ગુજરાતમાં ‘બંધી’ છતાં દારૂની રેલમછેલ!

ગુજરાતમાં દારૂબંધી માત્રા કાગળ ઉપર હોય તેમ દરરોજ કરોડો રૂપિયાનો દારૂ પકડાઈ રહ્યો છે. જ્યારે દારૂબંધીના લીરેલીરાં ઉડાડતાં અનેક કિસ્સાઓ બની રહ્યા છે. ભાજપના પૂર્વ ધારાસભ્યએ પોલીસ સામે મોરચો ખોલી દારૂના અડ્ડા બંધ નહી થાય તો પોતે બંધ કરાવશે તેવી ચીમકી આપી છે. દેશી દારૂ પીતા સામાન્ય માણસને પરેશાન કરતી પોલીસે સાણંદ નજીક ક્લબમાં વિદેશી દારૂની પાર્ટી કરતાં પકડાયેલાં 39 યુવક-યુવતીઓને કલાકોમાં જામીન ઉપર છોડી મૂકતાં કામગીરી સામે સવાલ ઉઠ્યા હતા. જ્યારે બે વર્ષમાં ₹191 કરોડનો વિદેશી દારૂ પકડાયાનો કોંગ્રેસે આક્ષેપ કર્યો હતો.

ગાંધીના ગુજરાતમાં દારૂબંધી માત્ર કાગળ પર જ રહી છે. સરકાર અને ગૃહ વિભાગ ભલે ગમે તેટલાં બણગાં ફૂંકે પણ ખુલ્લેઆમ દારૂનો વેપલો ધમધમી રહ્યો છે. યુવાનો દારૂ-ડ્રગ્સના બંધાણી બન્યાં છે ત્યારે અમદાવાદ જેવા મેગાસિટીમાં ક્લબોમાં ચાલતી દારૂની મહેફિલ-પાર્ટી તો હિમશીલાના ટોચ સમાન છે. મોટા શહેરોમાં દારૂ-ડ્રગ્સની હોમ ડિલિવરી થઈ રહી છે.

કોંગ્રેસના મુખ્ય પ્રવક્તા ડો.મનીષ દોશીએ કોંગ્રેસના ધારાસભ્યોએ બે વર્ષ પહેલાં પૂછેલા સવાલના જવાબમાં સરકારે જાહેર કરેલા વિદેશી દારૂના આંકડા જાહેર કર્યા હતા. જેમાં વર્ષ 2022 અને 2023માં ગુજરાતના 21 જિલ્લામાં રૂપિયા 191 કરોડનો વિદેશી દારૂ પકડાયો હોવાનો સ્વીકાર કર્યો હતો. આ ઉપરાંત 3955 કરોડનું હેરોઈન, કોકેઈન, ગાંજો, અફિણ. પોષડોડા, મેફેડ્રોન ડ્રગ્સ પકડાયુ હોવાની વિગતો આપી હોવાનો મનીષ દોશીએ દાવો કર્યો હતો. તેનાં પરથી ગુજરાતમાં દારૂબંધી છે કે દારૂછુટ્ટી એ જ ખબર પડતી નહી હોવાનો આક્ષેપ કરી ભાજપના રાજમાં બુટલેગરો બેફામ બન્યાં હોવાનો અને હપ્તારાજને કારણે દારૂનું  દૂષણ વકર્યુ હોવાનો ગંભીર આક્ષેપ કર્યો હતો.

તેમણે ઉમેર્યુ હતું કે, ગુજરાતમાં વિદેશી, દેશી દારૂ ઉપરાંત ડ્રગ્સનો જથ્થો પકડાઇ રહ્યો છે તે જોતાં ગુજરાતની ઓળખ ઉડતા પંજાબની જેમ ઉડતા ગુજરાતની થઈ રહી છે. બે વર્ષમાં ગુજરાતમાં 2.87 કરોડનો દેશી દારૂ અને 11 કરોડનું બિયર પણ પકડાયુ છે. ગુજરાતમાં ડ્રગ્સ પેડલરોનું વ્યાપક નેટવર્ક છે જેના કારણે શહેરો જ નહીં, ગામડાઓમાં પણ ડ્રગ્સ વેચાઇ રહ્યુ છે. ગાંજો, અફીણ સાથે હેરોઈન, ડ્રગ્સનું બેફામપણે વેચાણ થઈ રહ્યુ છે. વિશાળ જથ્થામાં દારૂ અને ડ્રગ્સ પકડાવા છતાં પોલીસ-ગૃહ વિભાગ જાણે તીર માર્યુ હોય તેમ વાહવાહી મેળવી રહ્યું છે. સવાલ એ છે કે, દારૂ-ડ્રગ્સનો આટલો વિશાળ જથ્થો પકડાઈ રહ્યો છે તો પાછલા બારણે કેટલું વેચાણ થતું હશે તેની કલ્પના કરવી રહી.

ભાજપના પૂર્વ ધારાસભ્યએ પોલ ખોલી તો સસ્પેન્ડ કર્યા

પોલીસ અને બુટલેગરોની મીલીભગતના કારણે ગુજરાતમાં દારૂ અને ડ્રગ્સનું દૂષણ વધી રહ્યું છે. છેક ગાંધીનગર સુધી હપ્તા જતાં હોવાથી બુટલેગરો બેફામ બન્યા છે. પોલીસનો ડર ના હોય તેમ પોલીસ સ્ટેશનમાંથી દારૂની હેરાફેરીમાં પકડેલા આરોપીઓને છોડાવી ગયાના કિસ્સા સામે આવી રહ્યા છે.

ખેડા જિલ્લાના લીંબાસી પોલીસ સ્ટેશનમાં બુટલેગરે આવીને પોલીસને ગાળો ભાંડી હતી. પોલીસ સામે ગંભીર આક્ષેપ કરતાં કહ્યુ હતું કે, તમે હપ્તા લો છો તો પછી રેડ કેમ પાડો છો? તેમ કહી પકડાયેલા શખ્સને છોડાવી ગયો હતો. મુદ્દામાલ સાથે પકડાયો હોવા છતાં પોલીસે આરોપીને છોડી દીધો હતો.

માતરના ભાજપના પૂર્વ ધારાસભ્યે દારૂબંધીની પોલ ખોલી હતી. પૂર્વ ધારાસભ્ય કેસરીસિંહ સોલંકીએ ટ્વિટ કરી પોલીસને અલ્ટીમેટમ આપ્યુ હતુ કે, લીંબાસીમાં દારૂના અડ્ડા ધમધમી રહ્યા છે. 10 દિવસમાં દારૂના અડ્ડા બંધ કરાવો નહિતર હું જાતે અડ્ડા પર જઈને રેડ પાડીશ. પોલીસ ઉપર આક્ષેપ કર્યો હતો કે, દારૂના ધંધાર્થીઓ પકડાય તો બુટલેગરો છોડાવી જાય છે. પોલીસ નામ પૂરતો ગુનો નોંધીને બાદમાં છોડી મૂકે છે. તેથી અનેક ફરિયાદો કરી હોવા છતાં દારૂની બદી કાબૂમાં આવી શકતી નથી.

દારૂ પીવા માટે અડ્ડા પર જવાની પણ જરૂર નથી. હવે તો દારૂ-ડ્રગ્સની હોમ ડિલિવરી થઈ રહી છે. શહેરોમાં ઘેર બેઠા મળી જાય તેવી વ્યવસ્થા ગોઠવાઈ છે. દૂધના ટેન્કરોમાં દારૂની બેરોકટોક હેરાફેરી થઈ રહી હોવાના અનેક કિસ્સા સામે આવ્યા છે. કેસરીસિંહે દારૂબંધી અંગે પોલીસ સામે આક્ષેપ કરતો વીડિયો બનાવી સોશિયલ મીડિયામાં વાયરલ પણ કર્યો હતો.

દારૂબંધી અંગેનો વીડિયો સોશિયલ મીડિયામાં વાયરલ થતાં ગુજરાત સરકારે પોલીસ સામે કોઈપણ પ્રકારની કાર્યવાહી કરી નથી. આ મામલે ખેડા જિલ્લા ભાજપે પણ દારૂબંધી અંગે સરકારને રજૂઆત કરવાના બદલે કેસરીસિંહ સોલંકીને પક્ષમાંથી સસ્પેન્ડ કરી દેતા મામલો ચર્ચાસ્પદ બન્યો છે.

પોશ વિસ્તારના યુવક-યુવતીઓ સામે ઢીલી કામગીરી

અમદાવાદ નજીક સાણંદના ગ્લેડ વન ગોલ્ફ ક્લબના બેન્કવેટ હોલમાં રવિવારે મોડી રાત્રે પોલીસે રેડ પાડીને 26 યુવતીઓ અને 13 યુવકોને દારૂ પાર્ટી કરતાં ઝડપી પાડ્યા હતા. બિલ્ડર પ્રતિક સાંઘીના બર્થ ડે નિમિત્તે યોજાયેલી દારૂ પાર્ટીમાં પડકાયેલા 39 યુવક-યુવતીઓ પોશ વિસ્તારમાંથી આવતાં હતા. તેથી પોલીસે યુવતીઓને નોટિસ આપી તરત જ છોડી મૂકી હતી. જ્યારે 13 યુવકોને મોડી સાંજે જામીન ઉપર મુક્ત કર્યા હતા. તેવી જ રીતે સાણંદના કલ્હાર બ્લ્યુ એન્ડ ગ્રીન વીલામાંથી 12 યુવકો પણ દારૂ પાર્ટી કરતાં પકડાયા હતા. આ યુવકોને પણ પોલીસે ગુનો નોંધી જમીન ઉપર મુક્ત કર્યા હતા.