કેન્દ્રીય મંત્રી સી.આર.પાટીલના ગઢમાં ભાજપમાં ભડકો

નવસારી જિલ્લા ભાજપનું નવું સંગઠન જાહેર થતાની સાથે ભાજપમાં ભડકો થયો છે. જલાલપોરના ધારાસભ્ય આર.સી.પટેલ અને પૂર્વ પ્રદેશ પ્રમુખ સી.આર.પાટીલના જૂથ વચ્ચે ભારે ખેંચમતાણ ચાલી રહી છે. જલાલપોર વિસ્તારના નેતાઓની અવગણના કરાતાં ભારે નારાજગી જોવા મળી રહી છે. જિલ્લા ભાજપ સંગઠનમાં નવા વરાયેલાં ઉપપ્રમુખ, બક્ષીપંચ મોરચાના મહામંત્રી, કિસાન મોરચાના મહામંત્રી અને જિલ્લા સંગઠન મંત્રીએ રાજીનામા ધરી દીધા છે. 
જિલ્લા ભાજપ પ્રમુખ ભુરાલાલ શાહના એકહથ્થું શાસનને લઈ જલાલપોરના કાર્યકરોમાં ભારે રોષ ફેલાયો છે. ઉપપ્રમુખ તરીકે નિયુક્ત થયેલા અશોક પટેલને મહામંત્રી પદની અપેક્ષા હતી. પરંતુ હોદ્દાની વહેંચણીમાં જલાલપોરની અવગણના કરાતાં અશોક પટેલ સહિત ચાર હોદ્દેદારોએ અચાનક નવા પદ પરથી રાજીનામા ધરી દીધા છે.

તાજેતરમાં જાહેર કરાયેલા નવસારી જિલ્લા ભાજપ ઉપપ્રમુખ અશોક પટેલ, બક્ષીપંચ મોરચા મહામંત્રી વિજય પટેલ, કિસાન મોરચા મહામંત્રી પ્રકાશ પટેલ અને જિલ્લા સંગઠન મંત્રી ચેતના પટેલે રાજીનામું આપ્યું છે. ચારેય હોદ્દેદારોએ જિલ્લા ભાજપ પ્રમુખ સાથે ટેલિફોનિક ચર્ચા કર્યા બાદ પોતાની નારાજગી વ્યક્ત કરી હતી. બાદમાં ‘કમલમ’ ખાતે જિલ્લા પ્રમુખની ગેરહાજરીમાં તેમના ટેબલ પર રાજીનામા મૂકી દીધા હતા.

જલાલપોરના ભાજપના કાર્યકરોમાં એવી ચર્ચા થઈ રહી છે કે પક્ષમાં નિષ્ઠાથી કામ કરનારા કાર્યકરોની અવગણના કરીને પોતાના માનીતા લોકોને હોદ્દા આપવામાં આવી રહ્યા છે. ઘણાં લાંબા સમયથી જિલ્લા ભાજપ પ્રમુખ અને જલાલપોરના ધારાસભ્ય આર.સી. પટેલ વચ્ચે આંતરિક ખેંચતાણ ચાલી રહી છે. આ ખેંચતાણ હવે અસંતોષ રૂપે બહાર આવી છે. તેના કારણે સ્થાનિક સ્વરાજ્ય ચૂંટણી પહેલાં ભાજપ માટે મોટો પડકાર ઊભો થયો છે.

રાજીનામા ધરી દેનારા ચારેય હોદ્દેદારો સ્પષ્ટ કહ્યું છે કે, જલાલપોર વિસ્તારના કાર્યકરોએ મહેનત કરીને કોંગ્રેસના એકહથ્થું શાસનને તોડી ભાજપનો ગઢ બનાવ્યો છે. તેમ છતાં, દર વર્ષે જલાલપોર વિસ્તારની  અવગણના કરવામાં આવે છે. અમે કામ માટે પ્રતિબદ્ધ છીએ. પરંતુ વારંવારની અવગણના સામે મૌન રહી કામ કરી શકાતું નથી. તેવું અશોક પટેલે કહ્યું હતું. જિલ્લા ભાજપ પ્રમુખે મૌખિક રીતે રાજીનામું સ્વીકારવા ઈન્કાર કર્યો હતો. તેથી હોદ્દેદારોએ જિલ્લા ભાજપ પ્રમુખના ટેબલ ઉપર રાજીનામા મૂકી દીધા હતા.

નવસારી જિલ્લા ભાજપ સંગઠન માળખામાં સમાવિષ્ટ કરાયેલા જિલ્લા ભાજપના ચાર હોદ્દેદારોના રાજીનામાથી પૂર્વ પ્રદેશ પ્રમુખ સી.આર.પાટીલના ગઢમાં ઘણાં સમયથી ખદબદી રહેલો અસંતોષ બહાર  આવ્યો છે. 9 ફેબ્રુઆરીના રોજ મોડી સાંજે નવા સંગઠનની જાહેરાત કરવામાં આવી હતી. જલાલપોરના ધારાસભ્ય આર. સી. પટેલના જૂથને મહામંત્રીપદ નહીં મળતાં અસંતોષ સપાટી ઉપર આવ્યો છે. બીજી તરફ નવસારી જિલ્લા ભાજપના પ્રમુખપદે ભુરા શાહની બીજી ટર્મ માટે વરણી કરવામાં આવી હતી. પરંતુ તેમની સાથેની ટીમની વરણી લાંબા સમયથી વરણી નહી કરાતાં મહત્વના હોદ્દાઓ માટે પક્ષમાં આંતરિક ખેંચતાણ ચાલી રહી હોવાની કાર્યકરોમાં ચર્ચા થઈ રહી છે.

આર.સી.પટેલ અને સી.આર.પાટીલ જૂથ સામસામે

જલાલપોરના ધારાસભ્ય આર.સી.પટેલ અને નવસારીના સાંસદ તથા કેન્દ્રીય મંત્રી સી.આર. પાટીલ જૂથ વચ્ચે વર્ચસ્વનો વિખવાદ લાંબા સમયથી ચાલી રહ્યો છે. જે અવાર-નવાર જાહેર કાર્યક્રમોમાં ભાષણ દરમિયાન શાબ્દિક પ્રહારોથી જોવા મળતો હોય છે. સી.આર.પાટીલે ભાષણમાં આર.સી.પટેલને જાહેરમાં કહ્યું હતું કે “વાઘને કોણ કહે તારું મોં ગંધાય છે’ એવો ટોણો માર્યો હતો.

વિજલપોરના એક કાર્યક્રમમાં આર.સી.પટેલે જિલ્લા ભાજપ પ્રમુખ ભુરા શાહને જાહેર મંચ પરથી તમે નવસારીનું જુઓ, વિજલપોરનું નહીં એવું કહેતા કાર્યકરોમાં ખાસ્સી ચર્ચા સાંભળવા મળી હતી. લાંબા સમયથી આર.સી.પટેલનું વર્ચસ્વ ઘટાડવા માટે થઈ રહેલા પ્રયાસોના કારણે વિજલપોરના કાર્યકરોનો અસંતોષ હવે બહાર આવ્યો છે.