લો બોલો... આરોગ્ય મંત્રીના માદરે વતનની સરકારી હોસ્પિટલોમાં 41 ટકા સ્ટાફની ઘટ

ગુજરાતી કહેવત છે કે, ‘ભુવો ધૂણે તો ય નાળિયેર તો પોતાના ઘર ભણી જ ફેંકે’.. મહેસાણા જિલ્લામાં આ કહેવત યથાર્થ ઠરી ન હોય તેમ છેલ્લાં 10 વર્ષથી આરોગ્ય મંત્રી મહેસાણા જિલ્લાના હોવા છતાં સરકારી હોસ્પિટલોમાં સ્ટાફની દ્રષ્ટિએ દયનીય સ્થિતિ છે.

મહેસાણા જિલ્લાની સરકારી હોસ્પિટલોમાં વર્ષોથી સ્ટાફની ઘટ છે. મહેસાણા જિલ્લામાં 41 ટકા સ્ટાફની ઘટ હોવાનો વિધાનસભામાં આરોગ્ય મંત્રીએ ખુલાસો કર્યો છે. અર્બન હેલ્થ સેન્ટર્સમાં 59 ટકા અને સબ ડિસ્ટ્રીક્ટ હોસ્પિટલોમાં 35 ટકા સ્ટાફની અછત હોવાનું સામે આવ્યુ છે.

વડગામના ધારાસભ્ય જીજ્ઞેશ મેવાણીએ વિધાનસભામાં મહેસાણા જિલ્લાની સરકારી હોસ્પિટલોમાં ખાલી પડેલી જગ્યાઓ મુદ્દે પ્રશ્ન કર્યો હતો. આ પ્રશ્નનો આરોગ્ય મંત્રી ઋષિકેશ પટેલે જવાબ આપતાં જણાવ્યું હતું કે,મહેસાણા  જિલ્લાની સરકારી હોસ્પિટલોમાં 31 જાન્યુઆરી, 2025ની સ્થિતિએ 1980 કર્મચારીઓનું મહેકમ મંજૂર થયુ છે. જેની સામે હાલમાં 1117 જગ્યાઓ ભરેલી છે. જ્યારે 803 જગ્યાઓ ખાલી છે. જિલ્લામાં કુલ મહેકમ સામે 41 ટકા જગ્યા ખાલી છે.

સરકારી હોસ્પિટલોમાં મહેકમ સામે સૌથી ખરાબ સ્થિતિ 57 પ્રાથમિક આરોગ્ય કેન્દ્રોની છે. પ્રાથમિક આરોગ્ય કેન્દ્રોમાં 516ના મહેકમ સામે 342 જગ્યાઓ એટલે કે 66 ટકા સ્ટાફની અછત છે. જ્યારે સામુહિક આરોગ્ય કેન્દ્રોમાં 513ના મહેકમ સામે 73 જગ્યા એટલે કે 14 ટકા સ્ટાફની ઘટ છે. અર્બન હેલ્થ સેન્ટર્સમાં 59 ટકા સ્ટાફની ઘટ છે. ડિસ્ટ્રિક્ટ હોસ્પિટલોમાં 42 ટકા અને સબ ડિસ્ટ્રિક્ટ હોસ્પિટલોમાં 36 ટકા સ્ટાફની ઘટ છે. સામુહિક આરોગ્ય કેન્દ્રના વર્ગ-1ના અધિક્ષકની બે જગ્યા વર્ષ 2002 અને 2005થી ખાલી રહી છે.