ખેડા જિલ્લા ભાજપમાં ભડકો, કેસરીસિંહે વિરોધીને લલકાર્યા

તાજેતરમાં યોજાયેલી ખેડા જિલ્લા સહકારી સંઘની ચૂંટણીમાં પરિણામો આવી ગયા છે અને તેમાં માતર બેઠક પર ભાજપના પૂર્વ ધારાસભ્ય કેસરીસિંહ સોલંકીએ  અપક્ષ ઉમેદવારી કરીને જીત મેળવી છે. સામે ભાજપે જેને મેન્ડેટ આપ્યો હતો તે ઉમેદવાર હારી ગયા હતા ત્યારે આજે કેસરીસિંહ સોલંકીએ સોશિયલ મીડિયામાં લાઇવ કરીને પોતાના વિરોધીઓ પર આકરા પ્રહાર કરી તેમને જવાબ આપતા ખેડા જિલ્લા ભાજપમાં ખળભળાટ મચી ગયો હતો.  તમે ભાજપના સિમ્બોલ વગર જીતી બતાવો તો હું પ્રદેશ કમલમમાં આખી જીંદગી પાણી પીવડાવીશ તેવો તેમણે પડકાર ફેંક્યો હતો.

કેસરીસિંહે ખેડા જિલ્લા સહકારી સંઘની ચૂંટણીમાં ઉમેદવારી કરતાં કેટલાક કાર્યકરોએ જિલ્લા ભાજપ કાર્યાલય ખાતે જઇને તેમને સસ્પેન્ડ કરવાની માગ કરી રજૂઆતો કરી હતી. 

આ રજૂઆતો બાદ કેસરીસિંહ સોલંકીએ આજે સોશિયલ મીડિયામાં લાઇવ થઇને પોતાના વિરોધીઓને જવાબ આપ્યો હતો. તેમણે કહ્યું હતું કે સંઘની ચૂંટણીમાં માતર બ્લોકમાં હું પોતે ઉમેદવાર હતો અને આની અંદર કોઇ મેન્ડેટની પ્રક્રિયા ના હોય પણ સંગઠન જાહેર કરે કે કેસરીસિંહે વિરુદ્ધમાં જઇ ફોર્મ ભર્યું છે પણ આ કોઇ પક્ષની ચૂંટણી ન હતી. આ ચૂંટણીમાં મેન્ડેન્ટ હોય જ નહીં

તેમણે આરોપ લગાવતા કહ્યું કે  હું કહીશ કે અમુલની આ ચોર ટોળકી કેટલાક દિવસોથી આ સીટમાં પ્રચાર પ્રસાર કરતી હતી. તમે જીલ્લા કાર્યાલયે જઇ મને સસ્પેન્ડ કરવાની વાતો કરી છે. મારે એમને એટલું કહેવું છે કે આ પક્ષની ચૂંટણી ન હતી. તમને પણ ખબર હતી કે તમારી પાસે પુરતા મત નથી છતાં તમે ફોજ ઉતારી, અમુલના ચેરમેનને ઉતારી દીધા, જિલ્લાના મહામંત્રીને તમે ઉતારી દીધા કે કેસરીસિંહને કોઇ પણ રીતે હરાવો..તમને ખબર હતી કે માતર બ્લોકમાં 30 જ મત હતા. તમારી પાસે કેટલા મતદારો હતા તેની પણ તેમને ખબર હતી. તમને જીતવાના ન હતા છતાં તમે વિરોધ કરી વિવાદો ઉભા કર્યા. 

તેમણે લાઇવમાં કહ્યું હતું કે  આ ચોર ટોળકીથી તમે જાગો..ખેડા જિલ્લા સંઘમાં તમે જાગશો તો અમુલમાં સાચા લોકો ચૂંટાશે જેથી તેમને જગાડવા મારે ખેડા જિલ્લા સંઘમાં લડવું પડ્યું છે. નડિયાદમાં પણ કૌશિક પરમાર જીત્યા છે. આ ચોર ટોળકીએ પોતાનું કામ સંતાડવા માટે કેસરીસિંહને કોઇ પણ રીતે હરાવવાનું કામ કર્યું . આ પશુપાલકોના હિતની લડાઇ હતી. ત્રણ જિલ્લાના પશુપાલકોની આ લડાઇ હતી અને આ મારી જીત નહીં પણ પશુપાલકોની જીત છે. આ કોઇ પક્ષની ચૂંટણી ન હતી પણ આ ચોરટોળકીએ એવું વાતાવરણ બનાવ્યું. 

તેમણે આક્રોષ સાથે કહ્યું કે અમે તમારા જેવી દગાબાજી કરી નથી. ચોર લોકો મને બદનામ કરવા નિકળ્યા છે.તમે ભાજપના સિમ્બોલ સિવાય જીલ્લા પંચાયતની ચાર સીટો પર ઉમેદવાર ઉતારો અને જીતી બતાવો. હું આખી જીંદગી પ્રદેશ કાર્યાલય ખાતે પાણી પીવડાવીશ. મારે કોઇ ખુરશીની લાલચ નથી પણ મને બદનામ કરવાનો ધંધો બંધ કરી દેજો.