ચલાલા નગરપાલિકામાં ભાજપમાં આંતરિક ભૂકંપ

અમરેલી જિલ્લામાં આવેલ ચલાલા નગરપાલિકામાં ભાજપના શાસનમાં જ આંતરિક રાજકીય ભૂકંપ સર્જાયો છે. નગરપાલિકાના કુલ 24માંથી 20 સભ્યોએ પોતાના જ પક્ષની મહિલા પ્રમુખ નયનાબેન વાળા અને ઉપપ્રમુખ પ્રવીણ માલવિયા સામે અવિશ્વાસની દરખાસ્ત રજૂ કરી છે.

આ દરખાસ્તમાં પ્રમુખ અને ઉપપ્રમુખ સામે સભ્યોની અવગણના, ગેરવહીવટ, અવિશ્વાસ અને ભ્રષ્ટાચાર જેવા ગંભીર આક્ષેપો કરવામાં આવ્યા છે. ખાસ કરીને સામાન્ય સભાઓ ન બોલાવવાની બાબતે સભ્યોમાં ભારે નારાજગી જોવા મળી છે. જાણકારી મુજબ છેલ્લા સાત મહિનામાં માત્ર એકમાત્ર બજેટ બેઠક બોલાવવામાં આવી હતી, ત્યારબાદ કોઈ બેઠક યોજાઈ નથી.

વોર્ડ નંબર 3ની સભ્ય મુક્તાબેન પરમારે આ અવિશ્વાસ પ્રસ્તાવ રજૂ કર્યો છે અને ચીફ ઓફિસરને ચેતવણી આપી છે કે 15 દિવસમાં સામાન્ય સભા બોલાવવામાં નહીં આવે તો કાયદેસર કાર્યવાહી કરવામાં આવશે.

આ આંતરિક વિખવાદને કારણે ચલાલા નગરપાલિકાની રાજનીતિમાં હલચલ મચી ગઈ છે. ભાજપના તમામ સભ્યો હોવા છતાં બહુમતી સભ્યો દ્વારા અવિશ્વાસની દરખાસ્ત મૂકાતા પ્રમુખ અને ઉપપ્રમુખની ખુરશીઓ જોખમમાં મુકાઈ ગઈ છે. હવે આગામી દિવસોમાં ભાજપનું મોવડીમંડળ આ વિખવાદને કેવી રીતે શાંત કરે છે, તેના પર સૌની નજર ટકેલી છે.