વડાપ્રધાન સાથેની દાદાની મુલાકાતની આ તસવીરે ભારે ખળભળાટ મચાવ્યો

મુખ્યમંત્રી ભૂપેન્દ્ર પટેલ સોમવારે સવારે અચાનક જ દિલ્હી પહોંચ્યા હતા અને તેઓ વડાપ્રધાન નરેન્દ્ર મોદીને મળ્યા હતા. મુખ્યપ્રધાનની આ દિલ્હી મુલાકાતે રાજકારણમાં ભારે હલચલ મચાવી દીધી છે કારણ કે કેન્દ્ર સ્તરે હાલ સંગઠન અને મંત્રીમંડળમાં નવા ફેરફારની અટકળો થઇ રહી છે તથા પ્રદેશ પ્રમુખની પણ નિમણૂક થવાની બાકી છે તેવા સંજોગોમાં મુખ્યમંત્રી અચાનક જ દિલ્હી જઇને વડાપ્રધાનને મળે તે બાબતે ભાજપના  કાર્યકરોમાં ઉત્તેજના જોવા મળી રહી છે.

 

 

મુખ્યમંત્રી ભુપેન્દ્ર પટેલ સોમવારે સવારે 9 વાગે અચાનક જ દિલ્હી પહોંચ્યા હતા. પોતાના ટ્વિટર પર તેમણે વડાપ્રધાન નરેન્દ્ર મોદી સાથે મુલાકાત કરી તેની તસવીરો પણ મુકી છે. આ તસવીરોમાં એક તસવીરે ભારે હલચલ મચાવી છે. તસવીરમાં જોવા મળે છે કે મુખ્યપ્રધાન જ્યારે વડાપ્રધાન સાથે બેઠા છે અને વાતચીત કરે છે ત્યારે તેમના હાથમાં એક ફાઇલ છે હવે અટકળો થઇ રહી છે કે આ ફાઇલમાં શું છે. ફાઇલમાં ગુજરાતને લગતી કોઇ નવાજૂની પણ હોઇ શકે છે તેવી ચર્ચા ભાજપના કાર્યકરોમાં થઇ રહી છે.

 

આમ તો દાદાએ પોતાના ટ્વિટરમાં આ તસવીરો મુકીને લખ્યું છે કે આજે નવી દિલ્હી ખાતે ભારતના યશસ્વી વડાપ્રધાન આદરણીય શ્રી વડાપ્રધાન નરેન્દ્ર મોદીજી ની મુલાકાત કરી. ગુજરાતના સર્વાંગીણ વિકાસને સ્પર્શતા વિવિધ મુદ્દાઓ અંગે તેમની સાથે ચર્ચા કરી અને સરકારની કલ્યાણકારી યોજનાઓના લાભ પ્રત્યેક લાભાર્થી સુધી વધુ અસરકારક રીતે પહોંચાડવા અંગે તેઓનું બહુમૂલ્ય માર્ગદર્શન પ્રાપ્ત કર્યું.

 

 

પણ રાજકારણમાં ક્યારેય જે દેખાય તે હકિકત હોતી નથી તે સૌ કોઇ જાણે છે. મુખ્યપ્રધાન અચાનક જ દિલ્હી જાય અને વડાપ્રધાન નરેન્દ્ર મોદી સાથે મુલાકાત કરે તે માત્ર વિકાસના કામોની ચર્ચા કરવા તો ના જ જાય. હા.. તે વાતની પણ ચર્ચા થઇ હશે પણ કાર્યકરોમાં જે ચર્ચા જોવા મળી રહી છે તે એ છે કે મુખ્યપ્રધાન અને વડાપ્રધાન વચ્ચે ગુજરાતના સંગઠન અને મંત્રી મંડળ સહિત રાજકારણ અંગે પણ ચર્ચા થઇ જ હશે અને તેથી કાર્યકરો ક્યાસ લગાવી રહ્યા છે કે આવનારા સમયમાં ગુજરાતના પ્રદેશ પ્રમુખ નવા નિમાનાર છે ત્યારે સંગઠન અને રાજ્ય સરકારમાં પણ ઘણી નવાજૂની થઇ શકે છે. 

આ પણ વાંચો--  ભાજપે વીડિયો જાહેર કરીને મોટો સંકેત આપતા ખળભળાટ

સમાચાર મેળવવા આજે જ અમારી WAHTSAPP ચેનલ સાથે જોડાવ