સંસદના શિયાળુ સત્રમાં સત્તાપક્ષ અને વિપક્ષ વચ્ચે ચાલેલી તીખી ખેંચતાણ અને વિરોધ પ્રદર્શનો બાદ, શુક્રવારે બંને ગૃહોની કાર્યવાહી અનિશ્ચિતકાળ માટે સ્થગિત કરવામાં આવી હતી. જોકે, આ ગરમાગરમી બાદ લોકસભા સ્પીકર ઓમ બિરલાના કક્ષમાંથી એક એવી તસવીર સામે આવી છે જે ભારતીય લોકશાહીની પરિપક્વતા દર્શાવે છે. આ બેઠકમાં વડાપ્રધાન નરેન્દ્ર મોદી, રક્ષા મંત્રી રાજનાથ સિંહ અને વાયનાડના સાંસદ પ્રિયંકા ગાંધી વાડ્રા એકસાથે બેઠેલા જોવા મળ્યા હતા.
પરંપરા અને પરિવર્તન: સામાન્ય રીતે સત્રના સમાપન બાદ સ્પીકર દ્વારા તમામ પક્ષના નેતાઓ માટે ચા-પાર્ટીનું આયોજન કરવામાં આવે છે. અગાઉ ૨૧ ઓગસ્ટ, ૨૦૨૫ના રોજ ચોમાસું સત્રના અંતે જ્યારે આવી બેઠક યોજાઈ હતી, ત્યારે રાહુલ ગાંધી સહિતના વિપક્ષી નેતાઓએ તેનો બહિષ્કાર કર્યો હતો. જોકે, આ વખતે પ્રિયંકા ગાંધીએ આ પરંપરામાં ભાગ લઈને સૌનું ધ્યાન ખેંચ્યું હતું. તેમની સાથે સમાજવાદી પાર્ટીના ધર્મેન્દ્ર યાદવ, NCP (શરદ પવાર જૂથ)ના સુપ્રિયા સુલે અને ડી. રાજા જેવા વિપક્ષી ચહેરાઓ પણ હાજર રહ્યા હતા.
ખાસ બેઠક વ્યવસ્થા: આ મુલાકાતમાં સૌથી વધુ ચર્ચા પ્રિયંકા ગાંધીની બેઠક વ્યવસ્થાની થઈ રહી છે. પ્રથમવાર સાંસદ બનેલા પ્રિયંકા ગાંધી રક્ષા મંત્રી રાજનાથ સિંહની બરાબર બાજુની સીટ પર બેઠા હતા અને તેમની નજીક જ વડાપ્રધાન મોદી બિરાજમાન હતા. રાજકીય મતભેદો ભૂલીને વિપક્ષી નેતાઓ સત્તાધારી પક્ષના નેતાઓ સાથે હળવાશની પળોમાં ચાની ચુસ્કી લેતા જોવા મળ્યા હતા.
ગડકરી સાથેની મુલાકાત પણ રહી ચર્ચામાં: આ પહેલા ગુરુવારે ગૃહમાં એક રસપ્રદ કિસ્સો બન્યો હતો. પ્રિયંકા ગાંધીએ રજૂઆત કરી હતી કે કેન્દ્રીય મંત્રી નીતિન ગડકરી તેમને મળવાનો સમય નથી આપતા. આ સાંભળી ગડકરીએ તરત જ સ્મિત સાથે ઉત્તર આપ્યો કે, "મારો દરવાજો હંમેશા ખુલ્લો છે," અને તેમને ઓફિસમાં આમંત્રણ આપ્યું હતું. બાદમાં પ્રિયંકા ગાંધીએ ગડકરીની મુલાકાત લીધી હતી, જ્યાં કેન્દ્રીય મંત્રીએ તેમને આતિથ્ય સત્કાર સાથે સ્વાદિષ્ટ ભોજન પણ કરાવ્યું હતું.
સંસદમાં આક્ષેપ-પ્રતિઆક્ષેપ વચ્ચે પણ જ્યારે નેતાઓ વ્યક્તિગત રીતે સૌહાર્દપૂર્ણ વાતાવરણમાં મળે છે, ત્યારે તે લોકશાહી માટે એક હકારાત્મક સંદેશ આપે છે. વડાપ્રધાન મોદીએ અગાઉ વિપક્ષી યુવા નેતાઓ વિશે કરેલી ટિપ્પણીઓ બાદ પ્રિયંકા ગાંધીની આ સક્રિય હાજરી રાજકીય ગલિયારાઓમાં ચર્ચાનો વિષય બની છે.

રાહુલએ તોડેલી પરંપરા પ્રિયંકાએ નિભાવી

લોકસભા અનિશ્ચિતકાળ માટે સ્થગિત: સ્પીકરના કક્ષમાં પીએમ મોદી અને પ્રિયંકાની ખાસ બેઠક

December 19, 2025 | 20:03 IST