મને IPS અધિકારીઓ અને ભાજપના નેતાઓએ ફસાવ્યો: વસાવા

ડેડિયાપાડાના ધારાસભ્ય ચૈતર વસાવાને શરતી જામીન મળતાં વડોદરા સેન્ટ્રલ જેલમાંથી મુક્ત કરાયા છે. ચૈતર વસાવા વડોદરા સેન્ટ્રલ જેલની બહાર આવતાં આમ આદમી પાર્ટીના કાર્યકરો અને સમર્થકોએ ખભા પર બેસાડી સ્વાગત કર્યું હતું. હાઈકોર્ટ દ્વારા શરતો સાથે જામીન મંજૂર કરવામાં આવતાં અઢી મહિના બાદ જેલમાંથી બહાર આવ્યા છે. જેલની બહાર પ્રદેશ પ્રમુખ ઈસુદાન ગઢવી સહિત આપના અનેક નેતાઓ ઉપસ્થિત રહ્યા હતા. 

જેલમાંથી મુક્ત થયેલા આમ આદમી પાર્ટીના નેતા અને ડેડિયાપાડાના ધારાસભ્ય ચૈતર વસાવાએ જણાવ્યું કે, જે રીતે મેં ધારાસભ્ય તરીકે મિટિંગમાં હાજરી આપી હતી. તે દરમિયાન પૂર્વ આયોજિત કાવતરૂ કરી મારી સાથે મગજમારી કરી હતી. મેં પોતે અરજી આપી હોવા છતાં મારી અરજી લીધી નથી અને મારી સામે 307 લગાવી જેલમાં મૂકવામાં આવ્યો છે. મને માથાભારે સાબિત કરી 80 દિવસ જેલમાં રાખવામાં આવ્યો છે. તેમાં ભાજપ અને પોલીસ પ્રશાસનનો મોટો હાથ છે.

વસાવાએ વધુમાં કહ્યું કે, હાઇકોર્ટ દ્વારા જામીન આપવામાં આવ્યા છે તેને અમે આવકારીએ છીએ. મારો અવાજ દબાવવાની વાત છે. પરંતુ મારો અવાજ દબાવાનો નથી. અમારા સમાજ અને ગુજરાતના લોકોએ આપેલો અવાજ દબાવવાની વાત હતી. જ્યાં ખોટું થશે ત્યાં આ અવાજ દબાવાનો નથી. હાઇકોર્ટ દ્વારા શરતી જામીન આપવામાં આવ્યા છે. આવનારા દિવસોમાં મને ચોક્કસ ભરોસો છે કે, હાઇકોર્ટ અને સુપ્રીમકોર્ટમાં સત્યનો વિજય થશે.

તેમણે ઉમેર્યુ કે, એટીવીટીની મિટિંગ હતી. એક સમિતિમાં બધા સરકારી અધિકારીઓ હતા. વેપારીઓને સભ્ય તરીકે લીધા હતા તે બાબતે મે વાંધો ઉઠાવ્યો હતો. મે કોઈ અપશબ્દ બોલ્યો નથી. હું જે રીતે હું ત્યાંથી ચૂંટાઈ આવું છું અને લોકો મારી સાથે છે. તેથી કેટલાક આઈપીએસ અધિકારીઓ અને ભાજપના નેતાઓએ મને ફસાવ્યો છે. એક વિપક્ષના ધારાસભ્ય તરીકે FIR થયા પહેલા અટકાયત કરી લેવામાં આવે છે. અમે પણ ફરિયાદ આપી. પરંતુ લેવામાં આવતી નથી.

તેમણે જણાવ્યું કે, મારા મતવિસ્તારના લોકો સાથે રહી નથી શક્યો તે માટે મને ખૂબ દુઃખ છે. મારી પ્રવેશબંધી છે. છતાં પણ હું તેઓની સાથે છું. મહાનગરપાલિકાની ચૂંટણી આવી રહી છે. જેમાં આમ આદમી પાર્ટી લડવાની છે. પરંતુ વિપક્ષનો એક ધારાસભ્ય અવાજ કઈ રીતે ઉઠાવે તેને કઈ રીતે દબાવી દેવો તે ભાજપ અને પોલીસ કરી રહી છે. તમામ યોજનાઓ અને તમામ મુદ્દાઓને લઈ સડકથી લઈ સદન સુધી લડીએ છીએ. તે ભારતીય જનતા પાર્ટીને પસંદ નથી. જેથી મને ખોટા કેસમાં ફસાવી દેવામાં આવ્યો છે.

આમ આદમી પાર્ટીના નેતા અને ધારાસભ્ય ચૈતર વસાવાને જામીન પર મુક્ત થયા બાદ કડક શરતોનું પાલન કરવું પડશે. હાઈકોર્ટે તેમને ડેડિયાપાડા વિસ્તારમાં કોર્ટની પરવાનગી સિવાય પ્રવેશ ન કરવા પ્રતિબંધ મૂક્યો છે. કોર્ટે સ્પષ્ટ કર્યું છે કે, તેઓ ફરીથી કોઈપણ ગેરકાયદે પ્રવૃત્તિમાં સંડોવાશે તો તેમના જામીન રદ થઇ શકે છે. તેમને તપાસમાં સહકાર આપવા અને કોર્ટની પરવાનગી વિના સ્થળાંતર ન કરવાનો આદેશ કરવામાં આવ્યો છે.

ઉલ્લેખનીય છે કે, 5 જુલાઈ 2025ના રોજ નર્મદા જિલ્લાના ડેડિયાપાડામાં આદિજાતિ વિકાસ કચેરીની બેઠક દરમિયાન ચૈતર વસાવા અને ભાજપના તાલુકા પંચાયત પ્રમુખ સંજય વસાવા વચ્ચે મારામારી થઈ હતી. સંજય વસાવાની ફરિયાદના આધારે ચૈતર વસાવાની ધરપકડ કરવામાં આવી હતી. ત્યારથી તેઓ જેલમાં હતા. નીચલી કોર્ટોમાં જામીન અરજી નામંજૂર થયા બાદ તેમણે હાઈકોર્ટમાં ધા નાખી હતી. માત્ર ચોમાસુ વિધાનસભા સત્રમાં હાજરી આપવા માટે તેમને ત્રણ દિવસ જામીન મળ્યા હતા પરંતુ સત્ર પૂરું થયા બાદ તેમને ફરીથી જેલમાં મોકલી દેવામાં આવ્યા હતા.