અનશન વચ્ચે સોનમ વાંગચુકનો ભાવુક સંદેશ

Sonam Wangchuk Hunger Strike: લદ્દાખના જાણીતા પર્યાવરણવિદ, શિક્ષણવિદ અને સામાજિક કાર્યકર સોનમ વાંગચુક ફરી એકવાર પોતાના આંદોલનને લઈને ચર્ચાના કેન્દ્રમાં છે.લદ્દાખના હિતો,પર્યાવરણનું સંરક્ષણ અને બંધારણીય અધિકારોની માંગ સાથે તેઓ અનિશ્ચિતકાલીન અનશન પર બેઠા છે.આ દરમિયાન તેમણે દેશવાસીઓને સંબોધીને એક ભાવુક અપીલ કરી,જેમાં તેમણે કહ્યું કે,"મારી હાલત એવી પણ નથી કે હું મરી જઉં,પરંતુ આ લડાઈ મારા માટે નહીં, લદ્દાખના ભવિષ્ય માટે છે.તેમના આ નિવેદન બાદ દેશભરમાં તેમના સમર્થકોમાં નવી ચર્ચા શરૂ થઈ છે. સોશિયલ મીડિયા પર હજારો લોકોએ તેમની હિંમતને સલામ કરી છે,જ્યારે અનેક સામાજિક સંગઠનો અને પર્યાવરણપ્રેમીઓએ તેમની માંગણીઓને ગંભીરતાથી સાંભળવાની અપીલ કરી છે.

અનશન પાછળનો હેતુ
સોનમ વાંગચુક છેલ્લા ઘણા સમયથી લદ્દાખ માટે વિશેષ બંધારણીય સુરક્ષા, પર્યાવરણનું જતન અને સ્થાનિક લોકોને વધુ અધિકારો મળે તે માટે અવાજ ઉઠાવી રહ્યા છે.તેમનું કહેવું છે કે લદ્દાખ હિમાલયનો અત્યંત સંવેદનશીલ વિસ્તાર છે. અહીં અનિયંત્રિત વિકાસ, ખનન, ઔદ્યોગિક પ્રવૃત્તિઓ અને આબોહવા પરિવર્તનની અસર ઝડપથી વધી રહી છે. જો સમયસર યોગ્ય પગલાં નહીં લેવાય તો આવનારી પેઢીઓને ગંભીર પરિણામો ભોગવવા પડી શકે.તેમના જણાવ્યા મુજબ આ લડાઈ કોઈ વ્યક્તિગત હિત માટે નથી, પરંતુ સમગ્ર વિસ્તારના પર્યાવરણ, સંસ્કૃતિ અને લોકોના ભવિષ્ય માટે છે.

'હું હમણાં મરી જવાનો નથી, લડત ચાલુ રહેશે'
સોનમ વાંગચુકના નિયમિત મેડિકલ ટેસ્ટ કરવામાં આવી રહ્યા છે. તેમણે પોતાના વીડિયો સંદેશમાં જણાવ્યું કે,મારી સ્થિતિ એવી નથી કે હું આગામી બે-ચાર દિવસમાં મરી જાઉં. 18 દિવસના અનશન બાદ પણ મારો ઈસીજી રિપોર્ટ સારો આવ્યો છે. હા,શરીરમાં નબળાઈ છે અને મસલ્સ ઘટી રહ્યા છે, પરંતુ મારું દિલ બરાબર કામ કરી રહ્યું છે. તેથી હું હજુ ઘણા દિવસ સુધી આંદોલન ખેંચી શકું તેમ છું.લડત ચાલુ રાખવા બાબતે સોનમ વાંગચુકે કહ્યું કે, 'દેશભરમાંથી લોકો અને વરિષ્ઠ નેતાઓ મને અનશન તોડવાની અપીલ કરી રહ્યા છે, જ્યારે કેટલાક લોકોએ તો કોર્ટમાં જઈને સરકારને મને બળજબરીથી જમાડવાનો આદેશ આપવાની પણ માગ કરી છે. જોકે, જો હું અત્યારે હાર માની લઈશ, તો સરકારને ખોટો સંદેશ જશે કે કોઈ પણ જવાબ આપ્યા વિના આંદોલન દબાવી શકાય છે. આ લડત મારી વ્યક્તિગત નહીં, પણ લોકશાહીમાં સરકારની જવાબદારી સુનિશ્ચિત કરવા માટેની છે.'

20 જુલાઈએ  મોટું આહવાન
પોતાના આંદોલનને આગળ વધારવા માટે સોનમ વાંગચુક દ્વારા આગામી 20 જુલાઈએ 'ચલો સંસદ' માર્ચનું આયોજન કરવામાં આવ્યું છે. તેમણે દેશભરના વિદ્યાર્થીઓ, યુવાનો, શિક્ષકો અને સામાન્ય નાગરિકોને આ પ્રદર્શનમાં મોટી સંખ્યામાં જોડાવા માટે અપીલ કરી છે. તેમણે શાળાઓ, કોલેજો અને યુનિવર્સિટીઓને વિનંતી કરી છે કે તેઓ 20 જુલાઈના દિવસને 'એક્સપીરિયન્શિયલ એજ્યુકેશન ડે' (અનુભવાત્મક શિક્ષણ દિવસ) તરીકે ઉજવે, જેથી વિદ્યાર્થીઓ દેશની લોકતાંત્રિક પ્રક્રિયાને નજીકથી અને લાઈવ સમજી શકે. આ વિરોધ પ્રદર્શન માત્ર એક વિરોધ પ્રદર્શન નથી, પણ લોકશાહીને સમજવાની એક મોટી તક છે.

વજનમાં ભારે ઘટાડો છતાં વાંગચુક માનસિક રીતે મજબૂત
19 દિવસ લાંબા અનશનના કારણે સોનમ વાંગચુકના સ્વાસ્થ્ય પર ગંભીર અસર પડી રહી છે. ડોક્ટરોના જણાવ્યા અનુસાર, અનશન શરૂ થયા બાદથી અત્યાર સુધીમાં તેમનું વજન આશરે 8.9 કિલોગ્રામ ઘટી ગયું છે અને હવે તેમનું વજન માત્ર 57.15 કિલોગ્રામ જ રહ્યું છે. હાલમાં તેમનું બ્લડ પ્રેશર 105/76, બ્લડ શુગર 80 mg/dL અને ઓક્સિજનનું સ્તર 97% નોંધાયું છે. ડોક્ટરોની ટીમ 24 કલાક તેમની સ્થિતિ પર નજર રાખી રહી છે અને તેમના જણાવ્યા મુજબ, શારીરિક નબળાઈ છતાં વાંગચુક માનસિક રીતે સંપૂર્ણ સચેત અને સ્વસ્થ છે.

વિપક્ષી નેતાઓનો ખુલ્લો ટેકો, 1.3 લાખ લોકોએ આપ્યો સાથ
બુધવારે દિલ્હીના જંતર-મંતર પર સોનમ વાંગચુકને મળવા માટે ભીમ આર્મીના પ્રમુખ અને સાંસદ ચંદ્રશેખર આઝાદ સહિત કોંગ્રેસ, સમાજવાદી પાર્ટી, તૃણમૂલ કોંગ્રેસ અને CPIના અનેક સાંસદો પહોંચ્યા હતા. તમામ નેતાઓએ લદ્દાખના મુદ્દાને સંસદના આગામી મોનસૂન સત્રમાં જોરશોરથી ઉઠાવવાની ખાતરી આપી છે. આ દરમિયાન આંદોલનકારીઓએ દાવો કર્યો છે કે 20 જુલાઈની સંસદ માર્ચ માટે શરૂ કરાયેલા મિસ્ડ કોલ અભિયાનમાં અત્યાર સુધી 1.3 લાખથી વધુ લોકો જોડાઈ ચૂક્યા છે.