રાજકારણમાં પ્રવેશવાથી થયું નુકસાન: સ્મૃતિ ઈરાની

અભિનેત્રી અને રાજકારણી સ્મૃતિ ઈરાની ફરી એકવાર ચર્ચામાં છે. 'ક્યોંકી સાસ ભી કભી બહુ થી'ની બીજી સિઝન સાથે નાના પડદા પર કમબેક કરી રહેલી સ્મૃતિ ઈરાનીએ સોહા અલી ખાનના શો 'ઓલ અબાઉટ હર'માં પોતાના જીવનના સંઘર્ષો અને રાજકારણના પ્રારંભિક દિવસો વિશે ચોંકાવનારા ખુલાસા કર્યા છે.

સ્મૃતિ ઈરાનીએ જણાવ્યું કે, મિસ ઈન્ડિયા સ્પર્ધામાં ભાગ લેવા માટે તેને એક લાખ રૂપિયાની જરૂર હતી. આ રકમ માટે તેણે તેના પિતા પાસેથી લોન લીધી હતી, પરંતુ પૈસા આપતી વખતે પિતાએ એક અનોખી શરત મૂકી હતી. તેમણે કહ્યું હતું કે, "જો તું વ્યાજ સાથે આ લોન એક વર્ષમાં ચૂકવી ન શકે તો તારે મારી પસંદના છોકરા સાથે લગ્ન કરવા પડશે."

પિતાની આ કડક શરત સ્મૃતિએ સ્વીકારી લીધી હતી. જોકે, શરૂઆતમાં તે પૂરી રકમ ચૂકવી શકી નહોતી. પૈસા પાછા આપવા માટે તેણે મહેનત કરવાનું શરૂ કર્યું. બ્યુટી પેજન્ટ્સમાંથી મળેલા ગિફ્ટ્સ વેચીને તેણે ₹60,000 પાછા આપ્યા. બાકીની રકમ માટે તેને 3-4 મહિના સુધી મેકડોનાલ્ડ્સમાં કામ કરવું પડ્યું. તે અઠવાડિયામાં છ દિવસ કામ કરતી અને રજાના દિવસે ઓડિશન આપવા જતી હતી. આ જ સંઘર્ષ દરમિયાન તેને 'ક્યોંકી સાસ ભી કભી બહુ થી'નો આઇકોનિક રોલ મળ્યો અને તે 'તુલસી' બનીને ઘરે-ઘરે જાણીતી થઈ ગઈ.

રાજકારણમાં પ્રવેશ: 'મને નુકસાન થયું'

ટીવી ઇન્ડસ્ટ્રીમાં સફળતાના શિખરે પહોંચ્યા બાદ સ્મૃતિ ઈરાનીએ રાજકારણમાં ઝંપલાવ્યું. પોતાના રાજકીય પ્રવાસ વિશે વાત કરતા તેમણે કહ્યું કે, "રાજકારણમાં આવવાથી મને નુકસાન થયું છે. લોકો માને છે કે કલાકારો કારકિર્દીના અંતમાં રાજકારણમાં પ્રવેશ કરે છે, પરંતુ હું તો શરૂઆતમાં જ આવી ગઈ હતી. અહીં મારે ક્યાંય વધુ મહેનત કરવી પડી."

સ્મૃતિ ઈરાનીએ એકટ્રેસથી લઈને કેબિનેટ મંત્રી સુધીની લાંબી સફર ખેડી છે. તેમણે માનવ સંસાધન વિકાસ મંત્રાલય, કાપડ મંત્રાલય, મહિલા અને બાળ વિકાસ મંત્રાલય જેવા મહત્વના પદો સંભાળ્યા છે.

25 વર્ષ બાદ હવે તેઓ ફરી એકવાર અભિનયની દુનિયામાં પાછી ફરી છે, જે દર્શાવે છે કે તેમના માટે કોઈ પણ ક્ષેત્રમાં સંઘર્ષ અને મહેનત ક્યારેય અંતિમ નથી હોતી.