કોંગ્રેસમાં કકળાટઃ કડી બેઠકના AAPના ઉમેદવારના મેવાણી સાથેના ફોટા વાયરલ

કડી અને વિસાવદર વિધાનસભાની પેટાચૂંટણીમાં ભાજપ અને કોંગ્રેસના ઉમેદવારો જાહેર થાય તે પહેલાં રાજકીય ગરમાવો આવી ગયો છે. ભાજપ અને આમ આદમી પાર્ટી સાથે ત્રિપાંખીયો જંગ ખેલી રહેલી કોંગ્રેસમાં જિજ્ઞેશ મેવાણીના નિવેદનોને લઈ આંતરિક વિખવાદ ચરમસીમાએ છે. તેવા સમયે કડી બેઠકની પેટાચૂંટણીમાં AAPના ઉમેદવાર જગદીશ ચાવડાના જિજ્ઞેશ મેવાણી સાથેના ફોટા વાયરલ થયા છે. જેના કારણે પેટાચૂંટણીનો જંગ રસપ્રદ બને તેવી શક્યતા છે. ઉલ્લેખનીય છે કે, કોંગ્રેસના ધારાસભ્ય જિજ્ઞેશ મેવાણીએ સોશિયલ મીડિયા એક્સ ઉપર "ફૂટેલી કારતૂસો"ને પક્ષમાંથી હાંકી કાઢવાની શનિવારે વાત કરી હતી. તેના બીજા દિવસે ફોટા વાયરલ થતાં રાજકીય વર્તુળોમાં ચર્ચા શરૂ થઈ છે.

કડી વિધાનસભા બેઠકના AAPના ઉમેદવાર જગદીશ ચાવડા અને ધારાસભ્ય જિજ્ઞેશ મેવાણી પહેલાથી એકબીજાથી પરિચિત છે. જગદીશ ચાવડા રાષ્ટ્રીય દલિત અધિકાર મંચના સક્રિય સભ્ય હોવાનું જાણવા મળ્યું છે. આ મંચની સ્થાપના મેવાણીએ વર્ષ 2016માં કરી હતી. જિજ્ઞેશ મેવાણીએ સોશિયલ મીડિયા 'X' ઉપર "ફૂટેલી કારતૂસો"ને પક્ષમાંથી હાંકી કાઢવાની વાત કરી તેના બીજા જ દિવસે જગદીશ ચાવડા સાથેની તસવીરો વાયરલ થઈ છે. આ તસવીરો જાણી જોઈને વાયરલ કરવામાં આવી છે કે કેમ તે બાબતે રાજકીય કાર્યકરોમાં ચર્ચા શરૂ થઈ છે. આ તસવીરોના કારણે કડી વિધાનસભા બેઠક પર AAPના ઉમેદવાર જગદીશ ચાવડા હોવાથી શક્યતાએ જિજ્ઞેશ મેવાણીએ પ્રભારી તરીકેની જવાબદારી સ્વીકારી નહી હોવાની વાતો વહેતી થઈ છે.

જીજ્ઞેશ મેવાણીએ શું કહ્યું હતું?

કોંગ્રેસના ધારાસભ્ય જિજ્ઞેશ મેવાણી અને પ્રદેશ નેતાઓ વચ્ચે હાલમાં રાજકીય જંગ ચાલી રહ્યો છે.  મેવાણીએ 'X' પર પોસ્ટ કરીને લખ્યું છે કે, 'હવે તો, બીજા પક્ષના નેતાઓ પણ કહી રહ્યાં છે કે, તમારા પક્ષમાં તો નરી ફૂટેલી કારતૂસો જ છે. કાઢો ને કોની રાહ જુઓ છો. ભાજપની બી ટીમ, ફૂટેલી કારતૂસો, સામેના કેમ્પ સાથે સેટિંગ કરનારાં અને લગ્નના ઘોડા, આ બધાને કોંગ્રેસમાંથી કાઢવામાં દુ:ખે છે. ક્યાં? મારું નહીં તો રાહુલજીનું તો માનો.'

મેવાણીનું આ નિવેદન અને AAP ઉમેદવાર સાથેની તસવીરો વાયરલ થતાં કોંગ્રેસની આંતરિક જૂથબંધી બહાર આવી છે. પેટા ચૂંટણી પહેલાં કોંગ્રેસનો વિખવાદ પક્ષ માટે નુકસાનકારક સાબિત થાય તેમ છે. ત્યારે કડી બેઠકની પેટાચૂંટણીના પ્રચાર અભિયાનમાં મેવાણી અને જગદીશ ચાવડાની વાયરલ તસવીરો અંગે વધુ વિવાદ થાય તેવી સંભાવના છે.

જીજ્ઞેશ મેવાણી કોંગ્રેસથી નારાજ
જીજ્ઞેશ મેવાણીએ અમરેલીમાં દલિત યુવાનની હત્યા બાદ કોંગ્રેસના નેતાઓ અને કોંગ્રેસ પક્ષથી નારાજ થઈ સોશિયલ મીડિયા X પર પોસ્ટ કરી કોંગ્રેસના નેતાઓ સામે નિશાન તાક્યું હતું. તેઓ કોંગ્રેસના કેટલાક નેતાઓથી નારાજ હોવાથી ખૂલીને બોલવા લાગ્યા છે.  થોડા સમય પહેલાં જીજ્ઞેશ મેવાણીએ કડી બેઠકના પ્રભારી તરીકેની જવાબદારી સ્વીકારવાની ના પાડી હતી. તેમની જગ્યાએ પૂર્વ ધારાસભ્ય ગ્યાસુદ્દીન શેખને જવાબદારી આપવી પડી હતી. પ્રદેશ નેતાગીરીથી નારાજ મેવાણીએ દિલ્હીના નેતાઓને રજૂઆત કરી હોવાનું જાણવા મળ્યું છે. પેટાચૂંટણીમાં ઉમેદવારો બાદ જીજ્ઞેશ મેવાણી સૌથી વધુ ચર્ચાસ્પદ બન્યા છે.