ગુજરાતના રાજકારણમાં મહત્વના સમાચાર, આજે બપોરે થશે જાહેરાત

ગુજરાતમાં જેની ઘણા સમયથી રાહ જોવાઇ રહી છે ગ્રામપંચાયતની ચૂંટણીઓ અંગે આજે મોટા સમાચાર આવી શકે છે. રાજ્ય ચૂંટણી પંચ બપોરે ૩ વાગે રાજયની ૮,૩૨૭ ગ્રામપંચાયતો માટે ચૂંટણીની તારીખો જાહેર કરી શકે છે. આ જાહેરાત સાથે જ રાજ્યના ગ્રામ્ય વિસ્તારમાં રાજકીય હલચલ તેજ બનવાની શક્યતા છે.

રાજ્ય ચૂંટણી પંચ દ્વારા બપોરે યોજાનારી પ્રેસ કોન્ફરન્સમાં આ મહત્વપૂર્ણ વિગતો જાહેર થવાની અપેક્ષા છે. ચૂંટણી કાર્યક્રમની જાહેરાત બાદ તંત્ર દ્વારા તૈયારીઓ શરૂ કરી દેવાશે.

દરમિયાન, વિસાવદર અને કડીમાં યોજાનારી પેટા ચૂંટણીને લઈને પણ રાજકીય ગતિવિધિઓ શરૂ થઈ ચૂકી છે. ભાજપ દ્વારા સેન્સ પ્રક્રિયા શરૂ કરવામાં આવી છે, જેનાં આધારે યોગ્ય ઉમેદવારોની પસંદગી માટે કાર્યકરો અને સ્થાનિક નેતાઓ સાથે ચર્ચા હાથ ધરવામાં આવી રહી છે. ભાજપના નિરીક્ષકો કડી અને વિસાવદર પહોંચ્યા છે અને કાર્યકરોની સેન્સ લઇને પાર્લામેન્ટરી બોર્ડમાં રજૂ કરશે. ભાજપના 3 નિરીક્ષક તમામ દાવેદારોને સાંભળશે. બંને બેઠકો પર જિલ્લા ભાજપ કાર્યાલય ખાતે આ સેન્સ પ્રક્રિયા યોજાશે. મોહન કુંડારીયા, અમી પારેખ અને ગૌતમ ગેડીયા નિરીક્ષક તરીકે હાજર રહ્યા છે.

આ ઉપરાંત આવતીકાલે ભાજપની પાર્લામેન્ટરી બોર્ડની મહત્વની બેઠક યોજાનાર છે, જેમાં પેટા ચૂંટણી તેમજ આગામી ગ્રામપંચાયત ચૂંટણી માટે ઉમેદવારોના નામો પર અંતિમ નિર્ણય લેવાય તેવી શક્યતા છે. આ બેઠકમાં મુખ્યપ્રધાન ભૂપેન્દ્ર પટેલ, પ્રદેશ પ્રમુખ સીઆર પાટીલ સહિતના  નેતાઓ અને સંગઠનના મહત્વના સભ્યો હાજર રહેશે.

ચૂંટણી અંગેની આ ઘટનાઓથી સ્પષ્ટ છે કે આગામી દિવસોમાં રાજ્યના રાજકીય પરિપ્રેક્ષમાં ગરમાવો જોવા મળી શકે છે.