કડી-વિસાવદર પેટાચૂંટણીનો જામ્યો જંગ, ત્રી પાંખિયા જંગમાં કોણ ફાવશે ?

આજે કડી અને વિસાવદર વિધાનસભા બેઠકો માટે પેટાચૂંટણીની ઉમેદવારીપત્ર ભરવાની છેલ્લી તારીખ છે. રાજકીય ગરમાવો જોર પકડ્યો છે, કારણ કે ભાજપ, કોંગ્રેસ અને આમ આદમી પાર્ટીએ (AAP) પોતાના ઉમેદવારો જાહેર કરી દીધા છે અને ચૂંટણી મેદાનમાં ઉતરી ચૂક્યા છે.  આજે ઉમેદવારો શક્તિ પ્રદર્શન કરીને ફોર્મ ભર્યા છે. આજે વિસાવદર બેઠકના ભાજપના ઉમેદવાર કિરીટ પટેલે ફોર્મ ભર્યું હતું અને તેમના રોડ શોમાં મુખ્યમંત્રી ભૂપેન્દ્ર પટેલ સહિતના ભાજપના વરિષ્ઠ આગેવાનો પણ હાજર રહ્યા હતા.

વિસાવદર બેઠક પર ભાજપે પાટીદાર સમાજના પ્રભાવશાળી નેતા કિરીટ બાબુલાલ પટેલને ટિકિટ આપી છે. તેઓ ઇજનેરી સ્નાતક છે અને ખેતી, બાંધકામ, સહકારી ક્ષેત્ર તેમજ પાર્ટી સંગઠનમાં બે દાયકાથી સક્રિય છે. હાલમાં તેઓ જૂનાગઢ જિલ્લા સહકારી બેંકના ચેરમેન તરીકે ફરજ બજાવી રહ્યાં છે.

બીજી તરફ વિપક્ષ કોંગ્રેસે ભેંસાણ તાલુકા પ્રમુખ નીતિન રાણપરિયાને મેદાનમાં ઉતાર્યા છે. કોંગ્રેસ ખેડૂતો તથા ઇકોઝોનના મુદ્દે પ્રચાર ચલાવવાનું યોજના બનાવી રહી છે.

તો AAPએ લેઉવા પાટીદાર નેતા ગોપાલ ઇટાલિયાને ઉમેદવાર બનાવી ચૂંટણીની ઘોષણા પહેલાંથી જ તૈયારી શરૂ કરી દીધી હતી. અગાઉ તેઓ સુરતની કતારગામ બેઠક પરથી 2022માં હારી ગયા હતા, પરંતુ પાટીદાર સમૂહમાં તેમની ઓળખ અને જૂથ આધારને ધ્યાને લઈને પાર્ટીએ તેમને ફરી મેદાનમાં ઉતાર્યા છે.

ઉપરાંત ભાજપે કડી બેઠક પર રાજેન્દ્રકુમાર દાનેશ્વર ચાવડાને ઉમેદવાર બનાવ્યા છે. તેઓ ભાજપના પૂર્વી સંઘકાર્યકર છે અને લાંબા સમયથી રાજકારણમાં સક્રિય છે. તેમણે અર્થશાસ્ત્ર સાથે B.A. કર્યું છે અને 1980થી પાર્ટીના સક્રિય સભ્ય છે. રાજેન્દ્ર ચાવડાએ પણ આજે ફોર્મ ભર્યું હતું,.

કોંગ્રેસે પૂર્વ ધારાસભ્ય રમેશભાઈ મગનભાઈ ચાવડાને ટિકિટ આપી છે. તેઓ બી.એ., એલ.એલ.બી. સુધી અભ્યાસ કર્યા છે અને વ્યાપાર સાથે જોડાયેલા છે. તેમનાં પત્ની હાલ કડી નગરપાલિકાની નગરસેવિકા છે, જેથી સ્થાનિક સ્તરે તેમનું અસરકારક નેતૃત્વ માનવામાં આવે છે. તેમણે પણ આજે ફોર્મ ભર્યું હતું

આમ આદમી પાર્ટીના પ્રદેશ અધ્યક્ષ ઈશુદાન ગઢવીએ શુક્રવારે કડી બેઠક માટે ઉમેદવારની જાહેરાત કરી હતી. પાર્ટીએ કડી તાલુકાના ખાવળ ગામના જગદીશ ચાવડાને ટિકિટ આપી છે. તેઓ પાર્ટીના અનુસૂચિત જાતિના પ્રદેશ અધ્યક્ષ છે. જગદીશ ચાવડા લાંબા સમયથી આમ આદમી પાર્ટી સાથે જોડાયેલા છે. તેઓ રાષ્ટ્રીય દલિત મંચ સાથે પણ સક્રિય છે. વિદ્યાર્થીઓ, મહિલાઓ અને ખેડૂતોના હિતો માટે જન આંદોલનમાં અગ્રેસર રહ્યા છે.