PM મોદીના માતાના અપમાન મામલે બિહારમાં NDAનું બંધ

વડાપ્રધાન નરેન્દ્ર મોદીના સ્વર્ગસ્થ માતા હીરાબેનનું અપમાન થયા બાદ બિહારમાં રાજકીય ગરમાવો વધી ગયો છે. આ અપમાનના વિરોધમાં NDA દ્વારા આજે ગુરુવારે, બિહાર બંધનું એલાન આપવામાં આવ્યું હતું. આ બંધની વ્યાપક અસર પટના, ગયાજી, મુંગેર, સમસ્તીપુર, બેગુસરાય, છપરા, અને હાજીપુર જેવા મુખ્ય જિલ્લાઓમાં જોવા મળી.

વાહનોની લાંબી કતારો લાગી 

ઠેર-ઠેર નેશનલ હાઈવે બ્લોક થવાથી વાહનોની લાંબી કતારો લાગી ગઈ હતી, જેના કારણે જનજીવન અસ્તવ્યસ્ત થઈ ગયું હતું. આ ઘટના 27મી ઓગસ્ટના રોજ દરભંગામાં યોજાયેલી 'વોટર અધિકાર યાત્રા' દરમિયાન બની હતી, જ્યાં રાહુલ ગાંધી અને તેજસ્વી યાદવના મંચ પરથી PM મોદીના માતા વિરુદ્ધ અપમાનજનક ટિપ્પણીઓ કરવામાં આવી હતી.

ભાજપના નેતાઓએ રસ્તો રોકી દીધો

બિહાર બંધ દરમિયાન, પટનાના સગુણા મોર ખાતે ટાયરો સળગાવીને આગ ચંપી કરવામાં આવી હતી, જ્યારે બિહારમાં ભાજપના નેતાઓએ રસ્તો રોકી દીધો હતો. આ વિરોધને કારણે ઘણી સ્કૂલ બસોને પણ પરત ફરવું પડ્યું હતું. પટનાના ડાકબુંગલા ક્રોસિંગ પર પણ ભાજપના કાર્યકરોએ રસ્તો બ્લોક કરીને પોતાનો વિરોધ વ્યક્ત કર્યો હતો. દરભંગામાં ભાજપના મહિલા મોરચાએ આગેવાની લીધી હતી અને મુખ્ય ચાર રસ્તાઓ પર વિરોધ પ્રદર્શન કર્યા હતા.

વિરોધકર્તાઓએ વાયુસેનાના વાહનોને પસાર થવા દીધા

જોકે, માનવતા દાખવીને વિરોધકર્તાઓએ પોલીસ, એમ્બ્યુલન્સ અને વાયુસેનાના વાહનોને પસાર થવા દીધા હતા. બેગુસરાયમાં તો મંત્રી સુરેન્દ્ર મહેતા પોતે રસ્તા પર ઉતરી આવ્યા હતા જેથી બંધને સફળ બનાવી શકાય. મુંગેરમાં પણ ભાજપના કાર્યકરોએ શાંતિપૂર્ણ રીતે વિરોધ નોંધાવ્યો હતો. આ તંગ પરિસ્થિતિને જોતાં, કોંગ્રેસ અને JDUના કાર્યાલયોની સુરક્ષા વધારવામાં આવી હતી અને પટનામાં 2000થી વધુ પોલીસ કર્મચારીઓને તૈનાત કરવામાં આવ્યા હતા.

માફી માંગવામાં ન આવે ત્યાં સુધી આંદોલન

PM મોદીએ આ ઘટના પર પોતાની વ્યથા વ્યક્ત કરી હતી અને કહ્યું હતું કે, તેમની માતાનો રાજકારણ સાથે કોઈ સંબંધ ન હતો અને તે હવે આ દુનિયામાં નથી, તેમ છતાં તેમનું અપમાન કરવામાં આવ્યું. તેમણે આ દુઃખ બિહારના લોકો સાથે શેર કર્યું હતું અને આ ઘટનાને ભારતીય સંસ્કૃતિ અને માતૃત્વનું અપમાન ગણાવ્યું હતું. ભાજપે સ્પષ્ટપણે જણાવ્યું છે કે, જ્યાં સુધી માફી માંગવામાં ન આવે ત્યાં સુધી આ આંદોલન વધુ ઉગ્ર બનશે.