રાજકોટ નજીક કાગવડ સ્થિત ખોડલધામ ખાતે આજે લેઉવા પટેલોનું વિશિષ્ટ શક્તિ પ્રદર્શન જોવા મળ્યું, જે સૌરાષ્ટ્રના રાજકારણમાં એક મહત્ત્વપૂર્ણ તસવીર દર્શાવે છે. અહીં ચાલી રહેલા કથિત વિવાદોને ભૂલીને બે અગ્રણી પાટીદાર નેતાઓ એક મંચ પર જોવા મળ્યા હતા.
ખોડલધામ ખાતે ગુજરાત ભાજપ પ્રદેશ પ્રમુખ અને નવનિયુક્ત મંત્રીઓના સન્માન સમારોહનું આયોજન કરવામાં આવ્યું હતું. આ કાર્યક્રમમાં મુખ્યમંત્રી ભૂપેન્દ્ર પટેલ, કેન્દ્રીય મંત્રી મનસુખ માંડવિયા, પ્રદેશ અધ્યક્ષ જગદીશ વિશ્વકર્મા, કેબિનેટ મંત્રી જીતુ વાઘાણી, મંત્રી કૌશિક વેકરિયા અને કમલેશ પટેલ સહિતના મહાનુભાવો હાજર રહ્યા હતા.
ખોડલધામ ટ્રસ્ટના ચેરમેન નરેશ પટેલ અને ટ્રસ્ટીઓ દ્વારા પાટીદાર સમાજના મંત્રીઓનું સન્માન કરવામાં આવ્યું હતું. આ પ્રસંગે સૌથી અનોખું અને સમાજ માટે સુખદ દ્રશ્ય સર્જાયું હતું. લાંબા સમયથી પાટીદાર સમાજના બે મોટા નેતાઓ નરેશ પટેલ અને જયેશ રાદડિયા વચ્ચે ચાલી રહેલી કથિત ખેંચતાણની ચર્ચાઓ વચ્ચે, બંને અગ્રણીઓએ એકબીજાને ગળે મળીને એકતાનો સ્પષ્ટ સંદેશ આપ્યો હતો. ત્યાં હાજર સૌ કોઈએ આ સુખદ મિલનને વધાવી લીધું હતું, જેના પગલે લોકોમાં હર્ષની લાગણી છવાઈ ગઈ હતી. આ ઐતિહાસિક ક્ષણે કેબિનેટ મંત્રી જીતુ વાઘાણી પણ હાજર રહ્યા હતા.
મુખ્યમંત્રી અને ચેરમેનનું સંબોધન :&nbsp;
કાર્યક્રમમાં સંબોધન કરતાં મુખ્યમંત્રી ભૂપેન્દ્ર પટેલે જણાવ્યું હતું કે ખોડલધામ ખાતે મા ખોડલ સાક્ષાત ઊભા હોય તેવી અનુભૂતિ થઈ રહી છે. દર વર્ષે અહીં માત્ર પાટીદાર સમાજ જ નહીં, પરંતુ સૌરાષ્ટ્ર અને સમગ્ર ગુજરાતના હજારો ભક્તો દર્શન માટે આવે છે. તેમણે નરેશ પટેલ અને તેમની ટીમને આરોગ્ય સેવાઓના હિમાયતી ગણાવ્યા અને આગામી સમયમાં ખોડલધામ દ્વારા કેન્સર હોસ્પિટલનું નિર્માણ કાર્ય થવાનું છે તેની નોંધ લીધી.
ખોડલધામ ટ્રસ્ટના ચેરમેન નરેશ પટેલે સંબોધન કરતાં જણાવ્યું કે ખોડલધામ એક માત્ર મંદિર નહીં, પણ એક વિચાર છે. આ સંસ્થા સંગઠિત બનીને 18 વર્ણની સેવા કરવાનું કાર્ય કરી રહી છે. તેમણે મુખ્યમંત્રી ભૂપેન્દ્ર પટેલ ગુજરાતવાસીઓની સેવા ઉત્તમ રીતે કરી શકે તે માટે મા ખોડલના ચરણોમાં પ્રાર્થના કરી હતી.
શ્રી ખોડલધામ ટ્રસ્ટ-કાગવડ દ્વારા પ્રદેશ પ્રમુખ જગદિશભાઈ વિશ્વકર્મા અને નવનિયુક્ત લેઉવા પટેલ સમાજના મંત્રીઓ જીતુભાઈ વાઘાણી, કૌશિકભાઈ વેકરિયા, કમલેશભાઈ પટેલનું સન્માન કરવામાં આવ્યું હતું.
&nbsp;

નરેશ પટેલ અને જયેશ રાદડિયા

સૌરાષ્ટ્રના રાજકારણમાં મોટી તસવીર,વિવાદો ભૂલીને લેઉવા પાટીદારના અગ્રણીઓ થયા એક

December 7, 2025 | 19:49 IST