ગુજરાતમાં આજે 8000થી વધુ ગ્રામ પંચાયતોની ચૂંટણી

ગુજરાતમાં આજે 8,000થી વધુ ગ્રામ પંચાયતો માટે ચૂંટણી યોજાઈ રહી છે, જે લોકશાહીના પાયાને મજબૂત બનાવશે. કુલ 751 ગ્રામ પંચાયતો સમરસ જાહેર થઈ છે, જ્યારે બાકીની પંચાયતોમાં મતદાન પ્રક્રિયા ચાલી રહી છે. 3,656 સરપંચની બેઠકો અને 16,224 સભ્યોની બેઠકો માટે આજે 81 લાખ જેટલા મતદારો પોતાના મતાધિકારનો ઉપયોગ કરશે.

OBC અનામત બાદ પ્રથમ ચૂંટણી અને મતદાન પ્રક્રિયા

નોંધનીય છે કે, ગુજરાત સરકારે સ્થાનિક સ્વરાજ્યની સંસ્થાઓમાં 27 ટકા OBC અનામત લાગુ કર્યા બાદ રાજ્યમાં આ પ્રથમવાર ગ્રામ પંચાયતની ચૂંટણીઓ યોજાઈ રહી છે. કુલ 85 લાખ ગ્રામીણ મતદાતાઓ આજે બેલટ પેપર પર સ્વસ્તિકનું નિશાન કરીને સ્થાનિક નેતાઓને ચૂંટશે. સવારે 7 વાગ્યાથી શરૂ થયેલું મતદાન સાંજે 6 વાગ્યા સુધી ચાલશે.

ગુજરાત રાજ્ય ચૂંટણી પંચે ગયા મહિને 8,000થી વધુ ગ્રામ પંચાયતો માટે ચૂંટણી કાર્યક્રમ જાહેર કર્યો હતો. જોકે, કડી અને વિસાવદર બેઠક હેઠળ આવતી ગ્રામ પંચાયતની ચૂંટણી મોકૂફ રખાતા આખરે 4,564 ગ્રામ પંચાયતોમાં સામાન્ય ચૂંટણી યોજાવાની હતી. સમરસ પંચાયતોને બાદ કરતાં, બાકીની 3,813 પંચાયતોમાંથી 271 પંચાયતોમાં આંશિક સમરસ ઉમેદવારોની પસંદગી થઈ હતી, જ્યારે કેટલીક બેઠકો પર ઉમેદવારોના અભાવને કારણે ચૂંટણી યોજાશે નહીં.

પેટાચૂંટણી અને ખાલી બેઠકોનું ચિત્ર

આ ઉપરાંત, 3,524 ગ્રામ પંચાયતો માટે પેટાચૂંટણીની પણ જાહેરાત કરવામાં આવી હતી, પરંતુ તેમાંથી માત્ર 353 પંચાયતોમાં જ ચૂંટણી થશે. તેનું કારણ એ છે કે 3,171 પંચાયતોની બેઠકો બિનહરીફ પરિણામો અથવા નામાંકન ન ભરવાને કારણે ખાલી રહી છે.

આજે યોજાઈ રહેલી સામાન્ય, મધ્યસત્ર અને પેટાચૂંટણી હેઠળ ગ્રામ પંચાયતોમાં સરપંચ પદ માટે 3,656 બેઠકો અને ગ્રામસભાના 16,224 સભ્યની બેઠકો માટે મતદાન થશે, જેમાં 81 લાખ જેટલા મતદારો પોતાના લોકશાહી અધિકારનો ઉપયોગ કરશે.