સંસદમાં કરોડપતિઓનું રાજ, ADR રિપોર્ટમાં ખુલાસો!

Rajya Sabha MPs lead in average wealth: સંસદમાં કરોડપતિ સાંસદોની સંખ્યા સતત વધી રહી છે. વર્ષ 2024માં, લોકસભાના 93% સાંસદો કરોડપતિ છે. જ્યારે રાજ્યસભાના સાંસદો સરેરાશ સંપત્તિની દ્રષ્ટિએ ઘણા વધુ ધનિક છે. રાજ્યસભાના સાંસદોની સરેરાશ સંપત્તિ ₹115.25 કરોડ છે. લોકસભાના સાંસદોની સરેરાશ સંપત્તિ ₹46.34 કરોડ કરતાં લગભગ અઢી ગણી છે.

રાજકારણની સાથે દેશની સંસદમાં સંપત્તિના આંકડા નવા રેકોર્ડ બનાવી રહ્યા છે. લોકસભામાં કરોડપતિ સાંસદોની સંખ્યા સતત વધી રહી છે. ત્યારે રાજ્યસભાના સાંસદો સરેરાશ સંપત્તિની દ્રષ્ટિએ લોકસભાના સાંસદો કરતા ઘણા આગળ છે.

રાજ્યસભાના સાંસદોની સંપત્તિનું ચિત્ર
એસોસિએશન ફોર ડેમોક્રેટિક રિફોર્મ્સ (ADR) ના અહેવાલ મુજબ વર્તમાન રાજ્યસભાના સાંસદોની સરેરાશ જાહેર સંપત્તિ ₹115.25 કરોડ છે. જ્યારે 2024માં ચૂંટાયેલા લોકસભાના સાંસદોની સરેરાશ સંપત્તિ ₹46.34 કરોડ છે. એટલે કે બંને ગૃહોના સાંસદો વચ્ચે સરેરાશ સંપત્તિમાં આશરે ₹69 કરોડનો તફાવત છે. આનો અર્થ એ થયો કે, રાજ્યસભાના સાંસદો લોકસભાના સાંસદો કરતાં લગભગ અઢી ગણા વધુ ધનિક છે.

લોકસભામાં કરોડપતિ સાંસદોની સંખ્યા વધી
લોકસભામાં કરોડપતિ સાંસદોની સંખ્યા સતત વધી રહી છે. વર્ષ 2024ની ચૂંટણીમાં ચૂંટાયેલા 543 સાંસદોમાંથી 504 કરોડપતિ છે. આનો અર્થ એ થયો કે દરેક 100 સાંસદોમાંથી 93 સાંસદોએ 1 કરોડ રૂપિયાથી વધુની સંપત્તિ જાહેર કરી છે. છેલ્લી ચાર લોકસભા ચૂંટણીના ડેટા પર નજર કરીએ તો સાંસદોની સંપત્તિમાં સતત વધારો થતો દેખાય છે. 2009માં, ફક્ત 58% સાંસદો કરોડપતિ હતા. આ આંકડો 2014માં 82%, 2019માં 88% અને 2024માં 93% થયો. એટલે કે 15 વર્ષમાં કરોડપતિ સાંસદોની ટકાવારીમાં 35 પોઈન્ટનો વધારો થયો છે.

રાજ્યસભાના સાંસદોની સંપત્તિનો ડેટા
₹10 કરોડથી વધુ: 97 સાંસદો (42%)
₹5 કરોડથી 10 કરોડ વચ્ચે: 40 સાંસદો (17%)
₹1 કરોડથી 5 કરોડ વચ્ચે: 69 સાંસદો (30%)

રાજ્યસભા શા માટે વધુ ધનિક છે?
રાજ્યસભાના 226 વર્તમાન સાંસદોની કુલ સંપત્તિ ₹26,047 કરોડ છે. લોકસભામાં કરોડપતિ સાંસદોની સંખ્યા વધુ છે. પરંતુ સરેરાશ સંપત્તિની દ્રષ્ટિએ રાજ્યસભા ઘણી આગળ છે. રાજ્યસભાના સાંસદોની સરેરાશ સંપત્તિ ₹115.25 કરોડ છે. જ્યારે લોકસભાના સાંસદોની સરેરાશ સંપત્તિ ₹46.34 કરોડ છે.

રાજ્યસભામાં અનેક પક્ષોના સાંસદોની સરેરાશ સંપત્તિ ખૂબ ઊંચી છે. બસપાના ત્રણ સાંસદોની સરેરાશ સંપત્તિ ₹1841.39 કરોડ છે. આ પછી, સમાજવાદી પાર્ટીના સાંસદોની સરેરાશ સંપત્તિ ₹399.71 કરોડ, TDPના સાંસદો ₹251.95 કરોડ, YSRCPના સાંસદો ₹170.88 કરોડ, NCPના સાંસદો ₹149.35 કરોડ અને કોંગ્રેસના સાંસદોની સરેરાશ સંપત્તિ ₹130.37 કરોડ છે.

ભાજપના રાજ્યસભાના સાંસદોની સરેરાશ સંપત્તિ ₹76.46 કરોડ છે. AITCના રાજ્યસભાના 9 સાંસદોની સરેરાશ સંપત્તિ ₹16.72 કરોડ અને DMKના 8 રાજ્યસભાના સાંસદોની સરેરાશ સંપત્તિ ₹11.90 કરોડ છે.

લોકસભામાં કયા પક્ષના સાંસદો સૌથી ધનિક?
લોકસભામાં સરેરાશ સંપત્તિની દ્રષ્ટિએ તેલુગુ દેશમ પાર્ટી (TDP) આગળ છે. પક્ષના 16 સાંસદોની સરેરાશ સંપત્તિ ₹442.26 કરોડ છે. ત્યારબદ, ભાજપના 240 સાંસદોની સરેરાશ સંપત્તિ 50.04 કરોડ રૂપિયા, DMKના 22 સાંસદો 31.22 કરોડ રૂપિયા, કોંગ્રેસના 99 સાંસદો 22.93 કરોડ રૂપિયા, AITCના 29 સાંસદો 17.98 કરોડ રૂપિયા, સમાજવાદી પાર્ટીના 37 સાંસદોની સરેરાશ સંપત્તિ 15.24 કરોડ રૂપિયા છે.

અનેક પક્ષોમાં 100 ટકા કરોડપતિ સાંસદ
લોકસભામાં ઘણી પાર્ટીઓના તમામ વિજેતા ઉમેદવારો કરોડપતિ છે. TDP, JDU, શિવસેના (UBT), શિવસેના, લોક જનશક્તિ પાર્ટી (રામવિલાસ), RLD, આમ આદમી પાર્ટી, IUML અને NCP ના સાંસદો બધા કરોડપતિ છે. ભાજપના 240 માંથી 227 સાંસદો (95%), ડીએમકેના 22 માંથી 21 સાંસદો (95%), કોંગ્રેસના 99માંથી 92 સાંસદો (93%), એઆઈટીસીના 29માંથી 27 સાંસદો (93%) અને સમાજવાદી પાર્ટીના 37 માંથી 34 સાંસદો (92%) કરોડપતિ છે.

સંસદમાં સૌથી ધનિક સાંસદ કોણ?
લોકસભાના સૌથી ધનિક સાંસદ ડૉ. ચંદ્રશેખર પેમ્માસાની (TDP) છે. તેમણે જાહેર કરેલી સંપત્તિ ₹5,705 કરોડથી વધુ છે. બીજા સ્થાને ભાજપના કોંડા વિશ્વેશ્વર રેડ્ડી છે. જેમની સંપત્તિ ₹4,568 કરોડથી વધુ છે. ત્રીજા સ્થાને ભાજપના નવીન જિંદાલ છે. જેમની સંપત્તિ ₹1,241 કરોડથી વધુ છે. તેમના પછી ટીડીપીના પ્રભાકર રેડ્ડી વેમીરેડ્ડી અને ભાજપના સી.એમ. રમેશ છે.

રાજ્યસભાના સૌથી ધનિક સાંસદ ડૉ. બંદી પાર્થસારથી (BRS) છે. તેમણે જાહેર કરેલી સંપત્તિ ₹5,300 કરોડથી વધુ છે. બીજા સ્થાને ભાજપના રાજિંદર ગુપ્તાની સંપત્તિ ₹5,053 કરોડથી વધુ છે. રાજિંદર ગુપ્તા તાજેતરમાં AAP છોડીને ભાજપમાં જોડાયા છે. ત્રીજા સ્થાને YSRCPના અલ્લા અયોધ્યા રામી રેડ્ડી છે. જેમની સંપત્તિ ₹2,577 કરોડથી વધુ છે.

સંસદનું બદલાતું આર્થિક ચિત્ર
આંકડા સ્પષ્ટપણે દર્શાવે છે કે, સંસદમાં શ્રીમંત પ્રતિનિધિઓની સંખ્યા સતત વધી રહી છે. લોકસભામાં કરોડપતિ સાંસદોની ટકાવારી રેકોર્ડ સ્તરે પહોંચી ગઈ છે. જ્યારે રાજ્યસભાના સાંસદો પાસે સરેરાશ કરતાં ઘણી વધારે સંપત્તિ છે. આ સમજાવે છે કે, લોકસભામાં કરોડપતિઓની સંખ્યા વધુ હોવા છતાં, રાજ્યસભાના સાંસદો સરેરાશ સંપત્તિના આધારે વધુ શ્રીમંત દેખાય છે. આ ચિત્ર આજની ભારતીય સંસદની નવી વાસ્તવિકતાને પણ પ્રતિબિંબિત કરે છે.