નગરપાલિકાની ચૂંટણીમાં વોર્ડ નંબર-4 માંથી ઉમેદવારી નોંધાવી હતી. આ બેઠક અનુસૂચિત જનજાતિ મહિલા માટે અનામત રાખવામાં આવી હતી. ચૂંટણીમાં જીત્યા બાદ તેઓ નગરપાલિકા પ્રમુખ બન્યા હતા. હવે ST નો દાખલો રદ થતાં તેમના કાઉન્સિલર પદ અને પ્રમુખપદ બંને પર કાયદાકીય સંકટ ઊભું થયું છે.

સમિતિએ માત્ર દાખલા રદ કર્યા નથી પરંતુ બંને પ્રમાણપત્રોને જપ્ત કરવાનો પણ આદેશ આપ્યો છે. આ ઉપરાંત સંબંધિત દસ્તાવેજો પર રદ અને જપ્ત કરાયેલ હોવાનું નોંધાવવા પ્રક્રિયા શરૂ કરવામાં આવી છે.

આ મામલે ગુજરાત અનુસૂચિત જાતિ, અનુસૂચિત આદિજાતિ અને અન્ય પછાતવર્ગ અધિનિયમ-2018 હેઠળ નિયમ મુજબ કાર્યવાહી કરવા વહીવટી તંત્રને સૂચના આપવામાં આવી છે. આગામી સમયમાં આ મુદ્દે નગરપાલિકાના વહીવટ તેમજ સ્થાનિક રાજકારણમાં વધુ ઉથલપાથલ સર્જાય તેવી શક્યતા વ્યક્ત કરવામાં આવી રહી છે.

ભાજપે SP, BSP અને અપક્ષ સભ્યોના ટેકાથી સત્તા મેળવી હતી

એક વર્ષ અગાઉ યોજાયેલી છોટાઉદેપુર નગરપાલિકાની ચૂંટણીમાં કુલ 28 બેઠકોમાંથી ભાજપના 8, સમાજવાદી પાર્ટીના 6, બસપાના 4, સર્વ સમાજ પાર્ટીના 4, કોંગ્રેસના 1 અને 5 અપક્ષ ઉમેદવારો ચૂંટાયા હતા. સમાજવાદી પાર્ટી, બહુજન સમાજ પાર્ટી અને અપક્ષ સભ્યોના ટેકાથી ભાજપે સત્તા મેળવી હતી. બાદમાં પાલિકા પ્રમુખ તરીકે મંજુલાબેન કિશનસિંહ કોલી બિનહરીફ ચૂંટાયા હતા. 27 વર્ષ બાદ ભાજપે છોટાઉદેપુર નગરપાલિકામાં સત્તા મેળવી હતી. હવે પાલિકા પ્રમુખનું STનું પ્રમાણપત્ર રદ થતાં નવું રાજકીય સંકટ ઉભું થયું છે.