વિમાન દુર્ઘટનામાં પૂર્વ મુખ્યમંત્રી વિજય રૂપાણીનું અવસાન, જાણો તેમની રાજકીય કારકિર્દી

અમદાવાદ વિમાન દુર્ઘટનામાં પૂર્વ મુખ્યમંત્રી વિજય રૂપાણીનું અવસાન થયું છે. બપોરે દુર્ઘટના થયા બાદ સાંજે પ્રદેશ ભાજપ પ્રમુખ સી.આર.પાટીલે સત્તાવાર રીતે વિજય રૂપાણીના નિધનની પુષ્ટિ કરી હતી. હાલમાં પંજાબ ભાજપ પ્રભારી વિજય રૂપાણીનો જન્મ બર્માના રંગૂનમાં થયો હતો. રાજકોટમાં આવીને તેઓ રાષ્ટ્રીય સ્વયં સેવક સંઘ તેમજ ભાજપ સાથે જોડાઈને કોર્પોરેટરથી મુખ્યમંત્રીપદ અને રાજ્યસભાના સાંસદ સુધી પહોંચ્યા હતા. 

અમદાવાદમાં ક્રેશ થયેલાં વિમાનમાં બ્રિટનના 52, પોર્ટુગલના 6, કેનેડાનો 1 નાગરિક સવાર હતા. પ્લેન દુર્ઘટનામાં પૂર્વ મુખ્યમંત્રી વિજય રૂપાણીનું નિધન થતાં પરિવારજનો સહિત ભારતીય જનતા પાર્ટીના કાર્યકરોમાં શોકની લાગણી પ્રસરી ગઈ છે. વર્ષ 1987માં કોર્પોરેટર બન્યા બાદ રાજકીય કારકિર્દી ઝડપથી આગળ વધવા લાગી હતી. રાજકોટ શહેરને શ્રેષ્ઠ શહેર બનાવવા માટે તેમણે તેમની રાજકીય કુનેહનો ઉપયોગ કર્યો. રાજકોટ શહેરમાં ભાજપ સંગઠનના મહામંત્રી અને રાજકોટ મ્યુનિસિપલ કોર્પોરેશનમાં કોર્પોરેટર તરીકે તેમના કાર્યકાળ દરમિયાન આગવી સૂઝબૂઝનો ઉપયોગ કર્યો હતો. રાજકોટ મ્યુનિસિપલ કોર્પોરેશનમાં સૌથી યુવા વયના સ્ટેન્ડિંગ કમિટીના ચેરમેન બન્યા હતા.

વિજયભાઈ વર્ષ 1988થી 1995 દરમિયાન રાજકોટ મહાનગરપાલિકામાં સ્ટેન્ડિંગ ચેરમેન અને વર્ષ 1996-97 દરમિયાન મેયરપદે રહી ચૂક્યા છે. પ્રદેશ ભાજપમાં મહત્વની સંગઠનની જવાબદારી નિભાવી છે. તેઓ 3 ટર્મ પ્રદેશ મહામંત્રી રહી ચૂક્યાં છે. વર્ષ 2006માં ગુજરાત રાજ્ય પ્રવાસન નિગમ, 2006થી 2012 રાજ્યસભાના સાંસદ, વર્ષ 2013માં મ્યુનિસિપલ ફાયનાન્સ બોર્ડના ચેરમેન અને સૌરાષ્ટ્ર સ્ટોક એક્સચેન્જના ડાયરેક્ટર રહી ચૂક્યાં છે. તેઓ રાજકોટ-2 વિધાનસભા બેઠક પરથી પહેલી વખત ધારાસભ્ય તરીકે ચૂંટાયા હતા. પહેલી વખત ધારાસભ્ય બન્યા બાદ તેમને કેબિનેટ મંત્રીનો હોદ્દો મળ્યો હતો. પાણી પુરવઠા, શ્રમ અને રોજગાર, વાહનવ્યવહાર વિભાગના તેઓ કેબિનેટ મંત્રી હતા. ત્યારબાદ ગુજરાત પ્રદેશ ભાજપ પ્રમુખ બન્યા હતા. 7 ઓગસ્ટ 2016ના રોજ તેઓ ગુજરાતના મુખ્યમંત્રી બન્યા હતા. વર્ષ 2017ની વિધાનસભા ચૂંટણીમાં ભાજપનો વિજય થતાં બીજી વખત મુખ્યમંત્રી બન્યા હતા. પરંતુ વર્ષ 2021માં વિજયભાઈને મુખ્યમંત્રી પદેથી અચાનક રાજીનામું આપવું પડ્યું હતું.

વિજય રૂપાણીના પરિવારની વાત કરીએ તો તેમની દીકરી અને જમાઈ લંડનમાં CA છે. પૂર્વ મુખ્યમંત્રી વિજય રૂપાણીની દીકરી રાધિકાના લગ્ન નીતિન મિશ્રા સાથે થયા છે. હાલ રાધિકા અને નીતિન લંડનમાં ચાર્ટર્ડ એકાઉન્ટન્ટ છે. વિજયભાઈના એકના એક દીકરા પુજિતનું સાડા ત્રણ વર્ષની ઉંમરે મોત થયું હતું. અમદાવાદમાં સસરાના ઘરે થર્ડ ફ્લોરની ગેલેરીમાંથી દીકરો પુજિત પડી જતાં તેનું મૃત્યુ થયું હતું. તેની  યાદમાં વિજયભાઈએ પુજિત મેમોરીયલ ટ્રસ્ટ બનાવ્યું છે. પુજિતના જન્મદિવસે ગરીબ બાળકો સાથે પગંતમાં બેસીને તેમણે ભોજન લેવાનું સદ્કાર્ય ચાલુ રાખ્યું હતું. આ ટ્રસ્ટ બાળકોના ઉત્થાનના હેતુથી શરૂ થયા બાદ જરૂરીયાતમંદ લોકો માટે એનો વિસ્તાર વધારવામાં આવ્યો હતો. જેના કારણે રાજકોટના હજારો લોકો સુધી ટ્રસ્ટ દ્વારા સહાય પહોંચી હતી.

વિજય રૂપાણીના પત્ની અંજલિબેન પહેલેથી રાજકારણમાં હતા. તેઓ જનસંઘના કાર્યકર હતાં. વિજયભાઇ કાર્યકર-કમ-સંઘના જૂના પ્રચારક હતા. વિજયભાઇ અમદાવાદ અવારનવાર પ્રચાર અર્થે આવતા હતા. અંજલિબેનના પિતા પણ સંઘના જૂના અને મુખ્ય કાર્યકર હોવાથી અનેક વખત જમવા આવ્યા હતા. આ સમયગાળા દરમિયાન વિજયભાઇ અને અંજલિબેન વચ્ચે પ્રેમ પાંગર્યો હતો. વડીલોની સહમતિ અને મંજૂરી લઇ વિધિવત લગ્ન કર્યા હતા.

વિજય રૂપાણી કોલેજના દિવસોમાં તેમની યુવાશક્તિનો ઉપયોગ કરી અખિલ ભારતીય વિદ્યાર્થી પરિષદ (ABVP) સંગઠનના પડકારો દૂર કર્યા હતા. ધર્મેન્દ્રસિંહજી કોલેજમાં નોંધપાત્ર બહુમતી સાથે તેઓ વિદ્યાર્થી સંગઠનના મહામંત્રી તરીકે ચૂંટાઇ આવ્યાં હતા. તેઓ આર્થિક રીતે પછાતવર્ગના વિદ્યાર્થીઓના સંઘર્ષનો અવાજ પણ બન્યા હતા. વિદ્યાર્થીકાળ દરમિયાન આર્થિક રીતે પછાતવર્ગના વિદ્યાર્થીઓની ફી દૂર કરવા માટે વિરોધ પ્રદર્શનોમાં તેમણે આગેવાની કરી હતી. કટોકટી દરમિયાન તેઓ લોકઆંદોલનો સાથે સક્રીય રીતે જોડાયા હતા અને 1976માં ખૂબ જ નાની વયે તેમણે ભૂજ અને ભાવનગરની જેલમાં એક વર્ષ માટે મિસા હેઠળ જેલવાસ કર્યો હતો.