બિહારમાં નીતિશ કુમાર 10મી વખત લેશે શપથ

બિહારના મુખ્યમંત્રી પદ નીતિશ કુમારે પરથી રાજીનામું આપી દીધું છે. આવતીકાલે ગુરુવારે તેઓ 10મી વખત CM પદના શપથ લેશે. શપથ ગ્રહણ સમારોહ પટનાના ગાંધી મેદાનમાં યોજાશે. સમારોહ માટે 2 મંચ બનાવવામાં આવ્યા છે. તેમાં PM મોદી સહિત 11 રાજ્યોના મુખ્યમંત્રીઓ પણ સામેલ થશે. જ્યારે 150 મહેમાનોને પણ આમંત્રણ મોકલવામાં આવ્યું છે. શપથ સમારોહમાં ગુજરાતના CM ભૂપેન્દ્ર પટેલ પણ હાજરી આપશે.

બિહાર વિધાનમંડળના સેન્ટ્રલ હોલમાં નીતિશ કુમારને NDA ધારાસભ્ય દળના નેતા તરીકે ચૂંટવામાં આવ્યા હતા. તે જ સમયે પટનાના BJP કાર્યાલયમાં ધારાસભ્ય દળની બેઠક થઈ હતી. જેમાં સમ્રાટ ચૌધરીને ધારાસભ્ય દળના નેતા તરીકે ચૂંટવામાં આવ્યા હતા.

વિજય સિન્હાને વિધાનમંડળના ઉપનેતા તરીકે ચૂંટવામાં આવ્યા છે. સમ્રાટ ચૌધરી અને વિજય સિન્હા બંને ડેપ્યુટી CM હશે. નીતિશની સાથે સમ્રાટ અને વિજય સિન્હા પણ ડેપ્યુટી CM તરીકે શપથ લઈ શકે છે. BJPના ધારાસભ્ય દળની બેઠક પહેલા JDUના ધારાસભ્ય દળની બેઠક યોજાઈ હતી જેમાં નીતિશ કુમારને નેતા તરીકે ચૂંટવામાં આવ્યા.

ધારાસભ્ય દળના નેતાની ચૂંટણી પહેલાં કેન્દ્રીય નિરીક્ષકોની નિમણૂક કરવામાં આવી હતી. ભાજપના સંસદીય બોર્ડે ઉત્તરપ્રદેશના નાયબ મુખ્યમંત્રી કેશવપ્રસાદ મૌર્યને કેન્દ્રીય નિરીક્ષક તરીકે નિયુક્ત કર્યા હતા. જ્યારે કેન્દ્રીય મંત્રી અર્જુન રામ મેઘવાલ અને ભૂતપૂર્વ કેન્દ્રીય મંત્રી સાધ્વી નિરંજન જ્યોતિએ સહ-નિરીક્ષકની જવાબદારી મળી હતી.

બિહારમાં ભાજપ નંબર વન પાર્ટી પણ નીતિશ બનશે મુખ્યમંત્રી

નીતિશ કુમાર આવતીકાલે 10મી વખત મુખ્યમંત્રી તરીકે શપથ લેશે. બિહાર વિધાનસભામાં પહેલીવાર નંબર વન પાર્ટી બનવા છતાં ભાજપે નીતિશ કુમારને મુખ્યમંત્રી બનાવવાનો નિર્ણય લીધો. ભાજપે તેના બે નાયબ મુખ્યમંત્રી સમ્રાટ ચૌધરી અને વિજય સિંહાને રિપીટ કર્યા છે.

તમને જણાવી દઈએ કે બિહાર વિધાનસભાની ચૂંટણીમાં NDAએ 243 બેઠકમાંથી 202 બેઠક જીતી છે. જે કુલ બેઠકોના ત્રણ-ચતુર્થાંશ છે. તે પૈકી BJPએ 89, JDUએ 85, LJP (R)એ 19, HAMએ 5 અને RLMએ 4 બેઠક જીતી છે. મહાગઠબંધન ફક્ત 35 બેઠક પર સમેટાઈ ગયું છે.

ભાજપે સમગ્ર ચૂંટણીપ્રચાર દરમિયાન નીતિશ કુમારના નેતૃત્વનો પ્રચાર કર્યો છે. પીએમ મોદીથી લઈને ગૃહમંત્રી અમિત શાહ સુધી, બધાએ નીતિશ કુમારનું નામ લેવાનું ચૂક્યા નથી. જ્યારે મહાગઠબંધને CM ચહેરા અંગે સવાલ ઉઠાવ્યા ત્યારે અમિત શાહે તેનો ઇનકાર કર્યો. દરભંગાના અલીનગરમાં એક ચૂંટણી રેલીને સંબોધતાં શાહે કહ્યું, "સોનિયાજી ઇચ્છે છે કે તેમનો પુત્ર PM બને અને લાલુજી ઇચ્છે છે કે તેમનો પુત્ર CM બને. હું તેમને કહેવા માગું છું. આ બે પદ ખાલી નથી. ત્યાં (દિલ્હીમાં) મોદીજી છે. અહીં (પટણામાં) નીતિશજી છે." રાજકીય નિષ્ણાતો ફક્ત એટલું જ કહે છે કે NDAની મોટી જીત નીતિશ કુમારને કારણે થઈ છે. નીતિશ કુમાર જીત્યા હોવાથી તેઓ મુખ્યમંત્રી બનશે.

ભાજપ પાસે નીતિશ કરતાં મોટો ચહેરો નથી

ભાજપ પાસે એકપણ એવો ચહેરો નથી, જેની ઓળખ રાજ્યભરમાં હોય. પક્ષ માટે નીતિશ કુમાર એકમાત્ર વિકલ્પ છે. જે ચહેરાની કમી સાથે સંઘર્ષ કરી રહ્યો છે. હાલમાં બિહાર ભાજપમાં કોઈ મોટો OBC ચહેરો નથી. સુશીલ કુમાર મોદીના મૃત્યુ પછી રાષ્ટ્રીય સ્તરે માન્યતા ધરાવતો કોઈ OBC નેતા નથી. બિહાર રાજકીય રીતે ફળદ્રુપી જમીનવાળું રાજ્ય છે. અહીં ફક્ત નોંધપાત્ર રાજકીય કદ ધરાવતી વ્યક્તિ જ મુખ્યમંત્રી બનશે. નીતિશ કુમારને ચહેરાની કમીનો ફાયદો થઈ રહ્યો છે.

ભાજપ અત્યારસુધી નીતિશ કુમારનો જુનિયર ભાગીદાર બનીને રહ્યો છે. તેણે એકપણ એવો ચહેરો તૈયાર કર્યો નથી, જેની રાજ્યભરમાં નોંધપાત્ર પ્રભાવ હોય. આ ચૂંટણીમાં પણ આ કમી સ્પષ્ટ દેખાઈ છે. બિહારમાં નીતિશ કુમારનો મત હિસ્સો ઓછામાં ઓછો 15 ટકા છે અને બીજી બાજુ જવાથી તેમના મત શેર પર કોઈ અસર થતી નથી. તેઓ બિહારમાં કુર્મી, ઇબીસી અને મહાદલિત સમુદાયોના સૌથી અગ્રણી નેતા છે. નીતિશ કુમાર આ સમુદાયો માટે ગર્વની વાત છે. આ જ કારણ છે કે ભાજપ અને આરજેડી બંને નીતિશ કુમારને જાળવી રાખવા મજબૂર છે.

નિષ્ણાતો માને છે કે નીતિશ કુમારને તેમની સંમતિ વિના પદ પરથી દૂર કરવાથી તેમના મતદારો ગુસ્સે થઈ શકે છે. ભાજપ આ જોખમ લેવા તૈયાર નથી, કારણ કે રાજ્યમાં તેનું હજુ પણ લાંબું રાજકારણ કરવાનું છે. નીતિશ કુમારની ઉંમર વધી રહી છે. તેમણે હજુ સુધી તેમના પક્ષના સેકન્ડ મેન વિશે નિર્ણય લીધો નથી. તેમના જવાથી પાર્ટીમાં વિભાજન થવાની શક્યતા છે અને મતદારો ભાજપ સાથે જશે. આ બધું પહેલેથી જ થઈ રહ્યું છે તો ભાજપ શા માટે ઉતાવળ કરશે.

નીતિશ કુમારની પાર્ટી કેન્દ્રમાં મોદી સરકારમાં ભાગીદાર છે. લોકસભામાં 543 બેઠક છે. સરકાર બનાવવા માટે ઓછામાં ઓછી 272 બેઠકની જરૂર છે. ભાજપના નેતૃત્વ હેઠળના NDA ગઠબંધને 292 બેઠક મેળવી છે. તેમાં JDU પાસે 12 બેઠક છે. જો JDU મહાગઠબંધનમાં જોડાય છે તો NDA પાસે 280 બેઠક રહે. જે બહુમતી કરતાં 8 બેઠક વધુ છે. તેમ છતાં NDA સરકાર સત્તામાં રહેશે. પરંતુ ગઠબંધનના બાકીના ઘટક દળોમાં ધારણા ખરાબ રહેવાની શક્યતા છે.