Rahul Gandhi Response To BJP Criticism: કોંગ્રેસ નેતા અને લોકસભામાં વિપક્ષના નેતા રાહુલ ગાંધીએ તેમની માતા તથા કોંગ્રેસના વરિષ્ઠ નેતા સોનિયા ગાંધીના પુસ્તક ‘Belonging: A Journey of Love’ના વિમોચન પ્રસંગે ભાજપ અને રાષ્ટ્રીય સ્વયંસેવક સંઘ (RSS) પર આકરા પ્રહાર કર્યા છે. તેમના અંગત નિવેદનને લઈને ભાજપના નેતાઓ દ્વારા કરવામાં આવેલી ટીકા બાદ રાહુલ ગાંધીએ સોશિયલ મીડિયા પર વળતો જવાબ આપ્યો છે. તેમણે કહ્યું કે ભાજપ અને RSSના સમર્થકોના હૃદયમાં ભય, ગુસ્સો અને નફરતનું જાળું વણાઈ ગયું છે, જેના કારણે તેઓ પ્રેમ અને પોતાનાપણાની લાગણી વ્યક્ત કરી શકતા નથી. રાહુલ ગાંધીએ પોતાની પોસ્ટમાં લખ્યું કે એક સાચા હિન્દુ તરીકે તેમની ફરજ છે કે તેઓ લોકોને આ નફરત અને ભયના જાળામાંથી બહાર આવવામાં મદદ કરે, જેથી તેઓ પણ જીવનમાં પ્રેમ, પોતાનાપણું અને આનંદનો અનુભવ કરી શકે. પોતાની વાતના અંતે તેમણે ‘સત્યમ શિવમ સુંદરમ’નો ઉલ્લેખ કર્યો હતો. આ પોસ્ટ સાથે રાહુલ ગાંધીએ ભગવાન શિવ અને માતા પાર્વતી નંદી પર સવાર હોય તેવી તસવીર પણ શેર કરી હતી. આ શિલ્પ કર્ણાટકના પ્રસિદ્ધ હોયસલેશ્વર મંદિરની બાહ્ય દીવાલ પર જોવા મળે છે.
માતા-પિતાના સંબંધ અંગેના નિવેદનથી શરૂ થયો વિવાદ
આ સમગ્ર વિવાદની શરૂઆત સોમવારે સોનિયા ગાંધીના પુસ્તક વિમોચન પ્રસંગે રાહુલ ગાંધીના એક અંગત નિવેદનથી થઈ હતી. તેમણે માતા સોનિયા ગાંધી અને પિતા રાજીવ ગાંધી વચ્ચેના પ્રેમાળ સંબંધોનો ઉલ્લેખ કરતાં કહ્યું હતું કે તેમના ઘરમાં ભોજન સમયે તેમની માતા ઘણીવાર પિતાના ખોળામાં બેસતાં હતાં. બાળપણમાં તેમને લાગતું હતું કે દરેક પરિવારમાં આવું જ થતું હશે. રાહુલ ગાંધીના આ નિવેદનનો વીડિયો અને અંશ સોશિયલ મીડિયા પર વાયરલ થયા હતા. ત્યારબાદ ભાજપના કેટલાક નેતાઓએ તેમના નિવેદનની ટીકા કરી હતી. આ મુદ્દે રાજકીય ચર્ચા પણ શરૂ થઈ હતી.
હિમંતા બિસ્વા શર્માએ પણ સાધ્યું નિશાન
આસામના મુખ્યમંત્રી અને ભાજપના નેતા હિમંતા બિસ્વા શર્માએ પણ રાહુલ ગાંધીના નિવેદન પર પ્રતિક્રિયા આપી હતી. તેમણે સોશિયલ મીડિયા પ્લેટફોર્મ X પર લખ્યું હતું કે, “માફ કરશો મેડમ, તમારા જીવનના આટલા ખાસ દિવસે પણ તેઓ તમને શરમથી બચાવી શક્યા નહીં.” શર્માએ વધુમાં કટાક્ષ કરતાં કહ્યું હતું કે દેશ આ વાત ઘણા સમય પહેલાં સમજી ગયો હતો અને આ પ્રોડક્ટ હવે લોન્ચ કે ફરીથી લોન્ચ કરવા લાયક નથી. તેમના આ નિવેદન બાદ કોંગ્રેસ અને ભાજપ વચ્ચે રાજકીય નિવેદનબાજી વધુ તેજ બની હતી.
રાજીવ ગાંધીની હત્યા બાદ બદલાઈ ગયું હતું સોનિયા ગાંધીનું જીવન
પુસ્તક વિમોચન પ્રસંગે રાહુલ ગાંધીએ માતા સોનિયા ગાંધીના જીવનમાં આવેલા મોટા પરિવર્તનનો પણ ઉલ્લેખ કર્યો હતો. તેમણે જણાવ્યું હતું કે પૂર્વ વડાપ્રધાન રાજીવ ગાંધીની હત્યાએ સોનિયા ગાંધીનું જીવન સંપૂર્ણપણે બદલી નાખ્યું હતું. રાહુલ ગાંધીના જણાવ્યા મુજબ, રાજીવ ગાંધીની હત્યા પહેલાં સોનિયા ગાંધી ખૂબ જ મિલનસાર અને ખુશમિજાજ સ્વભાવ ધરાવતાં હતાં. પરંતુ આ દુર્ઘટના બાદ તેમના વ્યક્તિત્વમાં મોટું પરિવર્તન આવ્યું અને તેઓ પહેલાંની સરખામણીએ વધુ એકાંતપ્રિય બની ગયાં હતાં. સોનિયા ગાંધીના પુસ્તક વિમોચન પ્રસંગે શરૂ થયેલી આ ચર્ચા હવે વ્યક્તિગત નિવેદનથી આગળ વધીને ભાજપ અને કોંગ્રેસ વચ્ચેના રાજકીય ઘર્ષણનું નવું કારણ બની છે. રાહુલ ગાંધીના નિવેદન પર ભાજપની ટીકા અને તેના જવાબમાં કોંગ્રેસ નેતાના પ્રહાર બાદ આ મુદ્દો રાજકીય વર્તુળોમાં ચર્ચાનો વિષય બન્યો છે.