ગુજરાતમાં કોંગ્રેસની ન્યાય યાત્રાનો મોરબીથી પ્રારંભ

ગુજરાતમાં કોંગ્રેસે મોરબીના દરબારગઢથી ન્યાય યાત્રાનો પ્રારંભ કર્યો છે. પાંચ જિલ્લામાં 300 કિલોમીટર ફરીને ન્યાય યાત્રા 23 ઓગષ્ટે ગાંધીનગર પહોંચશે. રાજકોટ ટીઆરપી ગેમઝોન અગ્નિકાંડ, વડોદરા હરણી તળાવ બોટકાંડ, મોરબી ઝુલતો પુલ દુર્ઘટના અને સુરતના તક્ષશિલા આગકાંડના પીડિતોને ન્યાયની માંગ સાથે યાત્રા કાઢવામાં આવી છે.

બાર ગઢથી યાત્રાની શરૂઆત કરાઇ હતી. ન્યાય યાત્રામાં એક દિવસ રાહુલ ગાંધી હાજરી આપે તેવી શક્યતા છે. 

મોરબીના દરબારગઢ ચોકમાં ક્રાંતિ સભા યોજી અને વંદે માતરમના ગાન સાથે કોંગ્રેસની ન્યાય યાત્રાનો પ્રારંભ થયો છે. વિધાનસભા વિપક્ષના નેતા અમિત ચાવડા, કોંગ્રેસના કાર્યકારી પ્રમુખ અને ધારાસભ્ય જિજ્ઞેશ મેવાણી, સેવાદળના લાલજી દેસાઈ સહિત પાંચ મોટી દુર્ઘટનાના પીડિત પરિવારો ન્યાય ​​​​​​​યાત્રામાં જોડાયા છે.

મોરબી, રાજકોટ, સુરેન્દ્રનગર, અમદાવાદ અને ગાંધીનગર જિલ્લામાં ફરશે. 300 કિલોમીટર ફરીને ન્યાય યાત્રા ગુજરાતમાં બનેલી પાંચ મોટી દુર્ઘટના​​​​​માં પીડિત પરિવારોને ન્યાય મળે તેવા હેતુથી ન્યાય યાત્રાનું આયોજન કરવામાં આવ્યું છે.

વડોદરા હરણી બોટકાંડ, મોરબી ઝુલતો પુલ દુર્ઘટના, રાજકોટ ટીઆરપી ગેમઝોન અગ્નિકાંડ, કાંકરીયા રાઈડ કાંડ, તક્ષશિલા આગકાંડમાં નિર્દોષ નાગરિકો ભોગ બન્યા છે. આ ઘટનાના પીડિત પરિવારોને ન્યાય અપાવવા પ્રદેશ કોંગ્રેસ સમિતિએ ગુજરાત ન્યાય યાત્રા કાઢી છે.

'ભાજપનો પાપનો ઘડો' લઈ ન્યાય યાત્રા શરૂ કરી :

મોરબીથી ન્યાય યાત્રા શરૂ થયા બાદ રાજકોટ, સુરેન્દ્રનગર, અમદાવાદ થઈ ગાંધીનગર પહોંચશે. કોંગ્રેસે આ યાત્રા પાર્ટ વન ગણાવીને અન્ય દુર્ઘટનાના પીડિત પરિવારોને સાથે રાખી બીજી યાત્રાનું પણ આયોજન કર્યુ છે. ન્યાય યાત્રામાં કોંગ્રેસે એક ઘડો રાખ્યો છે. કોંગ્રેસે ઘડાને ‘ભાજપના પાપનો ઘડો’ નામ આપ્યુ છે. તેમાં નાગરિકોના પ્રશ્નો નાખીને છેલ્લે ભાજપના પાપનો ઘડો ભરાઈ ગયો હોવાનો સંદેશ આપવામાં આવશે.

રાહુલ અથવા પ્રિયંકા ગાંધી જોડાય તેવી શક્યતા :

ન્યાય યાત્રામાં દેશભરના કોંગ્રેસના નેતાઓ જોડાશે. પ્રદેશ કોંગ્રેસ સમિતિએ યાત્રામાં જોડાવા લોકસભા વિપક્ષના નેતા રાહુલ ગાંધી તેમજ પ્રિયંકા ગાંધીને આમંત્રણ આપ્યુ છે. પરંતુ તેની સત્તાવાર જાહેરાત કરાઈ નથી. બંને નેતા એક દિવસ ન્યાય યાત્રામાં જોડાય તેવી શક્યતા છે.  ન્યાય યાત્રાનું સ્વાગત ઢોલ-નગારાથી નહીં પણ સૂતરની આંટી વડે સ્વાગત કરવાનો નિર્ણય કર્યો છે.

દરરોજ 100 લોકો ન્યાય યાત્રામાં જોડાશે :
ન્યાય યાત્રા મોરબીથી નીકળી ટંકારા, ટંકારાથી ગૌરીદડ, રાજકોટના રતનપર, ચોટીલા, મૂળી, સુરેન્દ્રનગર, વઢવાણ, લખતર,  વિરમગામ, છારોડી, સાણંદ, શાંતિપુરા ચોકડી, ચાંદખેડા, ગાંધી આશ્રમ થઈ ગાંધીનગર પહોંચશે. દરરોજ 100 જેટલા લોકો ન્યાય યાત્રામાં જોડાઈ 20 થી 25 કિલોમીટરની પદયાત્રા કરશે. જ્યારે સ્થાનિક લોકો પોતાના વિસ્તારમાંથી જોડાશે. પ્રદેશના નેતાઓ તેમજ રાષ્ટ્રીય નેતાઓ પણ ન્યાય યાત્રામાં જોડાશે.