VADODARA: નવા નવા ભાજપમાં જોડાયેલા નેતાને કેન્દ્રની કમિટીમાં સ્થાન મળતા ખળભળાટ

વડોદરા શહેરમાં રાજકીય માહોલ ફરી ગરમાયો છે. વર્ષોથી કોંગ્રેસ પક્ષમાં રહીને ભાજપ સામે સતત વિરોધ કરતા રહેલા નેતાઓ ભાજપમાં જોડાયા બાદ અચાલક જ વિવિધ હોદ્દા મેળવવા માંડે છે. વડોદરાના હાલના ભાજપના નેતા અને પૂર્વ કોંગ્રેસી નેતા અભિષેક ઉપાધ્યાયને 2 કમિટીમાં સ્થાન મળ્યું છે. આ જોતાં  ભાજપમાં નવા આવેલા નેતાઓને મળતી સુવિધાઓ અને હોદ્દા સામે જૂના, સંનિષ્ઠ કાર્યકરોની અવગણના કરાતા અસંતોષ છવાયો છે. કોંગ્રેસના પૂર્વ નેતા અભિષેક ઉપાધ્યાયને ભાજપમાં જોડાયા બાદ તાત્કાલિક કેન્દ્રની બે મહત્વની સમિતિમાં સ્થાન મળ્યું છે, જેને લઈને કાર્યકરોમાં રોષ જોવા મળી રહ્યો છે.

અભિષેક ઉપાધ્યાયની રેલવે મંત્રાલયની ZRUCC (જોનલ રેલવે યુઝર્સ કન્સલ્ટેટીવ કમિટી)ના સભ્ય તરીકે તથા ફૂડ કોર્પોરેશન ઓફ ઈન્ડિયા (FCI)ની કન્સલ્ટેટિવ કમિટીમાં નિમણૂક કરાઈ છે. ખુદ અભિષેક ઉપાધ્યાયે આ માહિતી સોશિયલ મીડિયામાં શેર કરી છે.

વર્ષોથી ભાજપના કાર્યક્રમોમાં ખુરશી સાફ કરતા, લોકોની ભીડ ભેગી કરવા એડીચોટીનું જોર લગાવતા, કોઇ કાર્યક્રમ હોય તો રાતના ઉજાગરા કરીને આખા શહેરમાં ભાજપના ઝંડા લગાવતા જુના અને સંનિષ્ઠ કાર્યકરો આવા નિર્ણયોથી છંછેડાય તે સ્વાભાવિક છે. પાર્ટી માટે જાત ઘસી નાખનારા કાર્યકરોને આજે પણ કોઇ હોદ્દા મળતા નથી પણ જેણે વર્ષોથી ભાજપનો વિરોધ કર્યો તેવા નેતાઓ જ્યારે ભાજપમાં જોડાઇ જાય છે તેમને હોદ્દા મળવા લાગે છે.

ભાજપના આંતરિક સ્તરે કામ કરતા અનેક કાર્યકરો કહે છે કે આવી નિર્ણયો પાર્ટીના મૂળ વફાદાર કાર્યકરોમાં નારાજગી ફેલાવે છે.

ભવિષ્યમાં વડોદરાની સ્થાનિક ભાજપ એકમમાં આ રીતે રોષ અને અવગણનાના કારણે તણાવનું વાતાવરણ ઊભું થાય તેવું લાગી રહ્યું છે.