મનરેગા કૌભાંડમાં કર્મચારીથી લઈને મંત્રી સુધીની મીલીભગતઃ ભાજપના સાંસદનો ઘટસ્ફોટ

ભરૂચ જિલ્લાના આમોદ, જંબુસર અને હાંસોટ તાલુકાના 56 ગામોમાં મનરેગા યોજનામાં કૌભાંડ ઝડપાયુ છે.  જિલ્લા ગ્રામ વિકાસ એજન્સીએ બે એજન્સીઓ સામે ફરિયાદ પણ નોંધાવી છે. ભરૂચના ભાજપના સાંસદ મનસુખ વસાવાએ મનરેગા કૌભાંડમાં કર્મચારીથી લઈને મંત્રી સુધીની મીલીભગત હોવાનો ચોંકાવનારો દાવો કરતાં રાજ્ય સરકાર અને ભાજપના નેતાઓ માટે નીચાજોણું થયું છે. ઉલ્લેખનીય છ કે, મનરેગા કૌભાંડમાં રાજકીય નેતાઓ અને અધિકારીઓ સામે ફરિયાદ નહી નોંધવામાં આવી હોવાનો કોંગ્રેસ અને આમ આદમી પાર્ટીના નેતાઓના આક્ષેપ બાદ ભાજપના નેતાનું નિવેદન સામે આવ્યુ છે.

ભરૂચના મનરેગા કૌભાંડ અંતર્ગત પોલીસ ફરિયાદ નોંધીને તપાસ શરૂ કરવામાં આવી છે. મનરેગા કૌભાંડ અંતર્ગત વેરાવળની જલારામ એન્ટરપ્રાઈઝ અને મુરલીધર એન્ટરપ્રાઈઝ નામની બે એજન્સીઓ સામે ગુનો નોંધવામાં આવ્યો છે. 56 ગામોમાં 7.30 કરોડનું કૌભાંડ કરાયુ હોવાનું જિલ્લા ગ્રામ વિકાસ એજન્સીની ટેકનિકલ ટીમે કરેલી તપાસમાં સામે આવ્યુ છે. તેવા સમયે ભરૂચના ભાજપના સાંસદ મનસુખ વસાવાએ ચોંકાવનારો દાવો કર્યો છે. મનસુખ વાસાવાએ કહ્યું છે કે, મનરેગા કૌભાંડમાં કર્મચારીથી લઈને મંત્રી સુધીની મીલીભગત હોય છે. હાલમાં સરપંચથી લઈને સંસદ સુધી ભાજપની સત્તા હોવાથી મનસુખ વસાવાએ કરેલા આક્ષેપથી ભાજપમાં ખળભળાટ મચી ગયો છે.  

મંત્રીથી લઈને જિલ્લા વિકાસ અધિકારી સુધીના જવાબદારઃ મનસુખ વસાવા

મનરેગા કૌભાંડને લઈને સાંસદ મનસુખ વસાવાએ કહ્યું કે, મનરેગા કૌભાંડમાં એકલો જિલ્લો જવાબદાર નથી. મનરેગા યોજનને સફળ બનાવવી હોય તો ગાંધીનગર એટલે કે રાજ્ય સરકાર કક્ષાએથી ચોક્કસ કાયદા અને નિયમો બનાવવા પડે. બધા જ લોકોની કૌભાંડમાં મીલીભગત હોય છે. રાજ્ય સરકારના મંત્રી હોય, સેક્રેટરી હોય, વિભાગના કમિશ્નર હોય કે પછી જિલ્લા વિકાસ અધિકારી તમામ લોકોની તેમાં જવાબદારી હોય છે. કૌભાંડની તપાસ કરવામાં આવે ત્યારે નીચેના કર્મચારીને ફસાવવામાં આવે છે. પરંતુ, બધાનું આમાં સેટિંગ હોય છે.

કોંગ્રેસના નેતાએ ભાજપના નેતાઓની સંડોવણીનો કર્યો હતો આક્ષેપ

કોંગ્રેસના પ્રદેશ મહામંત્રી સંદિપ માંગરોલાએ ભાજપમા નેતાઓ કૌભાંડમાં સંડોવાયેલા હોવાથી તટસ્થ તપાસ થતી નહી હોવાનો આક્ષેપ કર્યો હતો. કૌભાંડમાં તાલુકા પંચાયત, જિલ્લા પંચાયતના સદસ્યો, ધારાસભ્યો સાથે મોટા નેતાઓની સંડોવણી હોવાથી તટસ્થ તપાસ થાય તો ગાંધીનગર સુધી રેલો પહોંચી શકે તેમ હોવાનું તેમણે નિવેદન આપ્યુ હતુ. રાજકીય નેતાઓ અને અધિકારીઓની સંડોવણી હોવાથી જ્યુડિશિયરીના માર્ગદર્શન હેઠળ સ્પેશિયલ ઈન્વેસ્ટિગેશન ટીમ બનાવી તપાસ કરવાની માંગ કરી હતી.

ચૈતર વસાવાએ કોંગ્રેસના નેતાની સંડોવણીનો કર્યો હતો આક્ષેપ

ડેડિયાપાડાના આમ આદમી પાર્ટીના ધારાસભ્ય ચૈતર વસાવાએ મનરેગા કૌભાંડ મામલે નેતાઓ અને અધિકારીઓની મીલીભગતનો આક્ષેપ કર્યો છે. વેરાવળની મુરલીધર અને જલારામ એન્ટરપ્રાઈઝ જૂનાગઢના કોંગ્રેસના નેતા હીરા જોટવાની હોવાનો, બંને એજન્સીઓને 70 કરોડ કરતાં વધારેનું ચુકવણું કરવામાં આવ્યુ હોવાનો તેમજ નેતાઓ, અને અધિકારીઓ અને કર્મચારીઓના મીલીભગતથી કૌભાંડ આચરાયુ હોવાનો આક્ષેપ કર્યો છે.