મમતા સાથે મહાખેલા! 60 ધારાસભ્યોનો સ્પીકરને પત્ર

અસલી ટીએમસી કોણ? પાર્ટીમાં સત્તા સંઘર્ષ તેજ

પશ્ચિમ બંગાળની રાજનીતિમાં તૃણમૂલ કોંગ્રેસ (ટીએમસી) ફરી એકવાર આંતરિક ખેંચતાણના કારણે ચર્ચામાં આવી છે. ચૂંટણીમાં પરાજય બાદ પાર્ટીમાં અસંતોષના સ્વર વધુ તેજ બનતા જોવા મળી રહ્યા છે. હવે કેટલાક બળવાખોર ધારાસભ્યોએ વિધાનસભાના અધ્યક્ષ સમક્ષ પોતાનું શક્તિપ્રદર્શન કરતાં ‘અસલી ટીએમસી’ હોવાનો દાવો કર્યો છે.

સ્પીકરને સોંપાયો સહીઓવાળો પત્ર

સૂત્રોના જણાવ્યા અનુસાર ઋતાબ્રત બેનર્જીના નેતૃત્વમાં એક જૂથે આશરે 60 ધારાસભ્યોના સમર્થન સાથે સ્પીકરને પત્ર આપવાની તૈયારી કરી છે. આ પત્રમાં વિપક્ષના નેતા સહિતના મહત્વપૂર્ણ હોદ્દાઓ માટે તેમના જૂથને માન્યતા આપવાની માંગ કરવામાં આવી હોવાનું કહેવાય છે.

ધારાસભ્યોના સમર્થનનો દાવો

ટીએમસીના ધારાસભ્ય મુસ્તફિઝુર રહેમાને જણાવ્યું કે તેમને ચોક્કસ આંકડાની જાણ નથી, પરંતુ આશરે 59 જેટલી સહીઓ એકત્ર થઈ હોવાની માહિતી મળી છે. તેમણે પોતે પણ આ પ્રક્રિયામાં સહભાગી હોવાનું જણાવ્યું હતું. બીજી તરફ, કેટલાક ધારાસભ્યો હજુ સત્તાવાર નિવેદન આપવાથી દૂર રહ્યા છે.

વિપક્ષના નેતા મુદ્દે રાજકીય ગરમાવો

બળવાખોર જૂથનું કહેવું છે કે, વિધાનસભાની લાંબા સમયથી ચાલતી પરંપરા મુજબ બહુમતી ધારાસભ્યોની ભલામણના આધારે વિપક્ષના નેતાની પસંદગી થવી જોઈએ. તેમણે અગાઉના વર્ષોમાં અપનાવવામાં આવેલી પ્રક્રિયાનો ઉલ્લેખ કરીને પોતાના દાવાને મજબૂત કરવાનો પ્રયાસ કર્યો છે.

મંત્રીના નિવેદને વધારી અટકળો

રાજ્યના મંત્રી તાપસ રોયે દાવો કર્યો છે કે ટીએમસીમાં ગંભીર આંતરિક મતભેદો છે અને પાર્ટી મોટા રાજકીય પરિવર્તનના તબક્કામાંથી પસાર થઈ રહી છે. તેમના મતે, વર્ષોથી દબાયેલા અસંતોષ હવે ખુલ્લેઆમ સામે આવી રહ્યા છે.

મમતા બેનર્જીના સમર્થનમાં જૂનો ગઢ

જોકે ટીએમસીના વરિષ્ઠ નેતાઓએ પાર્ટીમાં મોટા વિભાજનની શક્યતાઓને નકારી કાઢી છે. પાર્ટીના નેતા શોભનદેવ ચટ્ટોપાધ્યાયે સ્પષ્ટ કર્યું કે મોટાભાગના ધારાસભ્યો હજુ પણ મમતા બેનર્જીના નેતૃત્વમાં વિશ્વાસ ધરાવે છે અને પાર્ટીનું મૂળ સંગઠન મજબૂત છે.

50થી વધુ ધારાસભ્યો પક્ષપલટો કરશે?

તાજેતરના દિવસોમાં એવી અટકળો ચાલી રહી છે કે મોટી સંખ્યામાં ધારાસભ્યો બળવાખોર જૂથ સાથે જઈ શકે છે. જોકે ઋતાબ્રત બેનર્જીએ આ અંગે સ્પષ્ટ ટિપ્પણી કરવાનું ટાળ્યું છે. તેમણે માત્ર એટલું જણાવ્યું કે વિવિધ ધારાસભ્યો સાથે તેમની મુલાકાતો ચાલુ છે.

ટીએમસી સામે પડકારજનક સ્થિતિ

294 સભ્યોની વિધાનસભામાં ટીએમસીએ 80 બેઠકો મેળવી છે. જોકે તાજેતરમાં પક્ષવિરોધી પ્રવૃત્તિઓના આરોપસર બે ધારાસભ્યોને બહારનો રસ્તો દેખાડવામાં આવ્યો હતો. હવે આંતરિક વિવાદ વધુ ઘેરો બનતા પાર્ટી માટે નવી રાજકીય પડકારજનક સ્થિતિ સર્જાઈ છે.

કલ્યાણ બેનર્જીની સ્પીકરને વિનંતી

સ્પીકરને સંબોધિત પત્રમાં વિનંતી કરવામાં આવી હતી કે પસંદ કરાયેલા વ્યક્તિઓને વિરોધ પક્ષના નેતા તરીકે અને અન્ય હોદ્દાઓ વિધાનસભાની પરંપરા અને પ્રથાના આધારે માન્યતા આપવામાં આવે. જે દાયકાઓથી ચાલી આવે છે. એ પણ નિર્દેશ કરવામાં આવ્યો હતો કે વર્ષ 2001માં અમારા પક્ષે સ્વર્ગસ્થ પંકજ બેનર્જીને વિપક્ષના નેતા તરીકે નિયુક્ત કરવાની ભલામણ કરી હતી. જેને તત્કાલીન સ્પીકરે સ્વીકારી હતી.

તેવી જ રીતે વર્ષ 2006, 2011, 2016 અને 2021 માં પણ આ જ પ્રથા અને પ્રક્રિયાનું પાલન કરવામાં આવ્યું હતું. પત્રમાં યાદ અપાવવામાં આવ્યું હતું કે, "2021 માં, ભાજપે વિપક્ષના નેતા તરીકે સુવેન્દુ અધિકારીનું નામ પ્રસ્તાવિત કર્યું હતું. જેને તત્કાલીન સ્પીકરે સ્વીકાર્યું હતું. તેથી સ્પીકરને વિનંતી કરવામાં આવે છે કે શોભનદેવ ચટ્ટોપાધ્યાયને વિપક્ષના નેતા તરીકે અન્ય ભલામણ કરાયેલ વ્યક્તિઓ સાથે શક્ય તેટલી વહેલી તકે તેમના સંબંધિત પદો પર નિયુક્ત કરે."