મહારાષ્ટ્રમાં ગઠબંધનમાં તણાવ, સ્થાનિક ચૂંટણીમાં ભાજપ અને અજિત પવાર આમને-સામને

મહારાષ્ટ્રમાં આગામી BMC સહિત સ્થાનિક સ્વરાજ્ય સંસ્થાઓની ચૂંટણીઓ પહેલાં મહાયુતિ (એનડીએ) ગઠબંધનમાં તણાવ ઊભો થયો છે. ખાસ કરીને ભાજપ અને અજિત પવારની NCP વચ્ચે અણબનાવની વાતો ચરમસીમા પર છે. રાજકીય ઘર્ષણની પાછળનું મુખ્ય કારણ એ છે કે, ભાજપના ઘણા નેતાઓએ તાજેતરમાં કેન્દ્રીય ગૃહમંત્રી અમિત શાહની મુલાકાત દરમિયાન અજિત પવાર સામે ફરિયાદો કરી હતી.

શું છે મુખ્ય મુદ્દો?

ભાજપના નેતાઓએ આરોપ મૂક્યો હતો કે, 2024ની વિધાનસભા ચૂંટણી દરમિયાન અજિત પવારે ભાજપના વિરોધીઓના ઉમેદવારોને ટેકો આપ્યો હતો. હવે સ્થાનિક સ્વરાજ્યની ચૂંટણીઓમાં NCP (અજિત પવાર) એકલા લડી શકે તેવી અટકળો ઊઠી છે.

પશ્ચિમ મહારાષ્ટ્ર અને મરાઠવાડામાં ખેંચતાણ

ભાજપ અને અજિત પવારની આગેવાની હેઠળની એનસીપી બંને મજબૂત પ્રભાવ ધરાવે છે. પશ્ચિમ મહારાષ્ટ્રમાં ભાજપે 28 અને એનસીપીએ 15 બેઠક જીતી હતી. જ્યારે મરાઠાવાડામાં કુલ 52 બેઠકમાંથી ભાજપે 19 બેઠક અને એનસીપીએ 8 બેઠક જીતી હતી. આ વિસતારોમાં બંને પક્ષ વચ્ચે સીધો સ્પર્ધાત્મક તણાવ જોવા મળ્યો છે.

ગઠબંધન છતાં ભય

મહાયુતિમાં હોવા છતાં બંને પક્ષમાં વિશ્વાસની ખામી સ્પષ્ટ જોવા મળે છે. NCPના નેતાઓ એવું માનીએ છે કે, ભાજપ આ બેઠકો પર પોતાનું વર્ચસ્વ જાળવી રાખવા માટે એકલા ચૂંટણી લડી શકે છે. પુણે, સાંગલી, પીંપરી-ચિંચવાડ, પર્ભાણી, જાલના અને બીડ જેવા શહેરોમાં સ્પષ્ટ તણાવ છે.

શિવસેના અને શરદ પવાર સમૂહનો આક્ષેપ

શિવસેનાના ધારાસભ્ય સચિન આહિરે કહ્યું કે, અજિત પવારથી માત્ર ભાજપના નેતાઓ નહીં પણ આખી કેબિનેટ ત્રાસી ગઈ છે." તેઓએ કહ્યું કે, અનેક પ્રોજેક્ટ અટકી ગયા છે અને ફંડની અછત છે. NCP (શરદ પવાર)ના ધારાસભ્ય રોહિત પવારના જણાવ્યા મુજબ, ભાજપ હવે જાહેરમાં અજિત પવાર સામે નારાજગી બતાવી રહ્યું છે જેથી એકલા ચૂંટણી લડી શકે.

ભાજપ અને NCP (અજિત પવાર)એ તણાવને નકારી કાઢ્યો

ભાજપના મુંબઈ પ્રમુખ આશિષ શેલારે કોઈ મતભેદ હોવાની વાતને “અફવા” કહીને ફગાવી દીધી. NCPના સાંસદ સુનિલ તટકરે પણ જણાવ્યું કે, મહાયુતિ ગઠબંધનમાં સહકાર અને સંપ છે અને અજિત પવાર, ફડણવીસ અને શિંદે વચ્ચે સહમતી છે.