રાહુલ ગાંધીએ ગુજરાતમાં સંગઠન સૃજન અભિયાન અંતર્ગત 65 દિવસ બાદ રેસના ઘોડા જાહેર કર્યા છે. AICC દ્વારા ગુજરાતના 40 શહેર અને જિલ્લા પ્રમુખોની નિમણૂક કરવામાં આવી છે. જાહેર કરાયેલા 40 શહેર અને જિલ્લા પ્રમુખોમાં 10 પ્રમુખો રિપિટ કરાયા છે. જ્યારે 8 પૂર્વ ધારાસભ્ય અને 1 પૂર્વ સાંસદની જિલ્લા પ્રમુખ તરીકે નિમણૂક કરવામાં આવી છે. વલસાડના પૂર્વ સાંસદ કિશન પટેલને જિલ્લા પ્રમુખ બનાવાયા છે. જ્યારે અમદાવાદ શહેર પ્રમુખ તરીકે સોનલ પટેલની નિમણૂક કરવામાં આવી છે.

અમદાવાદ શહેર પ્રમુખની જવાબદારી મહિલાને સોંપવામાં આવી છે. સોનલ પટેલને અમદાવાદ શહેર પ્રમુખ બનાવાયા છે. અમદાવાદ જિલ્લા પ્રમુખ રાજેશ ગોહિલ, અમરેલી જિલ્લા પ્રમુખ પ્રતાપ દુધાત, ડાંગ જિલ્લા પ્રમુખ સ્નેહીલ ઠાકરે, જૂનાગઢ શહેર પ્રમુખ મનોજ જોશી, કચ્છ જિલ્લા પ્રમુખ વી. કે. હુંબલ, નવસારી જિલ્લા પ્રમુખ શૈલેશ પટેલ, સુરેન્દ્રનગર જિલ્લા પ્રમુખ નૌશાદ સોલંકી, વડોદરા જિલ્લા પ્રમુખ જશપાલસિંહ પઢીયાર, વડોદરા શહેર પ્રમુખ ઋત્વિક જોશી અને સુરત જિલ્લા પ્રમુખ આનંદ ચૌધરીને રિપિટ કરવામાં આવ્યા છે.

પૂર્વ ધારાસભ્યોની પણ જિલ્લા પ્રમુખ તરીકે નિમણૂક કરવામાં આવી છે. જેમાં ગુલાબસિંહ રાજપૂતને બનાસકાંઠા જિલ્લા પ્રમુખ, પ્રવિણ રાઠોડને ભાવનગર જિલ્લા પ્રમુખ, પુંજા વંશને ગીર સોમનાથ જિલ્લા પ્રમુખ, બળદેવજી ઠાકોરને મહેસાણા જિલ્લા પ્રમુખ બનાવાયા છે. કિસાન કોંગ્રેસના પ્રદેશના ચેરમેન પાલ આંબલિયાની દેવભૂમિ દ્વારકા જિલ્લા પ્રમુખ નિમણૂક કરવામાં આવી છે. બાકીના શહેર અને જિલ્લા પ્રમુખોમાં નવા ચહેરાની પસંદગી કરવામાં આવી છે.

કોંગ્રેસે ગુજરાતમાં સંગઠન સૃજન અભિયાન મોડાસાથી શરૂ કર્યુ હતુ. આ અભિયાન અંતર્ગત 12 એપ્રિલ, 2025ના રોજ, 43 AICC નિરીક્ષકો અને 183 PCC નિરીક્ષકોની નિમણૂક કરવામાં આવી હતી. જેમાં પ્રભારી, સાંસદો, ધારાસભ્યો અને ભૂતપૂર્વ PCC પ્રમુખો સહિત વરિષ્ઠ નેતાઓનો સમાવેશ કરાયો હતો. ગુજરાતના 43 જિલ્લા અને શહેર પ્રમુખોની પસંદગી માટે કન્વીનર તરીકે AICCના ઓબ્ઝર્વર, તેઓની સાથે PCCના ચાર ઓબ્ઝર્વર રાખવામાં આવ્યા હતા. ઓબ્ઝર્વરોની નિમણૂક કરાયા બાદ રાહુલ ગાંધીના અધ્યક્ષસ્થાને પ્રથમ બેઠક 15 એપ્રિલે મોડાસામાં મળી હતી.

ત્યારબાદ AICC નિરીક્ષકોએ PCC નિરીક્ષકો સાથે મળી 26 લોકસભા, 182 વિધાનસભા અને 235 બ્લોક કોંગ્રેસ સમિતિઓમાં ફીલ્ડ મુલાકાતો કરી હતી. જાહેર જનતા, પક્ષના કાર્યકરો, સ્થાનિક સમુદાયો સાથે સંપર્ક કરી જિલ્લા અને શહેર પ્રમુખોના નામ અંગે સૂચનો મેળવ્યા હતા. અભિયાન શરૂ થયાના 65 દિવસ બાદ 43 પૈકી 40 શહેર અને જિલ્લા પ્રમુખોની નિમણૂક કરવામાં આવી છે.

વર્ષ 2027માં ભાજપને ગુજરાતમાં હરાવવા કોંગ્રેસે ચેલેન્જ આપી છે. આગામી દિવસોમાં કોંગ્રેસે જિલ્લા પ્રમુખોને વધુ સત્તા આપવાનો નિર્ણય પણ કર્યો છે. મોડાસામાં સંગઠન સૃજન અભિયાનની શરૂઆત સમયે રાહુલ ગાંધીએ રેસના ઘોડાની વાત કરી હતી. રાહુલ ગાંધીએ કહ્યું હતું કે, કોંગ્રેસ પાર્ટી ભાજપ અને RSS હરાવી શકે છે. દેશમાં બંનેને હરાવવા હોય તો ગુજરાતમાંથી રસ્તો પસાર થાય છે.

કોંગ્રેસની શરૂઆત મહાત્મા ગાંધી અને સરદાર પટેલે ગુજરાતમાંથી કરી હતી. કેટલાક વર્ષોથી કોંગ્રેસ ડિમોરલાઇઝ થઇ રહી છે. કોંગ્રેસની મુશ્કેલી કાર્યકરોના સહયોગથી દૂર થઇ શકે છે. તેમણે કહ્યું હતું કે, બે પ્રકારના ઘોડા હોય છે એક રેસના અને બીજા લગ્નનના પણ તેમાં ત્રીજા ઘોડા પણ જોડી દઉં છું અને તે છે લંગડા ઘોડા.

June 22, 2025 | 22:10 IST