AAPના MLA ચૈતર વસાવાના શરતી જામીન મંજૂર

આમ આદમી પાર્ટીના ડેડિયાપાડાના ધારાસભ્ય ચૈતર વસાવા માટે જામીન અરજી મંજૂર થઈ. ગુજરાત હાઈકોર્ટે તેમની જામીન અરજી મંજૂર કરી છે. અગાઉ સ્થાનિક કોર્ટે તેમની જામીન અરજી ફગાવી દીધી હતી. ચૈતર વસાવાની ધરપકડ 5 જુલાઈના રોજ આદિજાતિ વિકાસ કચેરીની સંકલન બેઠક દરમિયાન ભાજપ શાસિત તાલુકા પંચાયતના પ્રમુખ સંજય વસાવા પર કથિત હુમલાના આરોપમાં થઈ હતી. ધરપકડ બાદ તેમને વડોદરા જેલમાં ન્યાયિક હિરાસતમાં મોકલવામાં આવ્યા હતા. જોકે, વિધાનસભાના ત્રિદિવસીય ચોમાસુ સત્ર માટે તેમને કામચલાઉ જામીન મળ્યા હતા, પરંતુ સત્ર પૂરું થતાં તેમને ફરીથી જેલમાં મોકલવામાં આવ્યા હતા. હવે હાઈકોર્ટના આ નિર્ણયથી તેમની જેલમાંથી મુક્તિ મળશે.

જય વસાવાની ફરિયાદના આધારે ધરપકડ

આ સમગ્ર મામલો થોડા મહિના પહેલા ડેડિયાપાડામાં આદિવાસી વિકાસ કચેરીની બેઠક દરમિયાન શરૂ થયો હતો, જ્યાં ચૈતર વસાવ અને ભાજપના સંજય વસાવા વચ્ચે શાબ્દિક બોલાચાલી અને મારામારી થઈ હતી. સંજય વસાવાની ફરિયાદના આધારે ડેડિયાપાડા પોલીસે ચૈતર વસાવા વિરુદ્ધ ગુનો નોંધીને તેમની ધરપકડ કરી હતી. આ ઘટના બાદ ચૈતર વસાવાના સમર્થકો રાજપીપળાની એલસીબી ઓફિસ બહાર એકઠા થયા હતા, જેના કારણે પોલીસે બળપ્રયોગ કરવો પડ્યો હતો.

આ પણ વાંચો: ચૈતર વસાવા 63 દિવસ બાદ જેલમુક્ત

પોલીસકર્મીઓનું કર્યું હતું અપમાન

ચૈતર વસાવા તેમના આક્રમક સ્વભાવ માટે જાણીતા છે અને અગાઉ પણ ઘણા વિવાદોમાં તેમનું નામ સામે આવી ચૂક્યું છે. તેમની સામે પોલીસની ફરજમાં રુકાવટ અને અન્યનો જીવ જોખમમાં મૂકવાના આરોપમાં પણ ફરિયાદો નોંધાઈ હતી. આ અગાઉ તેઓ પોલીસકર્મીઓનું અપમાન કરવા અને તેમની સાથે જાહેરમાં બોલાચાલી કરવા બદલ ચર્ચામાં રહ્યા હતા.

બોઈલર બ્લાસ્ટ બાદ 4 કામદારોના મોત

ભરૂચ જિલ્લાના અંકલેશ્વરમાં બોઈલર બ્લાસ્ટ બાદ 4 કામદારોના મોત થયા હતા, ત્યારે પણ ચૈતર વસાવા અને તેમના સમર્થકો પર ઔદ્યોગિક એકમમાં અનધિકૃત પ્રવેશ, અધિકારીઓને તેમની ફરજ બજાવતા અટકાવવા અને કામદારોના સંબંધીઓને ઉશ્કેરવાનો આરોપ લાગ્યો હતો. તે કેસમાં પણ તેમની ધરપકડ થઈ હતી. આ ઉપરાંત, તેમને વન અધિકારીને ધમકાવવા, હવામાં ગોળીબાર કરવા અને ખંડણી વસૂલવાના આરોપમાં પણ જેલમાં રહેવું પડ્યું હતું. આ કેસમાં તેઓ લગભગ 6 અઠવાડિયા સુધી જેલમાં રહ્યા હતા.