પટણામાં આઝાદી પછી પ્રથમ કોંગ્રેસની CWC બેઠક

બિહારની રાજધાની પટણામાં સ્વતંત્રતા પછી પ્રથમ કોંગ્રેસની CWCની ઐતિહાસિક બેઠક યોજાઈ હતી. આ બેઠક પટણાના ઐતિહાસિક સદાકત આશ્રમ ખાતે થઈ હતી, જ્યાં મહાત્મા ગાંધી અને ડૉ. રાજેન્દ્ર પ્રસાદ જેવા સ્વતંત્રતા સેનાનીઓનું આગમન થયું હતું. પાર્ટી અધ્યક્ષ મલ્લિકાર્જુન ખડગેના નેતૃત્વમાં રાહુલ ગાંધી, સોનિયા ગાંધી, કોંગ્રેસ શાસિત રાજ્યોના મુખ્યમંત્રીઓ અને લગભગ 170 જેટલા ટોચના નેતાઓ આ બેઠકમાં ઉપસ્થિત રહ્યા હતા. આ બેઠકનો મુખ્ય ઉદ્દેશ્ય આગામી બિહાર વિધાનસભા ચૂંટણી 2025 માટેની રણનીતિ ઘડવાનો હતો.

અનેક અગત્યના મુદ્દાઓ પર ચર્ચા

બેઠકનો મુખ્ય કાર્યસૂચિ આગામી બિહાર વિધાનસભા ચૂંટણીની તૈયારીઓ, ગઠબંધન રણનીતિ, બેઠકોની વહેંચણી, ચૂંટણીમાં પારદર્શિતા સુનિશ્ચિત કરવી, મતદાર યાદીની ચકાસણી અને ચૂંટણી પંચની સ્વતંત્રતા પર ધ્યાન કેન્દ્રિત કરવાનો હતો. કોંગ્રેસ આ બેઠકને 'બીજા સ્વતંત્રતા સંગ્રામ'ની તૈયારીનો એક ભાગ ગણાવી રહી છે, જેમાં બેરોજગારી, મોંઘવારી, ગુનાખોરી અને મહિલાઓ વિરુદ્ધના અત્યાચાર જેવા મુદ્દાઓ પર ચર્ચા કરવામાં આવી હતી.

આ પણ વાંચો: Bihar: આરામાં કોંગ્રેસની બેઠકમાં હોબાળો: કાર્યકરો વચ્ચે મારામારી, એક ઘાયલ

RJDએ 243 બેઠકો પર લડવાની જાહેરાત કરી

પાર્ટી મહા ગઠબંધનમાં પોતાની ભૂમિકા મજબૂત કરવા અને 'વૉટની ચોરી'ના આરોપો પર ભાજપને ઘેરવાની રણનીતિ પર પણ વિચાર-વિમર્શ કરી રહી છે. જોકે, કોંગ્રેસે હજી સુધી આગામી બિહાર ચૂંટણીમાં કેટલી બેઠકો પર લડશે તેની જાહેરાત કરી નથી, જ્યારે ગઠબંધન સહયોગી RJDએ તમામ 243 બેઠકો પર લડવાની જાહેરાત કરી છે. કોંગ્રેસને આશા છે કે, આ બેઠકથી તેલંગાણા વિધાનસભા ચૂંટણી 2023 જેવી સફળતા બિહારમાં પણ પુનરાવર્તિત થશે, જ્યાં CWC બેઠક બાદ પાર્ટીએ જીત મેળવી હતી.

રાષ્ટ્રીય રાજકારણ અને INDIA ગઠબંધન

પટણાના રસ્તાઓ પર પોસ્ટર, બેનરો અને ઝંડાઓથી શણગારવામાં આવ્યા છે, જે બેઠક પ્રત્યેનો ઉત્સાહ દર્શાવે છે. બિહાર કોંગ્રેસ પ્રભારી કૃષ્ણ અલ્લાવરૂએ જણાવ્યું હતું કે, 'બિહાર હવે ભારતનું રાજકીય કેન્દ્ર છે. આ બેઠક જનતાના અધિકારોની રક્ષા માટે છે.' બીજી તરફ, JDUએ આ બેઠક પર 'મોસમી પ્રેમ' કહીને કટાક્ષ કર્યો છે. આ બેઠક માત્ર બિહારની રાજનીતિ પર જ નહિ, પરંતુ રાષ્ટ્રીય રાજકારણ અને INDIA ગઠબંધનની મજબૂતી પર પણ અસર કરી શકે છે.