સલાયામાં ભાજપનો સફાયો તો આમ આદમી પાર્ટીએ કર્યું ચોંકાવનારું પ્રદર્શન

સ્થાનિક સ્વરાજની ચૂંટણીઓના આજે પરિણામો જાહેર થયા છે જેમાં અનેક ચોંકાવનારા પરિણામો પણ જોવા મળ્યા છે જેમાં દેવભઊમિ દ્વારકાના સલાયા નગરપાલિકામાં ભાજપના સૂપડા સાફ થઇ ગયા છે જ્યારે નવાઇની વાત એ છે કે સલાયા નગરપાલિકામાં આમ આદમી પાર્ટીએ સારુ પ્રદર્શન કર્યું છે. 28 બેઠકો ધરાવતી સલાયા નગરપાલિકામાં કોંગ્રેસે 15 બેઠકો પર જીત મેળવી છે જ્યારે આમ આદમી પાર્ટીએ 13 સીટો પર જીત મેળવી છે પણ ભાજપને એક પણ બેઠક મળી શકી નથી. 

સ્થાનિક સ્વરાજની ચૂંટણીઓમાં એકદંરે ભાજપે મેદાન માર્યું છે પણ ભાજપની જીતની મીઠાઇમાં સલાયા નગરપાલીકાએ કડવાહટ પેદા કરી છે કારણ કે સલાયામાં ભાજપનો સફાયો થઇ ગયો છે જેના કારણે ભાજપમાં સન્નાટો છવાઇ ગયો છે. ગુજરાતમાં સલાયા નગરપાલિકા કદાચ એક માત્ર નગરપાલિકા હશે જ્યાં ભાજપ ખાતું પણ ખોલાવી શક્યો નથી. સલાયામાં કોંગ્રેસે સારુ પ્રદર્શન કર્યું છે અને લોકોએ કોંગ્રેસ પર ભરોસો મુક્યો છે તો આમ આદમી પાર્ટીએ પણ 13 બેઠકો જીતીને વિપક્ષનું સ્થાન મેળવ્યું છે તે આ ચૂંટણીની રસપ્રદ વાત રહી છે. તેણે અહીં ભાજપને નહીં પણ કોંગ્રેસને સીધી ટક્કર આપી છે. ભાજપ માટે સલાયાના નગરજનોએ પશ્ચાતાપ કરવાનો મોકો આપી ને તમામ ઉમેદવારોને ઘરભેગા કરી દીધા છે. 

આમ તો સલાયા નગરપાલિકા કોંગ્રેસ પાસે જ હતી અને સતત બીજી વખત કોંગ્રેસે સલાયામાં સત્તા મેળવવામાં સફળતા મેળવી છે પણ આ વખતે આમ આદમી પાર્ટીએ અહીં ભાજપ કરતા સારું પ્રદર્શન કર્યું છે.  ઉલ્લેખનીય છે કે સલાયામાં 7 વોર્ડની 28 બેઠકો માટે ભાજપ, કોંગ્રેસ, આમ આદમી પાર્ટી અને અપક્ષ સહિતના 98 ઉમેદવારો મેદાને ઉતર્યા હતા.