ગુજરાતમાં પોલીસ દુરુપયોગ મુદ્દે કોંગ્રેસની ચેતવણી

ગુજરાત પ્રદેશ કોંગ્રેસ સમિતિએ રાજ્યમાં પોલીસ અને પ્રશાસનના રાજકીય દુરુપયોગનો ગંભીર આક્ષેપ કરતા ભાજપ સરકાર સામે મોરચો ખોલ્યો છે. અમદાવાદ સ્થિત રાજીવ ગાંધી ભવન ખાતે યોજાયેલી પત્રકાર પરિષદમાં પ્રદેશ કોંગ્રેસ પ્રમુખ અમિત ચાવડાએ જણાવ્યું કે કેટલાક પોલીસ અધિકારીઓ ભાજપના રાજકીય હિતો માટે કામ કરી રહ્યા છે અને કોંગ્રેસના કાર્યકરો તથા ચૂંટાયેલા પ્રતિનિધિઓને નિશાન બનાવવામાં આવી રહ્યા છે.

અમિત ચાવડાએ આરોપ લગાવ્યો કે, ચૂંટણી દરમિયાન કોંગ્રેસના ઉમેદવારોને દબાવવા, ડરાવવા અને ખોટા કેસોમાં ફસાવવાના પ્રયાસો થયા હતા. સુરત, વડોદરા, દાહોદ, ડભોઈ સહિતના વિસ્તારોમાં કોંગ્રેસના નેતાઓ સામે રાજકીય અદાવતથી કાર્યવાહી કરવામાં આવી હોવાનું તેમણે જણાવ્યું હતું.

વડોદરાના કોંગ્રેસ કોર્પોરેટર આશિષ જોશી સામે નોંધાયેલા દારૂ કેસનો ઉલ્લેખ કરતા ચાવડાએ કહ્યું કે, ચૂંટણીના થોડા દિવસો પહેલાં કોઈ મજબૂત પુરાવા વિના FIR નોંધાવી દબાણ ઉભું કરવામાં આવ્યું હતું. તેમણે દાવો કર્યો કે મૂળ આરોપીને સરળતાથી જામીન મળી ગયા, જ્યારે આશિષ જોશીને ગંભીર કલમો હેઠળ જેલમાં મોકલવામાં આવ્યા.

કોંગ્રેસે બનાસકાંઠામાં દારૂ પરિવહનના વીડિયો હોવા છતાં કાર્યવાહી ન થવા અને કોડીનાર તાલુકા પંચાયતના કોંગ્રેસી સભ્યો સાથે થયેલી ગેરવર્તણૂકને પણ ગંભીર મુદ્દો ગણાવ્યો હતો. બાવળા વિસ્તારમાં કોંગ્રેસના ચૂંટાયેલા સભ્યોને PASAની ધમકીઓ આપી ભાજપમાં જોડાવા દબાણ કરાતું હોવાનો પણ આક્ષેપ કરવામાં આવ્યો હતો.

કોંગ્રેસ આ મુદ્દે હાઈકોર્ટથી લઈને સુપ્રીમ કોર્ટ સુધી કાનૂની લડત લડશે. રાજ્યના ભ્રષ્ટ અને પક્ષપાતી અધિકારીઓની આવક કરતા વધુ મિલકતો અને ગેરકાયદે વ્યવહારોની તપાસ કરવાની પણ અમિત ચાવડાએ ચેતવણી આપી હતી.

કોંગ્રેસે પોલીસ અને પ્રશાસનથી પીડિત લોકોને સાથે રાખીને ગાંધીનગર કૂચ કરવાની જાહેરાત પણ કરી છે. આ ઉપરાંત રાજ્યપાલ સમક્ષ ભ્રષ્ટ અધિકારીઓના મુદ્દા ઉઠાવવાની તૈયારી દર્શાવી છે.

એડવોકેટ હિતેશ ગુપ્તાએ જણાવ્યું કે, સંખેડા પોલીસ સ્ટેશનમાં નોંધાયેલો કેસ રાજકીય પ્રેરિત અને પાયાવિહોણો છે. આશિષ જોશીએ પોતાની નિર્દોષતા સાબિત કરવા નાર્કો ટેસ્ટ માટે તૈયારી દર્શાવી હોવા છતાં પોલીસે કોઈ કાર્યવાહી કરી નથી. આ કેસ રદ કરવા માટે ગુજરાત હાઈકોર્ટમાં ક્વોશિંગ પિટિશન દાખલ કરવામાં આવી હોવાનું તેમણે જણાવ્યું હતું. કોંગ્રેસે સ્પષ્ટ સંદેશ આપ્યો કે કાયદાનો દુરુપયોગ કરીને વિરોધ પક્ષને દબાવવાના પ્રયાસો સામે હવે મક્કમ લડત આપવામાં આવશે.