PMનું વર્ચ્યુઅલ સંબોધન અને મજબૂત ભાગીદારી પર ભાર

પ્રધાનમંત્રી નરેન્દ્ર મોદીએ મલેશિયામાં આયોજિત આસિયાન સમિટ 2025માં વર્ચ્યુઅલ માધ્યમથી સંબોધન કર્યું હતું. તેમણે સંબોધન દરમિયાન આસિયાનના સફળ અધ્યક્ષપદ માટે મલેશિયાના PM અનવર ઈબ્રાહિમને શુભેચ્છા પાઠવી હતી. PM મોદીએ ભારપૂર્વક જણાવ્યું હતું કે, ભારત અને આસિયાન એકત્રિત થઈને વિશ્વની ચોથા ભાગની જનસંખ્યાનું પ્રતિનિધિત્વ કરે છે. તેમણે કહ્યું કે, 'અમે માત્ર ભૌગોલિક રીતે જ નહિ પણ ઐતિહાસિક સંબંધોના કારણે પણ એકબીજા સાથે જોડાયેલા છીએ.' PM મોદીના મતે ભારત અને આસિયાનના મિત્રો સાથે મળીને કામ કરવાથી વૈશ્વિક સ્તરે સકારાત્મક અસર પડી રહી છે.

ભારત અને આસિયાનની ભાગીદારી: વૈશ્વિક સ્થિરતાનો આધાર

વર્તમાન સમયની અનિશ્ચિતતાઓ વચ્ચે પણ ભારત અને આસિયાન વચ્ચેની 'કોમ્પ્રિહેન્સિવ સ્ટ્રેટેજિક પાર્ટનરશિપ'માં સતત પ્રગતિ થઈ છે. PM મોદીએ આ ભાગીદારીને ખૂબ જ મજબૂત ગણાવતા કહ્યું હતું કે, 'અમારી આ મજબૂત ભાગીદારી વૈશ્વિક સ્થિરતા અને વિકાસનું સશક્ત આધાર બનીને વિકસી રહી છે' આસિયાન સમિટ 2025ની આ વર્ષની થીમ 'ઈન્ક્લૂસિવિલિટી એન્ડ સસ્ટેનિબિલિટી' છે, જે આ પ્રદેશની જરૂરિયાતોને પ્રતિબિંબિત કરે છે. ભારત અને આસિયાન આ થીમ પર સહયોગ વધારવા પ્રતિબદ્ધ છે.

આ પણ વાંચો: એસ જયશંકર ASEAN સમિટ દરમિયાન લાઓસના વડા પ્રધાનને મળ્યા

ભારતનું પ્રતિનિધિત્વ અને વૈશ્વિક નેતાઓનો જમાવડો

આસિયાન આ ક્ષેત્રના સૌથી પ્રભાવશાળી સમૂહોમાંથી એક ગણવામાં આવે છે, જેમાં વૈશ્વિક રાજ નેતાઓનો જમાવડો થાય છે. આસિયાન સમિટ ઉપરાંત, કેન્દ્રીય વિદેશ મંત્રી એસ. જયશંકર 27 ઓક્ટોબરના રોજ કુઆલાલંપુરમાં યોજાનારા 20મા પૂર્વ એશિયા શિખર સંમેલનમાં PM મોદી તરફથી ભારતનું પ્રતિનિધિત્વ કરશે. પૂર્વ એશિયા સંમેલનમાં ભારત, ચીન, જાપાન, કોરિયા ગણરાજ્ય, ઓસ્ટ્રેલિયા, ન્યૂઝીલેન્ડ, અમેરિકા અને રશિયા જેવા મોટા દેશો સામેલ છે. આ બેઠકોમાં વૈશ્વિક સ્થિરતા, વિકાસ અને પ્રાદેશિક સહયોગના મુદ્દાઓ પર ચર્ચા કરવામાં આવશે.